Kota Babel mo ancor
18
1 Abis itu kita lia ada satu malaekat laeng turung dari sorga. Dia ada kuasa yang basar, kong dia itu luar biasa sampe ada cahaya yang kaluar dari pa dia beking ni bumi jadi trang. 2 Dia babilang deng suara kuat,“So ancor, so ancor tu Babel, tu kota yang paling top.
Tu kota itu so jadi tampa tinggal dari tu setang-setang deng roh-roh yang jaha.
Tu kota itu lei so jadi tampa basambunyi dari burung-burung najis deng lei binatang-binatang yang orang-orang binci.
3 Tu kota itu so ancor lantaran dia so pengaruhi samua suku bangsa beking tu dia pe keinginan yang cabul,
itu sama deng Babel so kase pa dorang minum anggor sampe dorang taiko-iko deng dia.
Tu raja-raja di dunia so bersina deng dia.
Tu orang-orang yang bajual so jadi kaya lantaran tu orang-orang Babel pe nafsu for babli barang-barang mahal basar skali.”
4 Abis itu kita dengar suara laeng dari sorga babilang,
“Hei Kita pe orang-orang, kase tinggal jo tu kota itu.
Deng bagitu ngoni nyanda taiko-iko deng tu orang-orang di kota itu pe dosa-dosa,
supaya tu malapetaka yang kota itu mo dapa nyanda mo kana pa ngoni.
5 Soalnya orang-orang di kota itu pe dosa-dosa
so tasusung-susung sampe ka langit,
deng Tuhan Allah da inga samua dorang pe jaha.
6 Jadi tu jaha yang orang-orang di kota itu perna da beking,
itu samua musti se balas pa tu orang-orang jaha itu,
kong itu musti se balas pa dorang dua kali lipa lebe jaha dari tu dorang da beking.
Dorang itu musti se minum tu anggor yang dari pa dorang pe cawan sandiri,
kong tu anggor itu musti dua kali lebe kras dari yang dorang perna da kase pa orang-orang.
7 Dorang musti se rasa tu siksa yang luar biasa deng lei se rasa tu sedi skali.
Kong tu siksa deng tu sedi yang dorang da rasa,
itu musti sama banya deng tu dong pe hidop yang cuma puji deng hormat tu dong pe diri sandiri deng tu hidop mewa yang dorang so rasa.
Soalnya dulu dorang nyanda brenti puji tu dong pe diri sandiri pa dong pe dalam hati,
‘Kita ini ratu yang ada kuasa for baprenta!
Kita bukang janda, kong kita nyanda perna mo rasa tu sedi lantaran da mati akang.’
8 So lantaran dorang puji dong pe diri rupa itu,
dorang mo dapa malapetaka-malapetaka for hukum pa dorang.
Nanti cuma dalam satu hari,
dorang mo dapa saki brat,
mo kelaparan, mo sedi lantaran da mati akang,
kong api mo bakar pa dorang.
Soalnya Tuhan Allah yang da tentukan tu hukuman for dorang, Tuhan itu Tuhan Allah yang kuat.”
9 Kong tu raja-raja di bumi yang so beking tu hal-hal yang cabul deng hidop mewa deng tu orang-orang di kota itu, dorang itu nanti mo manangis akang tu kota itu waktu dorang lia asap dari tu api yang da bakar tu kota. 10 Dorang mo badiri jao dari tu kota itu, lantaran dorang tako kalu dorang mo rasa tu siksa yang sama deng tu kota itu da rasa, kong dorang mo babilang,
“Cilaka, cilaka tu kota Babel, tu kota yang paling top,
tu kota yang kuat.
Soalnya cuma dalam satu jam,
tu kota itu so mo dapa de pe hukuman.”
11 Kong tu orang-orang yang bajual di bumi manangis deng berkabung lantaran tu kota itu. Soalnya so nyanda ada orang lei yang bli dorang pe barang-barang. 12 So nyanda ada yang bli dong pe barang tu da beking dari mas, perak, permata deng mutiara. So nyanda ada lei yang bli dong pe baju yang da beking dari kaeng bagus yang mahal rupa tu: kaeng lenan, kaeng pars, kaeng sutra deng lei kaeng mera tua. Nyanda ada lei yang mo babli tu dorang pe barang-barang yang da beking dari kayu yang bobou sadap, dari kayu yang mahal, dari gading, tembaga, besi deng dari batu pualam. 13 So nyanda ada lei yang mo bli dorang pe kayu manis, tu bahan-bahan for beking minya wangi, balsem, mura, kemenyan, anggor, minya zaitun, topong deng gandum. So nyanda ada lei yang mo bli dong pe sapi, domba, kuda deng kreta, deng lei orang for beking jadi budak.
14 Tu orang-orang yang ja bajual itu mo babilang pa tu kota itu,
“Babel, samua barang yang mahal tu beking snang tu ngana pe hati so nyanda ada lei.
Samua yang mewa tu beking ngana pe hidop sadap,
deng samua ngana pe harta so ilang.
Ngana so nyanda perna mo dapa lei tu samua itu.”
15 Tu orang-orang yang bajual barang-barang dari kota itu so jadi kaya. Mar nanti dorang mo badiri jao-jao dari tu kota itu lantaran dorang tako mo takana tu kota pe siksa. Dorang mo manangis deng berkabung, 16 kong babilang,
“Cilaka, cilaka jo tu kota Babel yang paling top.
Dulu tu orang-orang di situ bapake baju yang da beking dari macam-macam kaeng: kaeng lenan, kaeng warna pars yang mahal deng kaeng warna mera tua.
Dulu dorang lei ja pake perhiasan dari mas, permata deng mutiara.
17 Mar cuma deng satu jam samua de pe kekayaan yang pe banya itu iko abis.”
Kong tu samua nahkoda, orang-orang kapal, tu panumpang deng samua orang yang dong pe tampa mancari di laut da badiri jao-jao. 18 Dorang lia tu asap dari api yang da bakar tu Babel itu, kong dorang babilang deng suara kuat, “Nyanda perna ada kota yang sama de pe top rupa tu kota itu!”
19 Dorang kase ambor abu pa dorang pe kapala, tanda dorang sedi skali. Dorang manangis kong babilang deng suara kuat,
“Cilaka, cilaka tu kota Babel yang top itu.
Orang-orang yang ada kapal da bawa barang for se jual deng for se bli tu orang-orang Babel pe barang yang mahal,
sampe dorang itu jadi kaya.
Mar cuma dalam satu jam, tu kota Babel itu so ancor.”
20 Trus ada lei yang babilang,
“Hei ngoni tu ada di sorga, snang-snang jo ngoni,
lantaran tu kota itu Tuhan so hukum!
Snang-snang jo ngoni tu Tuhan pe orang-orang,
ngoni tu rasul-rasul tu Tuhan pe utusan-utusan,
deng lei ngoni tu nabi-nabi tu orang-orang yang ja kase tau Tuhan pe pesan!
Soalnya Tuhan Allah so kase hukuman pa tu kota itu lantaran samua tu jaha yang orang-orang di kota itu perna da beking pa ngoni.”
21 Abis itu ada tu satu malaekat yang kuat, kong dia angka satu batu basar skali tu de pe basar sama deng batu gilingan di tampa ja giling akang gandum. Dia angka tu batu trus lego ka laut deng babilang,
“Bagini no de pe cara Tuhan Allah mo se lego ka bawa deng kuat tu kota Babel, sampe tu kota itu so nyanda mo dapa lei.
22 Kong di kota itu so nyanda perna lei mo dapa dengar suara musik dari orang-orang yang main kecapi, suling deng trompet,
trus so nyanda mo dapa dengar suara orang bamanyanyi.
So nyanda ada lei mo dapa tu orang yang ahli di kota itu,
kong so nyanda mo dapa dengar lei bunyi dari batu yang ja bagiling gandum di kota itu.
23 Kong tu lampu so nyanda mo bacahaya lei di kota itu,
deng dari situ so nyanda dapa dengar lei suara tu pengantin laki-laki deng tu pengantin parampuang.
Soalnya dulu tu orang-orang yang ja bajual di kota itu,
dorang yang paling top di bumi,
kong orang-orang di kota itu pake ilmu sihir for beking sesat orang-orang dari samua suku bangsa di dunia.
24 Tu kota itu dapa hukum bagitu lantaran tu orang-orang di situ so babunung tu nabi-nabi, tu Tuhan pe orang-orang yang laeng deng lei samua orang di bumi yang mati dorang da bunung.”