Cɔgɩm dʋ-fara kam waarɩm
8
Wɛ dɛɛn nan wʋ swe Nowe dɩ vara bam dwi maama na tɔgɩ ba wʋ naboro kʋm wʋnɩ tɩn swiə. DƖ dɛɛn pɛ viu mʋ dʋlɩ, yɩ kʋntʋ ma pa na bam sɩŋɩ sɩ ba taa wɩa. 2 Na-fara kam daa ba taɩ ba nuŋǝ tɩga nɩ. Dʋa kam dɩ daa ba nɩ, Wɛ na cɩgɩ-ka tɩn ŋwaanɩ. 3 Na-fara kam kwe da bi dɩ fiinnu mʋ ka ma ka wɩ fɩnfɩɩn sɩ ka ba ka ti. 4 Canɩ sɩrpɛ cana kam wʋnɩ, ka da fugə-yarpɛ dɛ dɩm nɩ mʋ naboro kʋm yi Arara pweeru tɩm je sɩm nɩ yɩ kʋ cəŋi piu kʋm yuu nɩ. 5 Na bam dɛɛn ma sɩŋɩ sɩ ba taa tu tɩga. Kʋ nan yɩ canɩ fugə cana kam pulim dɛ nɩ mʋ pweeru tɩdonnǝ yum sɩŋɩ sɩ tɩ taa naɩ pooni yigə nɩ.6 Da fiinna na kɛ tɩn, Nowe ma pʋrɩ naboro kʋm takoro, 7 yɩ o daarɩ o yagɩ bacangaa sɩ kʋ nuŋi pooni yɩ kʋ joorə. Kʋ dɛɛn maa kaagɩ pooni nɩ kʋ beerǝ taan sɩ na bam ba ba wɩ. 8 O daa ma yagɩ kunkwǝŋǝ sɩ ka dɩ nuŋi ka beeri sɩ o lwarɩ na bam na wɩ tɩga kam baŋa nɩ te tɩn. 9 Kunkwǝŋǝ kam maa wʋ nɛ je sɩ ka jǝni da. Bɛŋwaanɩ, na bam dɛɛn ta su ba pɛɛlɩ mʋ je sɩm maama. Kunkwǝŋǝ kam ma joori Nowe tee nɩ naboro kʋm nɩ. O dɩ ma twɩ o jɩŋa o ja-ka sɩ ka zʋ da. 10 O dɛɛn daa ma pa da yarpɛ kɛ yɩ o yagɩ kunkwǝŋǝ kam sɩ ka nuŋi pooni. 11 Dɩdaan-ni maŋa na yi tɩn mʋ kunkwǝŋǝ kam joori Nowe tee nɩ dɩ ka ni Olivi tiu vɔ-lɛɔ. Nowe laan ma lwarɩ sɩ na bam wʋra ba wɩ mʋ. 12 Da yarpɛ daa na wǝli da tɩn, mʋ Nowe yagɩ kunkwǝŋǝ kam sɩ ka nuŋi. Ka dɩ na nuŋi kʋntʋ tɩn, ka daa wʋ joori o tee nɩ.
13 Nowe na yi bɩna biə-yardʋ dɩ dɩdwɩ (601) tɩn, mʋ na-fara kam ya na wʋ tɩga kam baŋa nɩ tɩn laan wɩ. Bɩnɩ dɩm pulim cana kam pulim dɛ dɩm nɩ mʋ kʋntʋ. O ma pʋrɩ woŋo kʋlʋ ba ya na mɛ ba kwǝli naboro kʋm tɩn. O ma nii o na sɩ tɩga kam laan wʋra ka kʋra mʋ. 14 Canɩ sɩle cana kam nɩ mʋ, tɩga kam baŋa laan yɔɔrɩ ka kʋ ga ka ti dɩdɩ. Kʋ maa yɩ cana kam da fiinle-yarpɛ dɛ dɩm nɩ mʋ kʋntʋ.
15 Wɛ laan ma ta dɩ Nowe DƖ wɩ: 16 «Ja n kaanɩ, dɩ n biə bam, dɩ ba kaana bam maama sɩ á nuŋi naboro kʋm wʋnɩ. 17 Nan ta pa vara bam dwi dwi, dɩ zunə bam dwi maama dɩdaanɩ tɩga wo-vəəlu dɩ wo-kʋrrʋ tɩm maama n wǝli da ba nuŋi. Wǝǝnu tɩm maama yɩ sɩ tɩ puli mʋ tɩ jagɩ tɩga kam maama baŋa nɩ.»
18 Nowe dɩ o kaanɩ, dɩ o bu-baara bam, dɩ ba kaana bam maama laan ma nuŋi ba yagɩ naboro kʋm. 19 Varɩm dwi maama, dɩ zunə bam dwi maama dɩdaanɩ tɩga wo-vəəlu dɩ wo-kʋrrʋ tɩm maama dɩ ma nuŋi. Ba dɛɛn tɔgɩ daanɩ ba nuŋi mʋ sɩ kʋ maŋɩ dɩ ba dwi dɩm na yɩ te tɩn.
20 Nowe ma lɔ bimbim sɩ o ma o kaanɩ Baŋa-Wɛ. O ma daarɩ o lɩ vara dɩdaanɩ zunə balʋ na maŋɩ dɩ kaanɩm tɩn dwi maama wʋnɩ dɩdʋa dɩdʋa. O laan zwɛ-tɩ o pa Baŋa-Wɛ. 21 Baŋa-Wɛ maa pi nɩ lwəm dɩlʋ na zaŋɩ dɩ diini wɛyuu tɩn ywəmmə lanyɩranɩ. DƖ ma ta DƖ tɩtɩ nɩ DƖ wɩ: «Amʋ daa bá cɔgɩ tɩga kam nabiinǝ tɩtʋŋa ŋwaanɩ. Nabiinǝ wʋbʋŋa dɩ ba kənə maama maŋɩ ya tɔgɩ lwarɩm yɩranɩ mʋ kʋ zɩgɩ ba biini nɩ. Dɩ kʋntʋ dɩ, amʋ nan daa bá cɔgɩ wǝǝnu tɩlʋ a na kɩ yɩ tɩ jɩgɩ ŋwɩa tɩn nɩnɛɛnɩ a na kɩ te tɩntʋ.
22 Tɩga baŋa na wʋ́ taa wʋra maŋa kalʋ maama nɩ tɩn,
Duuni maŋa dɩ faa maŋa wʋ́ taa wʋra.
Waarʋ dɩ fʋnyʋgʋ dɩ wʋ́ taa wʋra.
Yadɛ dɩdaanɩ tɩ-pwəŋə bá fɔgɩ tɩ ti.
Wɩa dɩ tɩtɩɩ dɩ bá fɔgɩ tɩ ti.»