Wɛ dɩ Nowe ni-gonim dɩm
9
Wɛ dɛɛn kɩ Nowe dɩ o bu-baara bam yu-yoŋo mʋ yɩ DƖ wɩ: «Lʋrɩ-na á puli, sɩ á daarɩ á jagɩ tɩga baŋa maama nɩ. 2 Amʋ kwe vara dwi maama, dɩ zunə dwi maama, dɩ tɩga wo-vəəlu dɩdaanɩ wo-kʋrrʋ maama, kʋ ta wǝli dɩ kale dwi maama mʋ a kɩ abam jɩŋa nɩ. Tɩ maama wʋ́ taa tiini tɩ kwarɩ fʋʋnɩ dɩ abam. 3 Amʋ laan pɛ abam cwǝŋǝ sɩ á di woŋo kʋlʋ dwi maama na ŋwɩ tɩn, nɩnɛɛnɩ abam nabiinǝ na maŋɩ á jɩgɩ cwǝŋǝ sɩ á di wʋdiiru tɩlʋ maama na kɩ tɩga kam baŋa nɩ tɩn. 4 Abam nan ba maŋɩ sɩ á di varɩm dɩ o yɩra jana, bɛŋwaanɩ, ŋwɩa wʋ jana bam wʋnɩ mʋ. 5 Kʋ nan na dwe maama tɩn, amʋ wʋ́ da abam jana nɛ, a wʋ́ bwe á ŋwɩan bwiə varɩm maama tee nɩ. A nan wʋ́ bwe nanzwənə maama nabiinu jana bwiə, nabiinu na yɩ nanzwənə nɩ o doŋ tɩn ŋwaanɩ. 6 Amʋ Baŋa-Wɛ naanɩ nabiinǝ sɩ ba taa nyɩ dɩ amʋ mʋ. Kʋntʋ ŋwaanɩ, wʋlʋ maama na gʋ o doŋ nabiinu, kʋ maŋɩ sɩ ba gʋ kʋ tu dɩ mʋ.7 Abam nan taá lʋrɩ-na biə á puli zanzan, sɩ á daarɩ á jagɩ tɩga baŋa maama nɩ.»
8 Wɛ ta ma ta Nowe dɩ o biə bam DƖ wɩ: 9 «Lele kʋntʋ amʋ lagɩ a goni ni mʋ dɩ abam. Dɩ nan wʋ́ taa wʋra dɩ paɩ abam biə balʋ na wʋ́ saŋɩ á kwaga nɩ tɩn dɩ. 10 Ni-gonim dɩm ta wʋ́ tʋŋɩ dɩ pa woŋo kʋlʋ dwi maama na ŋwɩ tɩn, nɩ kʋ na yɩ zunə dɩ vara dwi maama na tɔgɩ dɩ nmʋ ba nuŋi naboro kʋm wʋnɩ tɩn. 11 A ni-gonim dɩm ŋwaanɩ amʋ nan lagɩ a du durə dɩ nmʋ wɩ, na-fara daa bá ba sɩ kʋ cɔgɩ lʋgʋ kʋm maama dɩdaanɩ balʋ maama na ŋwɩ tɩga kam baŋa nɩ tɩn.»
12 Wɛ laan maa wɩ: «Ni-gonim dɩm amʋ na kɩ dɩ abam dɩ woŋo kʋlʋ maama na ŋwɩ tɩn mʋ wʋ́ taa wʋra sɩ kʋ taa ve maŋa kalʋ na ba ti tɩn. Tɩntʋ mʋ wʋ́ taa yɩ maana nɩ a goni ni dɩm kʋntʋ:
13 Amʋ wʋ́ garɩ manlaa-taŋa mʋ kunkwǝǝnu tɩm nɩ. Kantʋ mʋ wʋ́ taa yɩ gulə nɩ amʋ goni ni dɩdaanɩ woŋo kʋlʋ maama na wʋ tɩga kam baŋa nɩ tɩn. 14 Amʋ na yǝni a pa dʋa tɩnɩ, yɩ manlaa-taŋa kam na garɩ wɛɛnɩ, 15 kʋʋ́ pa amʋ guli ni-gonim dɩlʋ a na kɩ dɩ abam dɩ woŋo kʋlʋ maama na ŋwɩ tɩn, sɩ na-fara daa yɩ fɔgɩ kʋ cɔgɩ abam maama. 16 Amʋ na nɛ manlaa-taŋa kam kunkwǝǝnu tɩm wʋnɩ, kʋʋ́ pa a guli nɩ amʋ Baŋa-Wɛ goni ni dɩdaanɩ woŋo kʋlʋ dwi maama na ŋwɩ tɩn. Ni-gonim dɩm nan wʋ́ taa wʋra sɩ kʋ taa ve maŋa kalʋ na ba ti tɩn.»
17 Wɛ laan ma ta dɩ Nowe DƖ wɩ: «Manlaa-taŋa kam mʋ wʋ́ brɩ nɩ amʋ goni ni dɩ tɩga baŋa woŋo maama na ŋwɩ tɩn.»
Nowe biə bam taanɩ
18 Nowe biə bantʋ dɛɛn mʋ dɛ ba nuŋi naboro kʋm nɩ: Sem, dɩ Samɩ, dɩdaanɩ Zafɛtɩ. Samɩ dɛɛn yɩ Kanan ko mʋ. 19 Tɩga baŋa nabiinǝ maama dɛɛn zɩgɩ Nowe biə batɔ bantʋ yɩra nɩ mʋ ba laan jagɩ ba yi tɩga kam baŋa je maama nɩ.
20 Nowe dɛɛn yɩ valʋ mʋ. Wʋntʋ mʋ sɩŋɩ sɩ o jəri vinyə tweeru tɩlʋ biə na waɩ dɩvɛn ba kɩ tɩn. 21 Dɛ dɩdwɩ o ma li ba dɩvɛn bam o bugi. O na bugi tɩn, o ma tigi o vwe dɩm nɩ bwəri, kʋlʋkʋlʋ tǝri o yɩra nɩ. 22 Kanan ko Samɩ ma zʋ vwe dɩm wʋnɩ o na o ko wʋm na tigi da bwəri tɩn. O ma nuŋi pooni o ta o na nɛ kʋlʋ tɩn o brɩ o cʋrrʋ tɩle tɩm. 23 Sem dɩdaanɩ Zafɛtɩ ma kwe gwar-dɩdɔrɔ ba daŋɩ ba bakalɩ baŋa nɩ. Ba laan ma pipiri ba yibiyə ba yagɩ kwaga nɩ, ba vu ba zʋ vwe dɩm wʋnɩ. Ba ma kwǝli ba ko wʋm cavɩɩra yɩ ba wʋ sɛ sɩ ba nii o seeni.
24 Sana bam ma nuŋi Nowe yiǝ nɩ, yɩ o lwarɩ kʋlʋ o bu-balaŋa Samɩ na kɩ o yɩra nɩ tɩn. 25 O ma ta o wɩ:
«Amʋ sɔɔlɩ lwarɩm a yagɩ Kanan baŋa nɩ!
Wʋntʋ mʋ wʋ́ tiini o muri gambɛ maama wʋnɩ
sɩ o taa tʋŋa o paɩ o cʋrrʋ tɩm.»
26 O ta ma ta o wɩ,
«Baŋa-Wɛ dɩm na yɩ Semi Wɛ tɩn maŋɩ dɩ tiə mʋ!
Kanan maa wʋ́ taa yɩ Semi gambaa.
27 Wɛ nan wʋ́ pa Zafɛtɩ laŋa kam tiini ka yalɩ,
sɩ o dwi tiinə dɩdaanɩ Semi dwi tiinə taa zʋʋrɩ daanɩ.
Kanan wʋ́ taa yɩ o gambaa.»