Nabiinǝ dɛɛn na tiini ba cɔgɩ te tɩn
6
Kʋ dɛɛn maa wʋra kʋ wʋra yɩ nabiinǝ puli ba su lʋgʋ kʋm je maama yɩ ba lʋ bukwa. 2 Wɛyuu nɔɔn-dʋnnʋ ma tu tɩga baŋa ba na nabiinǝ bukwa bam na tiini ba lamma te. Ba ma di ba wʋnɩ ba ma ba ji ba kaana. 3 Baŋa-Wɛ maa wɩ: «Amʋ daa bá yagɩ a Joro kʋlʋ na paɩ ŋwɩa tɩn taa wʋ nɔɔna balʋ na maŋɩ sɩ ba tɩ tɩn wʋnɩ sɩ kʋ taa ve maŋa maama. Ba ŋwɩa daa bá dwǝni bɩna bi dɩ fiinle (120).»4 Maŋa kam kʋntʋ nɩ dɩ ka kwaga nɩ, wɛyuu nɔɔna bam dɩdaanɩ nabiinǝ bukwa bam dɛɛn na lagɩ daanɩ yɩ ba lʋ biə tɩn, nɔɔn-dʋdwaarʋ maa wʋ lʋgʋ baŋa nɩ.a Bantʋ yɩ babɛ mʋ yɩ ba tiini ba na yɩrɩ faŋa faŋa.
5 Baŋa-Wɛ dɛɛn ma maanɩ nɩ nabiinǝ tiini ba jɩgɩ pu-sɩŋa, yɩ ba wʋbʋŋa dɩ ba kənə maama tɔgɩ lwarɩm yɩranɩ mʋ. 6 Baŋa-Wɛ wʋ ma tiini kʋ cɔgɩ dɩdaanɩ DƖ na maŋɩ DƖ kɩ nabiinǝ DƖ yagɩ tɩga baŋa nɩ tɩn. Kʋ ma daanɩ‑DƖ zanzan kʋ ŋwaanɩ. 7 DƖ laan ma bʋŋɩ DƖ wɩ: «Amʋ wʋ́ sɩɩnɩ a cɔgɩ woŋo kʋlʋ maama a na kɩ yɩ tɩ ŋwɩ tɩn. Kʋ na yɩ nabiinǝ dɩ vara dwi dɩlʋ maama, dɩdaanɩ tɩga wo-vəəlu dɩ wo-kʋrrʋ dwi maama, kʋ ta wǝli dɩ zunə bam dwi maama mʋ, a lagɩ a saarɩ-tɩ a yagɩ lʋgʋ baŋa nɩ, amʋ wʋʋ na cɔgɩ dɩdaanɩ a na maŋɩ a kɩ-tɩ tɩn ŋwaanɩ.»
8 Sɩ kʋ na yɩ Nowe, Baŋa-Wɛ yi dɛɛn su wʋntʋ kikiə yam.
Nowe dɩ o sɔŋɔ tiinə ŋwɩan na tɔgɩ te tɩn
9 Nowe dɩdaanɩ o dwi dɩm taanɩ mʋ tɩntʋ.
Nɔɔna balʋ dɛɛn na ŋwɩ tɩn tɩtarɩ nɩ, Nowe yɩranɩ maa yɩ nɔn-ŋʋm yɩ o ba jɩgɩ kəm-balwaarʋ. O maa tiini o mɩ dɩ Wɛ. 10 O dɛɛn jɩgɩ bu-baara batɔ: Sem, dɩ Samɩ, dɩdaanɩ Zafɛtɩ.
11 Lʋgʋ baŋa nabiinǝ maama dɛɛn pɔgɩ mʋ Wɛ yigə nɩ, yɩ ba kənə yɩ vuvugə yɩranɩ. 12 Wɛ ma na nɩ nabiinǝ yɔɔrɩ ba kɩ lwarɩm mʋ, yɩ ba ba tɔgɩ cwǝŋǝ dɩ fɩnfɩɩn tɩtɩ dɩ. 13 DƖ ma ta dɩ Nowe DƖ wɩ: «Amʋ wʋbʋŋa jaanɩ sɩ a cɔgɩ nabiinǝ bam mʋ. Kʋ yɩ bantʋ ŋwaanɩ mʋ lʋgʋ kʋm maama su dɩ vuvugə yɩranɩ. Amʋ wʋ́ yɔɔrɩ a cɔgɩ-ba kʋ wǝli dɩ lʋgʋ kʋm wǝǝnu maama. 14 Kʋntʋ tɩn, beeri da-ŋʋnnʋ n ma n kɩ daka kamunu sɩ ka taa nyɩ dɩ naboro. Nan kɩ-ka sɩ ka taa jɩgɩ di zanzan ka wʋnɩ, yɩ n laan daarɩ n kwe woŋo kʋlʋ na bá pa na zʋ ka wʋnɩ tɩn n ma n taagɩ ka wʋʋ kʋm dɩdaanɩ ka kwaga kam maama. 15 Nmʋ nan na lagɩ n kɩ-ka sɩ n pa ka taa yɩ tɩntʋ: Ka dɩdwarɩm wʋ́ taa yɩ kantɩa yi biə-yatɔ (300) mʋ. Ka sɔŋɔ yalɩm maa wʋ́ taa yɩ kantɩa yi fiinnu (50), yɩ ka baŋa laan maa wʋ́ taa yɩ kantɩa yi fiintɔ (30). 16 Kɩ ka ni-pugu nɩ tasugu doŋ nɩ tɛ n ta n ma n pu-ka. Yagɩ kantɩa yi daka kam baŋa nɩ sɩ n laan dogli ni-pugu kʋm sɩ kʋ ta pa pooni. N laan wʋ́ daarɩ n pʋrɩ ka ni ka sapaŋa nɩ. Nń kɩ daka kam sɩ ka ta yɩ di sɩtɔ mʋ daŋɩ da-baŋa nɩ: Tɩga kuri digə, tɩtarɩ digə, dɩ baŋa digə. 17 Bɛŋwaanɩ, amʋ lagɩ a pa na-fara mʋ ba ba pɛɛlɩ tɩga kam maama ba cɔgɩ woŋo kʋlʋ maama na jɩgɩ ŋwɩa tɩn. Kʋlʋkʋlʋ daa ba lagɩ kʋ daarɩ. 18 Sɩ kʋ na yɩ nmʋ, amʋ lagɩ a goni ni dɩ nmʋ: nmʋ tɩtɩ, dɩ n bu-baara bam, dɩ ba kaana bam, dɩ nmʋ kaanɩ, abam maama wʋ́ zʋ daka kam wʋnɩ sɩ ka taa yɩ naboro ka pa abam. 19 Nmʋ maŋɩ sɩ n ja woŋo kʋlʋ maama na ŋwɩ tɩn dwi maama wʋnɩ bale bale mʋ n ja n zʋ naboro kʋm wʋ, woŋo maama wo-bɛa dɩdaanɩ wo-kana. Kʋntʋ mʋ wʋ́ pa tɩ dwi dɩm taa ŋwɩ. 20 Zunə maama dɩ ba dwi, vara bam dɩ maama dɩ ba dɩ dwi, dɩdaanɩ tɩga wo-vəəlu dɩ wo-kʋrrʋ dwi maama, tɩntʋ maama mʋ wʋ́ ba nmʋ te naboro kʋm wʋnɩ, sɩ ba dwi dɩm yɩ je. 21 Nan lagɩ wʋdiu dwi maama n la n kɩ naboro kʋm wʋnɩ, sɩ balʋ maama na wʋ́ zʋ tɩn taa di, nabiinǝ dɩdaanɩ vara maama.»
22 Nowe dɛɛn ma sɩɩnɩ o kɩ kʋntʋ nɔɔ. O ma kɩ kʋlʋ maama Wɛ na pɛ‑o ni sɩ o kɩ tɩn.b