Lwarɩm pulim
3
Ga-vara balʋ maama Yuutu Baŋa-Wɛ dɛɛn na mɔɔnɩ tɩn, wʋlʋ na jɩgɩ swan o dwe ba maama tɩn yɩ bɩsankwɩa mʋ. Dɛ dɩdwɩ ka ma zaŋɩ ka bwe kaanɩ wʋm ka wɩ: «Wɛ sɩɩnɩ DƖ ta dɩ abam nɩ á yɩ zaŋɩ á di tweeru biə balʋ maama na wʋ tweeru kara kam wʋnɩ tɩn na? Kʋ yɩ cɩga na?» 2 Kaanɩ wʋm ma ləri o wɩ: «Awo. Dɩ́ jɩgɩ cwǝŋǝ sɩ dɩ́ di tweeru tɩlʋ maama biə na wʋ kara kam wʋnɩ tɩn. 3 Kʋ daarɩ, kʋ na yɩ tiu kʋlʋ na zɩgɩ kara kam tɩtarɩ nɩ tɩn yɩranɩ, Wɛ tagɩ DƖ wɩ, dɩ́ yɩ zaŋɩ dɩ́ di kʋ biə naa dɩ́ dwe-kʋ dɩ. Dɩ́ na kɩ kʋntʋ, dɩ́ wʋ́ tɩ mʋ.» 4 Bɩsankwɩa kam ma ləri ka wɩ: «Awo, abam bá sɩɩnɩ á tɩ! 5 Cɩga tɩn, Wɛ pɛ abam ni kʋntʋ doŋ bɛŋwaanɩ DƖ ye nɩ, abam na di tiu kʋm kʋntʋ biə bam dɩdʋa, á wʋrʋ wʋ́ pʋʋrɩ dɛ dɩm kʋntʋ nɩ kʋ pa á taá nyɩ dɩ Wɛ tɩtɩ yɩ á ye lanyɩranɩ dɩ lwarɩm pɔɔrɩm daanɩ.»6 Kaanɩ wʋm ma na nɩ tiu kʋm lamma o yi nɩ, yɩ o ta na nɩ kʋ biə wʋ́ taa ywəmmə sɩ nɔɔnʋ di-ba. O fra ma zʋ tweeru biə bam sɩ o wanɩ o ja yi-pʋrʋ ba ŋwaanɩ. O na bʋŋɩ kʋntʋ tɩn, o ma gwəri tiu kʋm bu o di. O ma daarɩ o pa o barʋ wʋm na wʋ o tikəri nɩ tɩn yɩ o dɩ di. 7 Ba yiǝ naan sɩɩnɩ ya pʋʋrɩ, yɩ ba lwarɩ nɩ ba zɩgɩ da kalambolo. Ba ma goni kapʋrʋ vɔɔrʋ ba panɩ-tɩ ba liŋi sɩ ba ma kwǝli ba cavɩɩra.
8 Wa-zʋʋrɩ maŋa nɩ, Baŋa-Wɛ maa kaagɩ tweeru kara kam wʋnɩ DƖ veǝ. Baarʋ wʋm dɩ o kaanɩ wʋm ma ni kʋ na dwanɩ tɩn yɩ ba səgi ba tɩtɩ tweeru tɩm tɩtarɩ nɩ sɩ Wɛ yɩ zaŋɩ DƖ na-ba. 9 Yuutu Baŋa-Wɛ ma bəŋi baarʋ wʋm DƖ wɩ: «Nmʋ wʋ yən mʋ?» 10 O ma ləri o wɩ: «A ni nmʋ dwanɩm mʋ tweeru kara kam nɩ yɩ fʋʋnɩ jɩgɩ-nɩ dɩ a na zɩgɩ da kalambolo tɩn ŋwaanɩ. Kʋntʋ mʋ pɛ a duri a səgi.» 11 Baŋa-Wɛ ma bwe‑o DƖ wɩ: «Nmʋ kɩ ta mʋ n lwarɩ nɩ n yɩ kalambolo mʋ? Wɔɔ mʋ tagɩ kʋntʋ o brɩ-m? Nmʋ ga n di tiu kʋlʋ biə amʋ na wɩ n ba jɩgɩ cwǝŋǝ sɩ n di-ba tɩn mʋ na?» 12 Baarʋ wʋm ma ləri o wɩ: «Kʋ yɩ kaanɩ wʋlʋ wʋm nmʋ na yag-o amʋ tee nɩ tɩn mʋ pɛ-nɩ tiu kʋm bu yɩ a di.»
13 Yuutu Baŋa-Wɛ ma bwe kaanɩ wʋm DƖ wɩ: «Bɛɛ mʋ yɩ nmʋ kɩ kʋntʋ?» Kaanɩ wʋm ma ləri o wɩ: «Bɩsankwɩa kam mʋ ganɩ amʋ ka pa a gwəri tiu kʋm biə a di.»
14 Yuutu Baŋa-Wɛ laan ma ta dɩ bɩsankwɩa kam DƖ wɩ:
«Nmʋ na kɩ kʋntʋ tɩn ŋwaanɩ, a lɩ nmʋ vara maama wʋnɩ yɩ a sɔɔlɩ lwarɩm a yagɩ nmʋ baŋa nɩ. Nmʋ laan wʋ́ ta n fɛɛlɩ n pugə baŋa nɩ yɩ tɩɩrʋ mʋ wʋ́ taa yɩ nmʋ ni-wʋdiu maŋa maama, sɩ n ba n tɩ. 15 Aá pa nmʋ dɩ kaanɩ wʋm taa dʋnɩ daanɩ. Wʋntʋ dwi dɩm dɩdaanɩ nmʋ dwi dɩm wʋ́ taa culi daanɩ. Wʋntʋ dwi dɩm wʋ́ pʋpʋgɩ n yuu yɩ nmʋ dɩ wʋ́ dʋnɩ o dwi dɩm dɩ nakilə.»
16 Baŋa-Wɛ ma daarɩ DƖ ta dɩ kaanɩ wʋm DƖ wɩ: «Kʋ na yɩ nmʋ, amʋ wʋ́ pa n cam dɩm puli pu-jarɩ baŋa nɩ. Nń tiini n yaarɩ mʋ bu-lʋrɩ wʋnɩ. Nmʋ fra wʋ́ taa wʋ nmʋ barʋ wʋm wʋnɩ yɩ wʋntʋ nan wʋ́ taa te‑m.»
17 DƖ ma ta dɩ baarʋ wʋm DƖ wɩ: «Nmʋ na sɛ n kaanɩ wʋm ni yɩ n dɩ di tiu kʋlʋ biə a na wɩ n yɩ zaŋɩ n di-ba tɩn ŋwaanɩ, amʋ wʋ́ sɔɔlɩ lwarɩm a yagɩ tɩga kam baŋa nɩ nmʋ ŋwaanɩ. Nmʋ ŋwɩa maama wʋnɩ, nmʋ wʋ́ yaarɩ kʋ cɛ dɩ tɩga kam varɩm mʋ, sɩ n laan ba n na n ni-wʋdiu. 18 Sabarɩ dɩ zɔŋɔ dwi dwi wʋ́ nuŋi tɩga kam baŋa nɩ tɩ daanɩ‑m. Nń va kara sɩ n ma n na n ni-wʋdiu. 19 Nmʋ maŋɩ sɩ n cɛ dɩ tɩtʋŋa mʋ, yɩ n yuu luluŋu wʋ́ nuŋi sɩ n na n ni-wʋdiu. Kʋʋ́ kɩ-m kʋntʋ mʋ taan, sɩ n laan ba n tɩ n joori tɩɩrʋ tɩm wʋnɩ. Tɩɩrʋ mʋ ba mɛ ba kɩ-m, yɩ n laan ma n wʋ́ joori n ji tɩɩrʋ.»
20 Adama ma bəŋi o kaanɩ wʋm yɩrɩ o wɩ: ‹Awa›,b bɛŋwaanɩ wʋntʋ dɛɛn mʋ yɩ nabiinǝ maama nu. 21 Baŋa-Wɛ dɛɛn ma kwe vara tankwaalʋ DƖ pa Adam dɩ o kaanɩ sɩ ba ma kwǝli ba tɩtɩ.
22 Yuutu Baŋa-Wɛ laan ma ta DƖ tɩtɩ nɩ DƖ wɩ: «Nabiinu wʋm dɩdaanɩ dɩbam laan yɩ bɩdwɩ dɩ o na tu o lwarɩ lanyɩranɩ dɩ lwarɩm o pɔɔrɩ daanɩ tɩn. Kʋntʋ tɩn, kʋ maŋɩ sɩ dɩ́ cɩ-o dɩ tiu kʋlʋ na paɩ nɔɔna ŋwɩa tɩn sɩ o yɩ gwəri kʋ biə o di. Bɛŋwaanɩ, o na di bantʋ o wǝli da, o lagɩ o taa ŋwɩ mʋ maŋa maama.» 23 Kʋ dɛɛn ma pa Baŋa-Wɛ lɩ-o Edɛn tweeru kara kam wʋnɩ. DƖ ma zǝl-o sɩ o nuŋi o vu o taa varɩ tɩga kam. Kʋ yɩ tɩga kam wʋʋ tɩɩrʋ mʋ Wɛ dɛɛn mɛ DƖ naanɩ nabiinu wʋm. 24 Baŋa-Wɛ na zǝl-o DƖ pa o nuŋi tɩn, DƖ ma pa malɛsɩ sɩdonnǝ na yɩ Serubɛn tɩn zɩgɩ Edɛn tweeru kara kam wa-puli seeni. Ba ma jɩgɩ sʋ-lɔŋɔ kʋ na jɩgɩ mim yɩ kʋ pipirǝ kʋ fʋra je maama nɩ tɩn. Tɩntʋ maama dɛɛn cɩgɩ tiu kʋlʋ biə na paɩ nɔɔna ŋwɩa tɩn, sɩ nɔɔn-nɔɔnʋ daa yɩ wanɩ o twɛ da.