Pulim Tɔnɔ
Wǝǝnu maama pulim taanɩ
1
Pulim dɩm nɩ tɩn mʋ Wɛ naanɩ wɛyuu dɩ tɩga baŋa.a 2 Tɩga baŋa kam maama dɛɛn jagɩ jǝgǝ maama mʋ. Kʋnkʋlʋ ya ta tǝrǝ ka baŋa nɩ. Na-fara bam baŋa maama yɩ lim yɩranɩ. Wɛ Joro kʋm maa kaagɩ wɛɛnɩ kʋ veǝ na bam baŋa nɩ.3 Wɛ ma ta DƖ wɩ: «Pa pooni taa wʋra!» Pooni ma sɩɩnɩ dɩ ba.b 4 Wɛ ma na nɩ pooni dɩm lana, yɩ DƖ wʋʋ poli. DƖ dɛɛn ma pa pooni dɩm dɩ lim dɩm pɔɔrɩ daanɩ. 5 Wɛ dɛɛn ma bəŋi pooni dɩm nɩ ‹wɩa›, yɩ DƖ daarɩ DƖ bəŋi lim dɩm nɩ ‹tɩtɩɩ›. Tɩga ma ba ka yi yɩ ka daarɩ ka pʋʋrɩ. Pulim dɛ dɩm mʋ kʋntʋ.
6 Wɛ dɛɛn daa ma ta DƖ wɩ: «Pa tɩlampolo taa wʋra na bam tɩtarɩ nɩ sɩ ba pɔɔrɩ yɩra yɩra kuni bɩle.» 7 Wɛ ma kɩ tɩlampolo DƖ ma pɔɔrɩ na balʋ na wʋ ka kuri nɩ tɩn, dɩ na balʋ na wʋ ka baŋa nɩ tɩn daanɩ. Kʋ ma sɩɩnɩ kʋ kɩ kʋntʋ. 8 Wɛ ma bəŋi tɩlampolo kʋm sɩ ‹wɛyuu›. Tɩga ma ba ka yi yɩ ka daarɩ ka pʋʋrɩ. Da yale dɛ dɩm mʋ kʋntʋ.
9 Wɛ daa ma ta DƖ wɩ: «Pa na balʋ na wʋ wɛyuu kʋm kuri nɩ tɩn la ba kikili jǝgǝ dɩdʋa ba daarɩ sɩ tɩ-kʋra taa wʋra.» Kʋ ma sɩɩnɩ kʋ kɩ kʋntʋ. 10 Wɛ ma bəŋi tɩ-kʋra kam nɩ ‹tɩga baŋa›, yɩ DƖ daarɩ DƖ bəŋi na-fara bam na lagɩ daanɩ tɩn sɩ ‹nɩnɩʋ›. Wɛ ma na nɩ kʋ lana, yɩ DƖ wʋʋ poli.
11 Wɛ laan ma ta DƖ wɩ: «Pa gaarʋ dɩ tweeru puli tɩga kam baŋa nɩ, gaarʋ tɩlʋ na tiŋi tɩ wo-dwə tɩn, dɩdaanɩ tweeru na ləri biə dɩ ba wo-dwə tɩn, tiu maama dɩ kʋ dwi.» Kʋ ma sɩɩnɩ kʋ kɩ kʋntʋ. 12 Tɩga kam maa puli ga-lɛɛrʋ dwi maama, dɩ tweeru dwi maama na ləri biə tɩn, dɩdaanɩ tɩ wo-dwə dwi dwi. Wɛ ma na nɩ, DƖ na kɩ kʋlʋ tɩn lana, yɩ DƖ wʋʋ poli. 13 Tɩga ma ba ka yi yɩ ka daarɩ ka pʋʋrɩ. Da yatɔ dɛ dɩm mʋ kʋntʋ.
14 Wɛ daa ma ta DƖ wɩ: «Pa wǝǝnu tɩlʋ na nyɩɩnɩ tɩn dwi dwi taa wʋ wɛyuu kʋm nɩ sɩ tɩ pɔɔrɩ wɩa dɩ tɩtɩɩ daanɩ. Tɩ wʋ́ taa yɩ mɩmaŋa tɩ brɩ yadɛ dɩdaanɩ tɩ-pwəŋə. Tɩ ta wʋ́ taa brɩ da yam, dɩ bɩna yam, dɩdaanɩ canɩ sɩm maŋa maama. 15 Tɩ wʋ́ taa nyɩɩnɩ wɛyuu nɩ sɩ tɩ taa paɩ pooni tɩga kam baŋa nɩ.» Kʋ ma sɩɩnɩ kʋ kɩ kʋntʋ. 16 Wɛ dɛɛn ma kɩ wo-nyɩn-kamunə yale DƖ pa kʋlʋ na nyɩɩnɩ kʋ gaalɩ tɩn yǝni kʋ taa nyɩɩna wɩa nɩ, yɩ kʋlʋ na muri tɩn taa nyɩɩna tɩtɩɩ nɩ. DƖ daa ta ma kɩ calɩcwɩ sɩm dɩ DƖ wǝli da. 17 Wɛ ma kɩ wo-nyɩnnʋ tɩm kʋntʋ DƖ zɩgɩ wɛyuu nɩ sɩ tɩ taa paɩ pooni yi tɩga kam baŋa. 18 Tɩ wʋ́ taa nii wɩa dɩ tɩtɩɩ baŋa nɩ yɩ tɩ ta wʋ́ pɔɔrɩ pooni dɩ lim daanɩ. Wɛ ma na nɩ, DƖ na kɩ kʋlʋ tɩn lana, yɩ DƖ wʋʋ poli. 19 Tɩga ma ba ka yi yɩ ka daarɩ ka pʋʋrɩ. Da yana dɛ dɩm mʋ kʋntʋ.
20 Wɛ daa ma ta DƖ wɩ: «Pa na-fara bam wʋʋ su dɩ wǝǝnu tɩlʋ na ŋwɩ tɩn dwi maama, sɩ zunə dɩ taa jaana ba beerǝ wɛyuu kʋm je sɩm maama nɩ.» 21 Wɛ dɛɛn ma naanɩ nɩnɩʋ wʋʋ varɩ-kamunə dɩ wǝǝnu tɩlʋ na kaagɩ tɩ yɛ na wʋnɩ tɩn dwi maama. DƖ ta ma naanɩ zunə balʋ na kaagɩ ba jaanɩ wɛyuu nɩ tɩn ba dwi ba dwi. Wɛ ma na nɩ, DƖ na kɩ kʋlʋ tɩn lana, yɩ DƖ wʋʋ poli. 22 Wɛ ma daarɩ DƖ kɩ tɩ maama lanyɩranɩ DƖ wɩ: «Taá lʋrɩ-na á puli á su na-fara bam wʋʋ maama. Nan ta pa zunə bam dɩ puli ba taa daga lʋgʋ baŋa nɩ.» 23 Tɩga ma ba ka yi yɩ ka daarɩ ka pʋʋrɩ. Da yanu dɛ dɩm mʋ kʋntʋ.
24 Wɛ daa ta ma ta DƖ wɩ: «Pa tɩga kam baŋa taa jɩgɩ wǝǝnu tɩlʋ na ŋwɩ tɩn dwi dwi, sɔŋɔ vara dɩ ga-vara, dɩ tɩga wo-vəəlu dwi maama.» Kʋ ma sɩɩnɩ kʋ kɩ kʋntʋ. 25 Wɛ dɛɛn ma naanɩ lʋgʋ baŋa vara bam kʋntʋ, ba dwi ba dwi, ga-vara dɩ sɔŋɔ vara, dɩ tɩga wo-vəəlu dwi maama. Wɛ ma na nɩ, DƖ na kɩ kʋlʋ tɩn lana, yɩ DƖ wʋʋ poli.
26 Wɛ laan maa wɩ: «Pa-na sɩ dɩ́ mɔ nabiinǝ sɩ ba taa nyɩ dɩ dɩbam, yɩ ba jɩgɩ dɩbam tɩtɩ nyɩnyʋgʋ. Bantʋ wʋ́ taa jɩgɩ dam ba taa te nɩnɩʋ wʋʋ kale sɩm, dɩ wɛyuu zunə bam, dɩdaanɩ vara dɩ wǝǝnu tɩlʋ maama na kaagɩ tɩ ve tɩga kam baŋa nɩ tɩn.» 27 Wɛ dɛɛn ma sɩɩnɩ o naanɩ nabiinǝ sɩ ba taa jɩgɩ DƖ tɩtɩ nyɩnyʋgʋ. DƖ dɛɛn naanɩ-ba baarʋ dɩ kaanɩ mʋ.c 28 DƖ ma kɩ ba yu-yoŋo DƖ ta dɩ ba DƖ wɩ: «Taá lʋrɩ-na biə á puli zanzan sɩ á jagɩ tɩga baŋa maama nɩ sɩ á daarɩ á taá te-ka. Taá di-na dam nɩnɩʋ wʋʋ kale sɩm, dɩdaanɩ wɛyuu zunə bam, dɩ wǝǝnu tɩlʋ maama na kaagɩ tɩ ve tɩga nɩ tɩn baŋa nɩ.»
29 Wɛ ma daarɩ DƖ ta dɩ ba DƖ wɩ: «Nii-na, a kwe gaarʋ tɩlʋ na tiŋi tɩ wo-dwə tɩn, dɩdaanɩ tweeru na ləri biə dɩ ba wo-dwə tɩn, a kɩ abam jɩŋa nɩ sɩ tɩ taa yɩ wʋdiiru tɩ pa abam. 30 Kʋ daarɩ kʋ na yɩ lʋgʋ baŋa vara bam maama, dɩ wɛyuu zunə bam, dɩ wǝǝnu tɩlʋ maama na jɩgɩ ŋwɩa yɩ tɩ kaagɩ tɩ ve tɩga baŋa nɩ tɩn, amʋ kwe gaarʋ tɩm dɩ tweeru vɔɔrʋ tɩm mʋ a pa-tɩ sɩ tɩ taa di.» Kʋ ma sɩɩnɩ kʋ kɩ kʋntʋ.
31 Wɛ ma fɔgɩ DƖ nii kʋlʋ maama DƖ na kɩ tɩn, yɩ DƖ na nɩ kʋ tiini kʋ lamma. Tɩga ma ba ka yi yɩ ka daarɩ ka pʋʋrɩ. Da yardʋ dɛ dɩm mʋ kʋntʋ.