Kʋ na puli dɩ Adam sɩ kʋ vu kʋ yi Nowe
5
Adam dwi dɩm na dɛ tɩte maama tɩn mʋ tɩntʋ.Wɛ dɛɛn na kɩ nabiinǝ dɛ dɩlʋ nɩ tɩn, DƖ dɛɛn kɩ-ba sɩ ba taa nyɩ dɩ DƖ tɩtɩ mʋ. 2 DƖ dɛɛn ma kɩ-ba sɩ ba taa yɩ baarʋ dɩ kaanɩ. DƖ ma kɩ ba yu-yoŋo, yɩ o daarɩ DƖ jɩgɩ-ba DƖ bǝi DƖ wɩ: ‹nabiinǝ›. 3 Adam dɛɛn na yi bɩna bi dɩdaanɩ fiintɔ (130) tɩn mʋ o lʋgɩ bu wʋlʋ na nyɩ dɩ wʋntʋ tɩtɩ fasɩ. O ma bəŋi bu wʋm yɩrɩ o wɩ: ‹Sɛtɩ›. 4 Sɛtɩ lʋra kam kwaga nɩ, Adam dɛɛn daa ta ma na bɩna biə-nana (800). O dɛɛn ma lʋ biə badonnǝ o wǝli da, bəkəri dɩdaanɩ bɩsankam. 5 Adam bɩna yam maama na kɩ daanɩ, ya yɩ bɩna biə-nʋgʋ dɩdaanɩ fiintɔ (930) mʋ, yɩ o laan tɩ.
6 Sɛtɩ na yi bɩna bi dɩ yanu (105) tɩn mʋ o lʋgɩ Enɔsɩ. 7 Enɔsɩ lʋra kam kwaga nɩ, Sɛtɩ daa ta ma na bɩna biə-nana dɩ yarpɛ (807). O dɛɛn ma lʋ biə badonnǝ o wǝli da, bəkəri dɩdaanɩ bɩsankam. 8 Sɛtɩ bɩna yam maama na kɩ daanɩ, ya yɩ bɩna biə-nʋgʋ dɩ fugə-yale (912) mʋ, yɩ o laan tɩ.
9 Enɔsɩ na yi bɩna funʋgʋ (90) tɩn mʋ o lʋgɩ Kenan. 10 Kenan lʋra kam kwaga nɩ, Enɔsɩ daa ta ma na bɩna biə-nana dɩ fugə-yanu (815). O dɛɛn ma lʋ biə badonnǝ o wǝli da, bəkəri dɩdaanɩ bɩsankam. 11 Enɔsɩ bɩna yam maama dɛɛn na kɩ daanɩ, ya yɩ bɩna biə-nʋgʋ dɩdaanɩ yanu (905) mʋ, yɩ o laan tɩ.
12 Kenan dɛɛn na yi bɩna fusɩrpɛ (70) tɩn mʋ o lʋgɩ Mahalaleyɛlɩ. 13 Mahalaleyɛlɩ lʋra kam kwaga nɩ, Kenan daa ta ma na bɩna biə-nana dɩ fiinna (840). O dɛɛn ma lʋ biə badonnǝ o wǝli da, bəkəri dɩdaanɩ bɩsankam. 14 Kenan bɩna yam maama dɛɛn na kɩ daanɩ, ya yɩ bɩna biə-nʋgʋ dɩ fugə (910) mʋ, yɩ o laan tɩ.
15 Mahalaleyɛlɩ dɛɛn na yi bɩna fusɩrdʋ-yanu (65) tɩn mʋ o lʋgɩ Yerɛdɩ. 16 Yerɛdɩ lʋra kam kwaga nɩ, Mahalaleyɛlɩ daa ta ma na bɩna biə-nana dɩ fiintɔ (830). O dɛɛn ta ma lʋ biə badonnǝ o wǝli da, bəkəri dɩdaanɩ bɩsankam. 17 Mahalaleyɛlɩ bɩna yam maama dɛɛn na kɩ daanɩ, ya yɩ bɩna biə-nana dɩ funʋgʋ-yanu (895) mʋ, yɩ o laan tɩ.
18 Yerɛdɩ na yi bɩna bi dɩdaanɩ fusɩrdʋ-yale (162) tɩn mʋ o lʋgɩ Henɔkɩ. 19 Henɔkɩ lʋra kam kwaga nɩ, Yerɛdɩ daa ta ma na bɩna biə-nana. O dɛɛn ta ma lʋ biə badonnǝ o wǝli da, bəkəri dɩdaanɩ bɩsankam. 20 Yerɛdɩ bɩna yam maama dɛɛn na kɩ daanɩ, ya yɩ bɩna biə-nʋgʋ dɩ fusɩrdʋ-yale (962) mʋ, yɩ o laan tɩ.
21 Henɔkɩ dɛɛn na yi bɩna fusɩrdʋ-yanu (65) tɩn mʋ o lʋgɩ Metushela. 22 Metushela lʋra kam kwaga nɩ, Henɔkɩ daa ta ma na bɩna biə-yatɔ (300). O ma tiini o mɩ dɩdaanɩ Baŋa-Wɛ. O dɛɛn ta ma lʋ biə badonnǝ o wǝli da, bəkəri dɩdaanɩ bɩsankam. 23 Henɔkɩ bɩna yam maama dɛɛn na kɩ daanɩ, ya yɩ bɩna biə-yatɔ dɩ fusɩrdʋ-yanu (365) mʋ. 24 Henɔkɩ dɩ Wɛ na ve daanɩ tɩn, o dɛɛn ma ba o tǝrǝ, bɛŋwaanɩ Wɛ dɛɛn mʋ kwe‑o DƖ pa o din DƖ te.a
25 Metushela na yi bɩna bi dɩ funɔnɔ-yarpɛ (187) tɩn mʋ o lʋgɩ Lemɛkɩ. 26 Lemɛkɩ lʋra kam kwaga nɩ, Metushela daa ta ma na bɩna biə yarpɛ dɩdaanɩ funɔnɔ-yale (782). O dɛɛn ta ma lʋ biə badonnǝ o wǝli da, bəkəri dɩdaanɩ bɩsankam. 27 Metushela bɩna yam maama dɛɛn na kɩ daanɩ, ya yɩ bɩna biə-nʋgʋ dɩdaanɩ fusɩrdʋ-nʋgʋ (969) mʋ, yɩ o laan tɩ.
28 Lemɛkɩ dɛɛn na yi bɩna bi dɩdaanɩ funɔnɔ-yale (182) tɩn mʋ o lʋgɩ bu. 29 O ma ta o wɩ: «Baŋa-Wɛ na sɔɔlɩ lwarɩm DƖ yagɩ tɩga kam baŋa nɩ tɩn, ka tɩtʋŋa tiini ya damma mʋ ya pa dɩbam sɩ dɩ́ yɔɔrɩ dɩ́ yaara. Wʋntʋ nan mʋ lagɩ o pa dɩbam bɩcarɩ zuri.» Kʋntʋ ŋwaanɩ mʋ o pɛ bu wʋm yɩrɩ o wɩ: ‹Nowe›.b 30 Nowe lʋra kam kwaga nɩ, Lemɛkɩ daa ta ma na bɩna biə-yanu dɩ funʋgʋ-yanu (595). O dɛɛn ta ma lʋ biə badonnǝ o wǝli da, bəkəri dɩdaanɩ bɩsankam. 31 Lemɛkɩ bɩna yam maama dɛɛn na kɩ daanɩ, ya yɩ bɩna biə yarpɛ dɩ fusɩrpɛ-yarpɛ (777) mʋ, yɩ o laan tɩ.
32 Nowe dɛɛn na yi bɩna biə-yanu tɩn mʋ o lʋgɩ bu-baara batɔ yɩ o pa ba yɩra o wɩ Sem, dɩ Samɩ, dɩdaanɩ Zafɛtɩ.