Baŋa-Wɛ sono dɩ DƖ cɩga taanɩ
Wɛ tɩntʋŋnʋ Davidi dɛɛn panɩ ləŋə kantʋ.
36
Lwarɩm wʋbʋŋa yɩranɩ mʋ su nɔn-balwaarʋ bɩcarɩ.Ba maa brɩ ba ba kwarɩ Wɛ
dɩ fɩnfɩɩn dɩ.a
2 Ba na nii ba naɩ ba tɩtɩ kamunni te tɩn
mʋ paɩ ba daa ba maana
ba lwarɩm kikiǝ
sɩ ba daarɩ ba culi-ya.
3 Ba ni-taanɩ su dɩ bɩtar-balɔrɔ
dɩdaanɩ vwan yɩranɩ mʋ.
Wʋbʋŋa daa tǝrǝ ba yuu nɩ
sɩ ba taa tʋŋɩ lanyɩranɩ dɩ swan.
4 Tɩtɩɩ nɩ ba maa tigi ba sarɩ nɩ
ba jeeli kǝm-balwaarʋ.
Ba wʋbʋŋa ma ja sɩ ba tɔgɩ cwǝŋǝ kalʋ na ba lana tɩn.
Ba maa warɩ sɩ ba vɩn lwarɩm kǝm.
5 Baŋa-Wɛ, nmʋ sono kʋm wʋra mʋ taan,
yɩ kʋ gɩɩnɩ kʋ di wɛyuu.
Nmʋ na yɔɔrɩ n zɩgɩ
n cɩga wʋnɩ te tɩn
mʋ tiini kʋ yalma
kʋ gaalɩ kunkwǝǝnu tɩm.
6 Nmʋ nɔn-ŋʋnnɩ dɩm maa zɩgɩ cɛpɩ
nɩnɛɛnɩ pu-kamunnu tɩm
na zɩgɩ te tɩn.
Nmʋ na yǝni n di cɩga bʋra te tɩn
dɩ maa luunə nɩ nɩnɩʋ kʋm kuri na luunə te tɩn.
Baŋa-Wɛ, nmʋ nii nabiinǝ dɩ vara maama baŋa nɩ mʋ.
7 Amʋ Tu Wɛ, nmʋ sono kʋm tiini
kʋ jɩgɩ lʋnnɩ.
Nabiinǝ yǝni ba tui nmʋ te
ba səgi n woro kʋm wʋnɩ,
nɩ nmʋ na yarɩgɩ n vwana
n kwǝli-ba te tɩn.
8 Nmʋ pa-ba wʋdi-laarʋ
sɩ ba taa di ba sui,
wʋdiiru na nɩɩnɩ nmʋ sɔŋɔ kʋm wʋnɩ tɩn ŋwaanɩ.
Nmʋ ta pa ba nyɔ
nmʋ bwi sɩm wʋ na mʋ
sɩ ba taa jɩgɩ wʋpolo dɩ yazurə.
9 Bɛŋwaanɩ, nmʋ yɩ buli-yi
dɩlʋ na paɩ ŋwɩa tɩn.
Nmʋ pooni dɩm maa paɩ
dɩ́ jɩgɩ pooni dɩ́ ve dɩ yigə nɩ.b
10 Baŋa-Wɛ, pa n sono kʋm taa wʋra
balʋ yigə na wʋ nmʋ wʋnɩ tɩn taan.
Ta zɩgɩ nmʋ cɩga kam wʋnɩ
n pa balʋ na yɔɔrɩ
cwə-laa wʋnɩ tɩn.
11 Yɩ pa pwələ sɩ brɩ-n-tɩtɩ nyɩna
nɔ amʋ baŋa nɩ.
Yɩ pa nɔn-balwaarʋ cwǝŋǝ
sɩ ba zəli-nɩ
sɩ a yagɩ a tɩga kam.
12 Nii-na nɔn-balwaarʋ tɩm
na tʋ ba tigi te!
Ba daa bá wanɩ ba zaŋɩ wɛɛnɩ.