Kayin dɩ Abɛlɩ
4
Adam dɛɛn ma pəni dɩ o kaanɩ Awa. O ma ja pugə o lʋ bəkərə. O ma pa o yɩrɩ nɩ ‹Kayin›, yɩ o wɩ: «Kʋ yɩ Baŋa-Wɛ zǝnǝ ŋwaanɩ mʋ a lʋgɩ bəkərə.» 2 Awa daa ta ma ba o lʋ Kayin nyaanɩ Abɛlɩ o wǝli da. Ba na kɩ nɔɔna tɩn, Abɛlɩ dɛɛn ma ba o ji nayɩrʋ, yɩ Kayin maa yɩ valʋ. 3 Kʋ maa wʋra kʋ wʋra. Kayin ma twǝri tɩga kam wo-vallʋ tɩm wʋnɩ o ma kɩ pɛɛrɩ o pa Baŋa-Wɛ. 4 Abɛlɩ dɩ ma lɩ o varɩ-mwa bam wʋnɩ dayigə biə na nugə tɩn o gʋ o ma kɩ pɛɛrɩ o pa Baŋa-Wɛ. Abɛlɩ dɩ o pɛɛrɩ dɩm maama ma su Baŋa-Wɛ yi.a 5 Sɩ kʋ na yɩ Kayin, Wɛ dɛɛn vɩ-o mʋ, o dɩ o pɛɛrɩ dɩm maama. Kayin bam ma tiini dɩ zaŋɩ yɩ o yigə nywanɩ lanyɩranɩ. 6 Baŋa-Wɛ ma bwe Kayin DƖ wɩ: «Bɛɛ mʋ yɩ nmʋ pa n bam zaŋɩ kʋntʋ? Bɛŋwaanɩ mʋ nmʋ yigə nywanɩ? 7 Nmʋ na kɩ lanyɩranɩ, nmʋ yuu wʋ́ zǝŋi wɛɛnɩ; nmʋ nan daa na wʋ kɩ lanyɩranɩ, ta n ye nɩ lwarɩm vwɛ n digə ni dɩm nɩ yɩ dɩ lagɩ dɩ ja‑m nɩ ga-varɩm te. Nmʋ nan maŋɩ sɩ n kwaanɩ n wanɩ-dɩ mʋ.»8 Dɛ dɩdwɩ Kayin ma ta dɩ o nyaanɩ Abɛlɩ o wɩ, ba tɔgɩ daanɩ ba vu gaa wʋ. Ba na yi da tɩn, Kayin ma zi o nyaanɩ Abɛlɩ o magɩ o gʋ.b
9 Baŋa-Wɛ laan ma bwe Kayin DƖ wɩ: «Sɩ nmʋ nyaanɩ Abɛlɩ bɛɛ?» O ma ləri o wɩ: «Amʋ yǝri o je. Kʋ yɩ amʋ tɩtʋŋɩ mʋ sɩ a taa yɩrɩ a nyaanɩ wʋm na?» 10 Baŋa-Wɛ laan ma ta DƖ wɩ: «Nmʋ kɩ bɛ lɛɛrʋ mʋ tɩntʋ? Nii! Nmʋ nyaanɩ wʋm jana bam wʋ tɩga kam nɩ mʋ ba keeri ba loori sɩ a mɔ tɩtʋŋ-balɔrɔ kʋm jɩnɩ dɩm. 11 Kʋntʋ tɩn, kampwəl-balwara laan nan wʋ nmʋ baŋa nɩ ka pa tɩga kam vɩ‑m. Bɛŋwaanɩ, nmʋ na gʋ n nyaanɩ wʋm tɩn, tɩga kam kəŋi ka ni mʋ ka joŋi o jana bam ka li. 12 Tɩga kam daa bá kɩ wʋdiu ka pa‑m, dɩ nmʋ na maŋɩ n va tɩte. Nń ta n kaagɩ n beeri tɩga kam maama nɩ, yɩ n bá na jǝŋǝ je.»
13 Kayin ma ta dɩ Baŋa-Wɛ o wɩ: «Nmʋ na pɛ amʋ cam dɩlʋ tɩn tiini dɩ daga dɩ dwe amʋ jam. 14 Nmʋ lagɩ n zəli amʋ tɩga kantʋ baŋa nɩ, sɩ a daarɩ a pwɛ nmʋ tee nɩ. Amʋ maŋɩ sɩ a taa kaagɩ a beeri tɩga kam nɩ mʋ, yɩ a bá na jǝŋǝ je. Wʋlʋ maama na jeeri-nɩ, kʋ tu bá gʋ-nɩ mʋ na?» 15 Baŋa-Wɛ ma ləri DƖ wɩ: «Kʋ bá taa yɩ kʋntʋ. Wʋlʋ maama na wʋ́ gʋ nmʋ Kayin, aá ŋwɩ jɩnɩ dɩm kʋntʋ kuni bɩrpɛ mʋ kʋ tu dwi dɩm baŋa nɩ.»
Baŋa-Wɛ laan ma kɩ nyɩnyʋgʋ Kayin yɩra nɩ, sɩ kʋ cɩ nɔɔnʋ wʋlʋ maama na wʋ́ jeer-o tɩn, sɩ kʋ tu yɩ zaŋɩ o gʋ-o. 16 Kayin dɛɛn ma zaŋɩ o viiri Baŋa-Wɛ tee nɩ. O ma vu o kaagɩ o zʋʋrɩ Nod laŋa kam nɩ. Je sɩm kʋntʋ wʋ Edɛn kara kam wa-puli seeni mʋ.
Kayin dwi dɩm taanɩ
17 Kayin ma pəni dɩ o kaanɩ yɩ o ja pugə o lʋ bəkərə, ka yɩrɩ mʋ Henɔkɩ. O ma daarɩ o puli tɩʋ kamunu kuri yɩ o ma o bu Henɔkɩ yɩrɩ dɩm o ma bəŋi tɩʋ kʋm yɩrɩ.
18 Henɔkɩ dɛɛn ma lʋ Iradɩ, yɩ Iradɩ dɛɛn ma ji Mewuzayɛlɩ ko.
Mewuzayɛlɩ dɩ dɛɛn ma lʋ Metusayɛlɩ. Metusayɛlɩ wʋm dɩ dɛɛn ma lʋ Lemɛkɩ.
19 Lemɛkɩ dɛɛn ma di kaana bale. Ka-kwɩa kam yɩrɩ mʋ Ada, wʋdoŋ wʋm yɩrɩ maa yɩ Tisila. 20 Ada dɛɛn ma ba o lʋ Yabalɩ. Kʋ na yɩ balʋ na kaagɩ ba beerǝ yɩ ba zʋʋrɩ vwə wʋnɩ ba kɔnɩ vara tɩn, Yabalɩ maa yɩ ba nabaarʋ. 21 O nyaanɩ wʋm yɩrɩ dɛɛn maa yɩ Yubalɩ. Wʋntʋ dɩ dɛɛn mʋ yɩ kɔn-magɩna dɩ dɩ gɩgan-kərə bam dɩdaanɩ namun-wurə dwi maama nabaarʋ. 22 Tisila dɛɛn ma lʋ Tubal-Kayin. Wʋntʋ maa yɩ luru, yɩ o puli sɩ o taa maɩ luuru dɩdaanɩ canna o ma kɩ wǝǝnu dwi dwi. Tubal-Kayin dɛɛn maa jɩgɩ nakɔ, o yɩrɩ na yɩ Naama.
23 Lemɛkɩ dɛɛn ma zaŋɩ o ta dɩ o kaana bam o wɩ,
«Ada dɩ Tisila,
cəgi-na amʋ kwǝrǝ!
A kaana bam,
cəgi-na a taanɩ dɩm!
Wʋlʋ maama na kɩɩ amʋ zʋnnɩ, asawɛ o fwəli a yɩra,
Aá gʋ kʋ tu, o zɩ yɩ baarʋ, o nan daa zɩ yɩ nɔɔn-dʋŋʋ dɩ.
Aá gʋ baarʋ mʋ a yɩra zʋnnɩ ŋwaanɩ,
Aá gʋ bu-dʋŋʋ a yɩra fwəlimim ŋwaanɩ.
24 Nɔɔnʋ na gʋ Kayin,
kʋ tu wʋ́ joori o ŋwɩ jɩnɩ dɩm kuni bɩrpɛ.
Nɔɔnʋ nan na gʋ amʋ,
kʋ tu wʋ́ joori o ŋwɩ kuni fusɩrpɛ-bɩrpɛ mʋ!»
Sɛtɩ dɩdaanɩ Enɔsɩ taanɩ