2
Wɛ dɛɛn dɛ cwǝŋǝ kantʋ mʋ DƖ naanɩ wɛyuu dɩ tɩga baŋa dɩdaanɩ kʋlʋ maama na wʋ tɩ wʋnɩ tɩn DƖ ba DƖ ti maama.2 Da yarpɛ dɛ dɩm na yi tɩn, dɩdaanɩ Wɛ maŋɩ DƖ ti tɩtʋŋa yalʋ maama DƖ dɛɛn na jɩgɩ DƖ kɩ tɩn. Da yarpɛ dɛ dɩm nɩ, DƖ laan ma jǝni DƖ sin DƖ tɩtʋŋa yam maama wʋnɩ. 3 Wɛ ma kɩ yu-yoŋo DƖ yagɩ da yarpɛ dɛ dɩm baŋa nɩ, yɩ DƖ pɔɔrɩ-dɩ DƖ pa dɩ yɩ dɩ yɩra da yayam yam wʋnɩ, kʋ na yɩ dɩntʋ dɛ dɩm nɩ mʋ DƖ sin dɩ DƖ tɩtʋŋa yam DƖ na tʋŋɩ DƖ ti tɩn ŋwaanɩ.a
4 Wɛ dɛɛn na naanɩ wɛyuu dɩ tɩga baŋa kʋ na kɩ te tɩn mʋ tɩntʋ.
Baarʋ dɩ o kaanɩ taanɩ
Yuutu Baŋa-Wɛ dɛɛn na kɩ wɛyuu dɩ tɩga baŋa o ti tɩn, 5 gaarʋ dɩ tweeru ta tǝrǝ tɩga kam baŋa nɩ sɩ tɩ taa paɩ wʋdiiru. Kʋlʋkʋlʋ ya ta wʋ puli, bɛŋwaanɩ Wɛ daa ta wʋ pɛ dʋa nɩ tɩga baŋa nɩ. Nabiinu dɩ ya daa ta tǝrǝ sɩ o va tɩga kam. 6 Dɩ kʋ dɩ, na mʋ dɛɛn nuŋi tɩga kam kuri nɩ ba burǝ, yɩ bantʋ mʋ yǝni ba bugi tɩga kam baŋa maama.
7 Yuutu Baŋa-Wɛ dɛɛn ma fɔ tɩga kam tɩɩrʋ DƖ ma DƖ mɔ nabiinu.b DƖ ma daarɩ DƖ fuli DƖ siun kʋm na paɩ ŋwɩa tɩn, DƖ yagɩ baarʋ wʋm mʋmwa nɩ, kʋ pa o laan jɩgɩ ŋwɩa.c 8 Baŋa-Wɛ dɛɛn ma kɩ tweeru kara Edɛn nɩ, wa-puli je sɩm seeni. DƖ ma daarɩ DƖ kwe DƖ na mɔɔnɩ baarʋ wʋlʋ tɩn DƖ ja vu DƖ yagɩ dáanɩ. 9 DƖ ma pa tweeru dwi dwi nuŋi tweeru kara kam nɩ, dɩ na tiini dɩ lamma yi nɩ yɩ tɩ ləri biə na maŋɩ tɩ dim tɩn. Kara kam tɩtarɩ nɩ mʋ Wɛ dɛɛn pɛ tweeru tɩle nuŋi tɩ zɩgɩ da. Tɩ dɩdʋa dɛɛn yɩ tiu kʋlʋ na paɩ nɔɔna ŋwɩa tɩn. Kʋdoŋ kʋm maa yɩ tiu kʋlʋ na paɩ nɔɔna lwarɩ lanyɩranɩ dɩ lwarɩm ba pɔɔrɩ daanɩ tɩn.
10 Bugə wʋdoŋ dɛɛn maa zɩgɩ Edɛn nɩ ka duri ka tʋlɩ ka maa kɛa. Bugə kantʋ mʋ paɩ tweeru kara kam naɩ na. Ka ma nuŋi Edɛn je sɩm nɩ ka daarɩ ka pɔɔrɩ kuni bɩna. 11 Bu-tʋlɩ sɩna sɩm yigə tu yɩrɩ mʋ Pisɔn. Kantʋ mʋ kɩkarɩ ka kaarɩ Avila laŋa kam maama. Dáanɩ mʋ səbu-sɩŋa wʋra, 12 yɩ ka yɩ cɩga cɩga. Wəənu tɩlʋ lwəm na ywəmmə tɩn tɩlʋ yɩrɩ na yɩ Bideliɔn tɩn, dɩdaanɩ kandwa-ŋʋna ba na bəi-ya sɩ Onikisi tɩn dɩ maa wʋ dáanɩ. 13 Bu-tʋla kalʋ na saŋɩ tɩn yɩrɩ maa yɩ Giyɔn. Kantʋ dɩ ma gugwǝli ka kaarɩ Kusi laŋa kam maama. 14 Batɔ tu wʋm yɩrɩ mʋ yɩ Tigri. Kantʋ duri ka tʋlɩ Asiiri laŋa kam wa-puli je sɩm seeni mʋ. Bu-tʋla kalʋ na kɩ sɩna tɩn maa yɩ Efratɩ bugə kam.
15 Yuutu Baŋa-Wɛ dɛɛn ma ja baarʋ wʋm DƖ vu DƖ yagɩ Edɛn tweeru kara kam nɩ sɩ o taa tʋŋɩ da yɩ o nii ka baŋa nɩ. 16 Baŋa-Wɛ ma pa baarʋ wʋm ni DƖ wɩ: «Nmʋ jɩgɩ cwǝŋǝ sɩ n di tweeru biə balʋ maama na ləri kara kam nɩ tɩn. 17 Sɩ Kʋ daarɩ, tiu kʋlʋ na paɩ nɔɔna lwarɩ lanyɩranɩ dɩ lwarɩm ba pɔɔrɩ daanɩ tɩn, n daɩ sɩ n di kʋ biə bam. Ta n ye nɩ, dɛ dɩlʋ nmʋ na wʋ́ di kʋ biə tɩn, dɩntʋ dɛ dɩm nɩ mʋ n lagɩ n tɩ.»
18 Yuutu Baŋa-Wɛ laan ma ta DƖ wɩ: «Baarʋ wʋm na wʋra o yɩranɩ kʋntʋ tɩn, kʋ ba lamma. Kʋntʋ ŋwaanɩ aá kɩ zənnu wʋlʋ na wʋ́ maŋɩ dɩd-o tɩn mʋ a pa‑o.»
19 Baŋa-Wɛ dɛɛn ya fɔgɩ tɩga kam tɩɩrʋ o kwe-tɩ DƖ ma mɔ vara bam dwi maama dɩdaanɩ wɛyuu zunə bam dwi maama. DƖ laan ma ja-ba DƖ ja DƖ ba baarʋ wʋm yigə nɩ sɩ DƖ nii baarʋ wʋm wʋ́ bəŋi ba yɩra tɩta mʋ. Woŋo kʋlʋ maama maa na ŋwɩ, yɩ baarʋ wʋm pa-kʋ yɩrɩ dɩlʋ tɩn, kʋ sɩɩnɩ kʋ yɩ kʋntʋ mʋ. 20 Baarʋ wʋm dɛɛn ma pa vara bam dwi maama ba yɩra, sɔŋɔ vara dɩ ga-vara maama, yɩ o ta pa wɛyuu zunə bam dwi maama ba dɩ yɩra. Dɩ kʋntʋ maama wʋnɩ tɩn, zənnu dɛɛn tǝrǝ sɩ o maŋɩ dɩd-o.
21 Yuutu Baŋa-Wɛ laan ma pa baarʋ wʋm tiini o dɔ dɔɔm o bəri. O na tigi o dɔa kʋntʋ tɩn, mʋ Wɛ lɩ o saŋa kwi sɩm kuə dɩdʋa yɩ DƖ joori DƖ sɩn jəgə kam dɩ ya-nwana. 22 DƖ ma kwe baarʋ wʋm saŋa kuə kam DƖ ma DƖ mɔ kaanɩ. DƖ ma daarɩ DƖ ja-o DƖ ja ba baarʋ wʋm te. 23 Baarʋ wʋm laan ma ta o wɩ,
«Nii mʋ! Amʋ tɩtɩ dwi dɩm mʋ tɩntʋ!
Nmʋ mɛ amʋ kuə mʋ
n ma n kɩ wʋntʋ kwi sɩm,
yɩ n daarɩ n ma a ya-nwana yam
n ma n kɩ wʋntʋ yɩra yam.
Baá taa bǝ-o sɩ ‹kaanɩ› mʋ,
ba na lɩ-o baarʋ yɩra yam nɩ tɩn ŋwaanɩ.»d
24 Kʋntʋ ŋwaanɩ, nɔɔnʋ na di kaanɩ, oó pɔɔrɩ o tɩtɩ o nu dɩ o ko tee nɩ, sɩ o daarɩ o pa o dɩ o kaanɩ wʋm jǝni daanɩ. Kʋntʋ wʋ́ pa ba laan ji nɔɔnʋ dɩdʋa.e
25 Baarʋ wʋm dɩ o kaanɩ wʋm maama dɛɛn maa kaagɩ ba beeri kalambolo mʋ, yɩ cavɩɩra ba jɩgɩ-ba.