Yizakɩ lʋra kam taanɩ
21
Baŋa-Wɛ dɛɛn nii Sara baŋa nɩ yɩ DƖ sɩɩnɩ DƖ kɩ kʋlʋ DƖ na tagɩ dɩd-o tɩn DƖ pa‑o. 2 Sara dɛɛn ma ja pugə o lʋ bəkərə o pa Abraham o kʋkwɩɩrʋ maŋa nɩ. Kʋ dɛɛn kɩ kʋ maŋɩ dɩ maŋa kalʋ Wɛ na tagɩ tɩn mʋ.a 3 Abraham ma pa bu wʋm yɩrɩ sɩ ‹Yizakɩ›.b 4 Yizakɩ na yi da nana tɩn mʋ Abraham goni o pəni, nɩnɛɛnɩ Wɛ na tagɩ nɩ o kɩ te tɩn.c 5 Abraham dɛɛn jɩgɩ bɩna bi mʋ yɩ ba lʋ o bu-baarʋ Yizakɩ ba pa‑o. 6 Sara maa wɩ: «Wɛ jaanɩ mwaanʋ mʋ DƖ ba DƖ pa amʋ, yɩ wʋlʋ maama na ni kʋlʋ na kɩ tɩn, kʋ tu wʋ́ da o wǝli dɩ amʋ mʋ sɩ dɩ́ mwanɩ.»7 O daa ta ma wǝli da o wɩ: «Nɔɔn-nɔɔnʋ ya bá wanɩ o ta dɩ Abraham nɩ Sara wʋ́ wanɩ o ja o bu sɩ o ŋɔgɩ yɩlɩ. Dɩ kʋntʋ maama dɩ, amʋ lʋgɩ bəkərə a pa‑o o kʋkwɩɩrʋ maŋa nɩ.»
Ba na zəli Agaarɩ dɩdaanɩ Ismayɛlɩ ba yagɩ te tɩn
8 Yizakɩ ma kɩ nɔɔnʋ yɩ ba kwər‑o yɩlɩ. Dɛ dɩm kʋntʋ nɩ, Abraham ma bəŋi nɔɔna sɩ ba di candiə kamunu. 9 Sara dɛɛn ma na nɩ Ezipi tiinə bukɔ Agaarɩ na lʋgɩ bəkərə kalʋ o pa Abraham tɩn zɩgɩ da o kɩ Yizakɩ o mwana. 10 O na nɛ tɩn, o ma ta dɩ Abraham o wɩ: «Zəli kaanɩ wʋlʋ na yɩ gambaa tɩn dɩ o bu-baarʋ wʋm sɩ ba viiri, sɩ kaanɩ wʋntʋ bu wʋm bá tɔgɩ dɩ amʋ tɩtɩ bu Yizakɩ o pɔɔrɩ nmʋ jɩjɩgɩrʋ tɩm o taa te.»
11 Taanɩ dɩm ma tiini dɩ daanɩ Abraham, Ismayɛlɩ na yɩ o tɩtɩ bu-baarʋ tɩn ŋwaanɩ. 12 Wɛ ma ta dɩd-o DƖ wɩ: «Yɩ ta n paɩ bəkərə kam dɩ n gamba-kana kam taanɩ dɩm daanɩ‑m. Nan cəgi Sara na tagɩ te o brɩ-m tɩn, bɛŋwaanɩ, kʋ lagɩ kʋ tɔgɩ Yizakɩ baŋa nɩ mʋ sɩ nmʋ dwi dɩm ba dɩ zɩgɩ. 13 Amʋ nan ta wʋ́ pa gamba-kana kam bu-baarʋ wʋm dwi dɩ puli dɩ ji tɩʋ, o dɩ na yɩ nmʋ bu tɩn ŋwaanɩ.»d
14 Tɩga na pʋʋrɩ tɩn zɩzɩŋa nɩ tɩn, Abraham ma kwe wʋdiu o pa Agaarɩ yɩ o daarɩ o lo na lɔɔ wʋnɩ o pa‑o sɩ o daŋɩ o bakala baŋa nɩ. O laan ma ban‑o dɩ o bəkərə kam o yagɩ-ba cwǝŋǝ nɩ. Agaarɩ maa viiri. O ma vu o kaagɩ Bɛɛr-Seba kagʋa kam yuu nɩ o beerǝ. 15 Lɔɔ kʋm wʋ na bam maa ba ba ti. O ma ja bu wʋm o tiŋi o yagɩ puŋu kuru nɩ. 16 O tɩtɩ laan ma fʋfɔ o vu daa o je sɩ kʋ maŋɩ dɩ nɔɔnʋ na wʋ́ ta taŋa sɩ ka yi mɛ tɩn. O ma bʋŋɩ o wɩ: «Amʋ ba lagɩ sɩ a na a bu wʋm tʋʋnɩ.» O na je da tɩn, o ma puli sɩ o taa keerǝ.
17 Baŋa-Wɛ ma ni bəkərə kam na keeri tɩn. Wɛ malɛka kam maa zɩgɩ Wɛ-sɔŋɔ nɩ ka bəŋi Agaarɩ ka wɩ: «Agaarɩ, bɛɛ mʋ kɩa? Yɩ ta n fʋna. Baŋa-Wɛ ni bu wʋm na tigi o keeri tɩn. 18 Zaŋɩ n vu n ja bu wʋm sɩ o zaŋɩ, sɩ amʋ wʋ́ pa o dwi dɩm ji dwi-kamunu.» 19 Wɛ laan ma puri o yiǝ DƖ pa o na vʋlɩ na tigi da. O ma vu o mɔ na o su o lɔɔ kʋm yɩ o ja vu o pa bu wʋm sɩ o nyɔ.
20 Wɛ dɛɛn maa nii bu wʋm baŋa nɩ yɩ o ba o kɩ nɔɔnʋ. O dɛɛn zʋʋrɩ kagʋa kam yuu nɩ mʋ yɩ o ji tɔɔrʋ. 21 Kagʋa kam o na zʋʋrɩ mɛ tɩn yɩrɩ mʋ Paran. O na wʋra tɩn, mʋ o nu ve o lagɩ kaanɩ Ezipi nɩ o pa-o sɩ o di.
Abraham dɩ Abimelɛkɩ kɩ ni-mɔrɔ daanɩ
22 Da yam kʋntʋ ni nɩ mʋ Abimelɛkɩ dɩ Pikɔlɩ na yɩ o jar-kərə yigə tu tɩn dɛɛn ve Abraham te. Ba ma ta dɩ Abraham ba wɩ: «Dɩbam maanɩ nɩ kʋlʋ maama nmʋ na yǝni n kɩ, Wɛ wʋ n tee nɩ mʋ. 23 Kʋntʋ tɩn, laan du durə Wɛ yigə nɩ sɩ nmʋ bá kɩ n ganɩ amʋ maŋa dɩ maŋa, kʋ na yɩ amʋ naa a biə bam, naa a dwi dɩm maama. Amʋ na kɩ-m lanyɩranɩ tɩn, nmʋ dɩ wʋ́ kɩ amʋ lanyɩranɩ, kʋ na yɩ amʋ dɩ tɩʋ kʋlʋ nmʋ na zʋʋrɩ kʋ wʋnɩ tɩn maama.» 24 Abraham maa wɩ: «Amʋ sɛ sɩ a du durə dɩm kʋntʋ.»
25 Abimelɛkɩ nɔɔna nan ya vrɩ Abraham vʋlɩ dɩdoŋ mʋ. Abraham ma ŋɔɔnɩ taanɩ dɩm dɩ Abimelɛkɩ. 26 Abimelɛkɩ ma ta o wɩ: «Amʋ wʋ lwarɩ wʋlʋ na kɩ kʋntʋ tɩn. Nmʋ wʋ tagɩ kʋ taanɩ n brɩ-nɩ, yɩ zɩm yɩranɩ mʋ amʋ laan lwarɩ kʋ ni nɩ.»
27 Abraham laan ma ja peeni, dɩ bʋnɩ, dɩ naanɩ o ja o nuŋi o pa Abimelɛkɩ, yɩ bantʋ bale kɩ ni-mɔrɔ daanɩ. 28 Abraham ma daarɩ o lɩ picwa barpɛ o vara bam wʋnɩ o zɩgɩ daa nɩ. 29 Abimelɛkɩ ma bwe Abraham o wɩ: «Bɛŋwaanɩ mʋ nmʋ pɔɔrɩ picwa yam yarpɛ?» 30 O ma ləri o wɩ: «Joŋi picwa yarpɛ yam amʋ tee nɩ sɩ kʋ taa yɩ maana sɩ amʋ mʋ kʋgɩ vʋlɩ dɩntʋ.» 31 Ba dɛɛn ma bəŋi je sɩm kʋntʋ sɩ Bɛɛr-Seba,e bɛŋwaanɩ dáanɩ mʋ nɔɔna bantʋ bale dɛɛn dugi durə.
32 Ba na kɩ ni-mɔrɔ dɩm kʋntʋ Bɛɛr-Seba nɩ ba ti tɩn mʋ Abimelɛkɩ dɩdaanɩ o jar-kərə yigə tu Pikɔlɩ joori ba vu Filisi tiinə tɩʋ kʋm. 33 Abraham ma jəri tiu kʋdoŋ kʋ yɩrɩ na yɩ ‹Tamaris› tɩn Bɛɛr-Seba nɩ. Dáanɩ mʋ o bəŋi Yuutu Baŋa-Wɛ yɩrɩ o zuli‑DƖ, DƖ na yɩ Wɛ dɩlʋ na maŋɩ DƖ wʋra maŋa maama tɩn. 34 Abraham dɛɛn maa zʋʋrɩ Filisi tiinə tɩʋ kʋm wʋnɩ o dáanɩ da.