Na-fara na di lʋgʋ baŋa maama te tɩn
7
Baŋa-Wɛ dɛɛn ma ta dɩ Nowe DƖ wɩ: «Ja n digə tiinə bam maama sɩ á zʋ naboro kʋm wʋnɩ, sɩ lʋgʋ baŋa nabiinǝ maama wʋnɩ, nmʋ yɩranɩ mʋ yɩ nɔn-ŋʋm. 2 Ja vara balʋ na maŋɩ dɩ kaanɩm tɩn dwi dɩm bale bale kuni barpɛ, yɩ ba yɩ wo-bɛ dɩ wo-kana n wǝli da sɩ á zʋ naboro kʋm wʋnɩ. Kʋ maa na yɩ vara balʋ na wʋ maŋɩ dɩ kaanɩm tɩn, sɩ n ta n jɩgɩ bantʋ dwi dɩm wo-bɛa dɩdʋa dɩ wo-kana dɩdʋa. 3 Daa n ta ja zunə bam dwi maama wo-bɛ dɩ wo-kana n ja n zʋ da. Ba dɩ maŋɩ sɩ ba taa yɩ bale bale kuni bɩrpɛ. Kʋntʋ mʋ wʋ́ pa woŋo maama dwi yɩ je tɩga baŋa nɩ. 4 Bɛŋwaanɩ, kʋ ta gɛ da yarpɛ mʋ sɩ amʋ tʋŋɩ dʋ-fara sɩ kʋ ba tɩga kam baŋa nɩ. Dʋa kam wʋ́ nɩ da fiinna mʋ, wɩa dɩdaanɩ tɩtɩ maama, sɩ na-fara ba ka coori woŋo kʋlʋ maama amʋ na kɩa yɩ kʋ ŋwɩ tɩn kʋ ja je.»5 Nowe ma kɩ kʋlʋ maama Baŋa-Wɛ na pɛ‑o ni sɩ o kɩ tɩn.
6 Nowe dɛɛn yɩ bɩna biə-yardʋ mʋ yɩ dʋ-fara kam ba tɩga kam baŋa nɩ. 7 Wʋntʋ dɩ o bu-baara, dɩ ba kaana, dɩ o kaanɩ wʋm maama ma da daanɩ ba zʋ naboro kʋm wʋnɩ, sɩ ba lu na-fara kalʋ na bɩɩnɩ tɩn. 8 Varɩm dwi maama, balʋ na maŋɩ dɩ kaanɩm tɩn, dɩ balʋ na wʋ maŋɩ dɩ kaanɩm tɩn, kʋ wǝli dɩ zunə dwi maama dɩ tɩga wo-vəəlu dɩ wo-kʋrrʋ mʋ 9 ma ba Noe te, yɩ o ma ja-ba o pa ba zʋ naboro kʋm wʋnɩ. Wǝǝnu tɩntʋ maama o na jaanɩ o zʋ da tɩn yɩ bale bale mʋ, wo-bɛ dɩ wo-kana nɩ Baŋa-Wɛ na tagɩ te tɩn. 10 Kʋntʋ kwaga nɩ, da yarpɛ na yi tɩn mʋ dʋ-fara puli sɩ ka taa nɩ tɩga kam baŋa nɩ.
11 Bɩnɩ dɩlʋ nɩ Nowe na yɩ bɩna biə-yardʋ (600) tɩn, kʋ canɩ sɩle cana kam da fugə-yarpɛ dɛ nɩ mʋ na taga ba nuŋi tɩga nɩ. Wɛyuu kʋm dɩ maa cuurə dɩ na-fara. 12 Dʋa kam maa nɩ kʋntʋ da fiinna, wɩa dɩ tɩtɩɩ maama yɩ ka ba kwǝrǝ. 13 Dɛ dɩm dʋa kam na sɩŋɩ nɩɩm tɩn, dɩntʋ dɛ dɩm mʋ Nowe dɩ o biə, Semi, dɩ Samɩ, dɩ Zafɛtɩ, kʋ wǝli dɩ ba kaana batɔ bam maama dɩ Nowe kaanɩ wʋm zʋ naboro kʋm wʋnɩ. 14 Vara dwi maama, ga-vara dwi dwi dɩdaanɩ sɔŋɔ vara bam dwi dwi kʋ ta wǝli dɩ zunə bam dwi dwi dɩdaanɩ tɩga wo-vəəlu dɩ wo-kʋrrʋ dwi maama dɩ dɛɛn maa tɔgɩ tɩ wʋra. 15 Woŋo kʋlʋ dwi maama na jɩgɩ ŋwɩa tɩn dɛɛn ma ba Nowe te yɩ tɩ zʋ naboro kʋm wʋnɩ, tɩle tɩle. 16 Vara dɩ wǝǝnu tɩlʋ dwi maama dɛɛn nan na zʋ naboro kʋm wʋnɩ tɩn dɛɛn yɩ wo-bɛ dɩ wo-kana mʋ, nɩnɛɛnɩ Wɛ na wɩ Nowe kɩ te tɩn. Baŋa-Wɛ dɛɛn ma pɩ-ba DƖ yagɩ da.
17 Da fiinna yam wʋnɩ, dʋa kam maa nɩ ka lo kʋntʋ mʋ taan, yɩ ka ba kwǝrǝ. Na-fara kam ma zaŋɩ wɛɛnɩ yɩ ka pa naboro kʋm puki kʋ dɔgɩ na bam baŋa nɩ. 18 Na bam laan ma tiini ba di baŋa ba gaalɩ, kʋ ma pa naboro kʋm dɔgɩ na bam baŋa nɩ kʋ veǝ. 19 Na bam dɛɛn ta na fɔgɩ ba diini baŋa baŋa tɩn, ba ma kwǝli piu kʋlʋ na dwara kʋ gaalɩ pweeru tɩm maama tɩn. 20 Na bam ta na fɔgɩ ba diini tɩn, kʋ pɛ pweeru tɩm baŋa kwǝli dɩ na, yɩ na bam baŋa dɩdwarɩm laŋa maŋɩ dɩ kantɩa yi maŋɩm kuni fugə-bɩnu mʋ. 21 Kʋlʋkʋlʋ dɛɛn daa maa wʋ daarɩ lʋgʋ kʋm baŋa nɩ. Nabiinǝ dɩ vara maama, dɩ zunə maama, dɩ tɩga wo-vəəlu kʋ wǝli dɩ wo-kʋrrʋ maama ma tɩ. 22 Woŋo kʋlʋ maama na wʋ tɩga kam baŋa nɩ yɩ kʋ sin tɩn dɛɛn ma tɩ. 23 Baŋa-Wɛ dɛɛn pɛ woŋo kʋlʋ dwi maama na ŋwɩ tɩn mʋ yagɩ tɩga baŋa nɩ, nabiinǝ dɩ vara dɩ tɩga wo-vəəlu dɩ wo-kʋrrʋ kʋ ta wǝli dɩ zunə balʋ na kaagɩ ba jaanɩ wɛyuu nɩ tɩn dɩ. Nowe yɩranɩ dɛɛn mʋ daarɩ, o dɩ balʋ maama na tɔgɩ ba wʋ naboro kʋm wʋnɩ tɩn.
24 Na bam ma pɛɛlɩ tɩga kam maama kʋ maŋɩ dɩ da bi dɩ fiinnu (150).