Nzakwa i marakw nda zəʼal
3
1 Kaghuni guli miʼaha,
haniŋwahana ta ghəŋ mista zəʼalhaª ghuni.
Ka ta magay kuni mantsa,
dər má sna a sanlaha ta gwaɗa wu,
ŋa nghay taŋ ta ŋərma nzakwa miʼa taŋ,
ŋa mbəɗanafta taŋ ta nzakwa taŋ,
dər má pslaf a kuni ta wi.
2 Dzaʼa nghaŋ ngha həŋ ta ŋərmata nzakwa ghuni,
nda ya ká kuni ta sna gwaɗa da həŋ.
3 Yaha rka ghuni da nzakway ka skwa nghay wa iri,
manda:
Ɗatá ghəŋ ya nda bla,
nda ya nda miziɗikwa dasu,
nda ya nda lgut nda bla nda blaª dzva ni.
4 Ka nza rkata rka ghuni ka skwi nda ɗifa ma ŋuɗufa ghuni,
ka nzakwa tsi ka rka ya kul haɗ ta ɓadzavata,
manda:
Nzaku leɓtekwa,
tɓekwa.
Tsaha ya skwi dagala sgita ni da Lazglafta.
5 Ghalya,
mantsa ya si ta rka miʼaha ta fafta ghəŋ ta Lazglafta ta rka,
ma haniŋta taŋ ta ghəŋa taŋ mista zəʼalha taŋ.
6 Mantsa ya si ta maga Sara,
ta sna gwaɗa da Abraham.
« Mghama ɗaª!
» kaʼa si ta hgay guli.
Kaghuni guli ná,
kwagha ni kuni,
ka ta magay kuni ta skwi ɗina,
ka ksu a zləŋ ta kaghuni.
7 Kaghuni zəʼalha guli,
ɗina ka kuni nzaku nda miʼa ghuni,
ka famta kuni ta ɗifil ma ghəŋ,
ya gwal nda hta mbrakwa taŋ hahəŋ.
Ka vla kuni ta sgitª ŋa taŋ,
kabga tsa hafu ya ta vlə Lazglafta ka zɗakatahuɗa ni ya ná,
nda hahəŋ tani,
nda kaghuni tani mida.
Ka mantsa ya ka kuni magay na:
Ta snay Lazglafta ta duʼa ghuni.
Ghuya ɗaŋwa ta ghəŋa maga skwi ɗina
8 Ŋa kɗiŋta ná,
guyawa guyatá ndana ghuni ka skwa turtuk,
tawavuswa hiɗahiɗa,
ɗvuvuswa vgha ghuni ka zwana ma nda kwaghama,
magawa zɗaku nzawa nza nda hanatá ghəŋ.
9 Ka maga maga mndu ta ghwaɗaka skwi,
ma vranam ka nda ghwaɗaka skwi.
Ka razaghaf raza mndu,
ma vranam ka nda razu,
« katək na tfanagha tfa ta wiª,
» kabga ŋa tsaya hgafta Lazglafta ta kaghuni,
ŋa tfaghunaghatani ta wi ta kaghuni guli.
10 Ka lu vindafta ma deftera Lazglafta na:
« Ka ta kumay mndu ta zɗakwa nzakwa ni,
ka ta kumay mndu ta rfay ni ta rfu ma nzakwa ni,
ksanatani ta ghanika ni,
zlaŋta ni ta tsakalawi.
11 Zlaŋta ni ta maga ghwaɗaka skwi,
ka maga skwi ɗina.
Zbay ni ta zɗaku ka ŋavata mista ni.
12 Nda fa ira Lazglafta ta gwal ta maga skwi tɗukwa.
Nda fa sləməŋa ni ka sna duʼa taŋ.
Ama gwal ta maga ghwaɗaka skwi ná,
ta mbəɗana mbəɗa Lazglafta ta hul ta həŋª,
» kaʼa.
13 Ka ŋava ŋa kuni ka maga skwi ɗina ná,
wati ma mndu ya dzaʼa maga ghwaɗaka skwi ŋa ghuni na?
14 Aŋ mndani dər má ta ghuyay kuni ta ɗaŋwa ta ghəŋa vəl magay ghuni ta skwi tɗukwa ná,
dzaʼa rfay kuni ta rfu.
Ma zləŋ kuni ta gwal ta kuma magaghunatá ghwaɗaka skwi.
Ma tɗu tsi ta ŋuɗufa ghuni.
15 Fafwa fa ta ghəŋa ghuni ta *Yesu *Kristi turtukwa ni,
ka ga tsi ta mghamª ma ŋuɗufa ghuni.
Fata kaghuni ta ghəŋa ghuni ŋa ghuni ŋa zlgha wi da inda gwal ta ɗawaghunata ka kabgawu kəl kaghuni ka faftá ghəŋa ghuni ta Yesu Kristi.
16 Ta zlghə kuni ta tsa wi ya,
zlghawazlgha nda hanatá ghəŋ,
nda ya nda vla glaku ŋa taŋ guli.
Gɗata kaghuni ta maga tsa skwi ɗina ya ŋa ghuni,
kada ksuta tsi ka hula ta həŋ,
dər klaf kla həŋ ta kaghuni ka ghwaɗaka mnduha,
ka raraza ŋərmata nzakwa ghuni ta tva Kristi.
17 Ta draŋ ghuya ɗaŋwa ta ghəŋa maga skwi ɗina,
ka si mantsa ya kumaŋta Lazglafta,
ka ghuyay ta ghəŋa magatá ghwaɗaka skwi.
18 Mantsa ya luta tsi guli nda Yesu Kristi,
tsatsi ta nzakway ka tɗukwa mndu,
ka mtutá tsi turtuktuk ta ghəŋa ghwaɗaka mnduha,
ŋa ɓhadamaghata da Lazglafta.
Ma nzakwa ni ma sluʼuvgha dzata lu,
ka nzaku tsi nda hafu ma Sulkumª.
19 Nda mbra tsa Sulkum ya.
Ka laha tsi da mna gwaɗa Lazglafta ŋa sulkumha tsam lu ma gamak.
20 Tsa sulkumha ya ná,
hahəŋ gwal ta kwalaghutá snanatá gwaɗa Lazglafta ghalya.
Aŋ mndani,
nzɗavanzɗa Lazglafta ka ksanatá ŋuɗufa ni ma fitika tsay Nuhu ta kwambalu.
Ka mbaʼatá mbsaka mnduha hutsekw ma tsa imiª ya nda ma tsa kwambalu ya.
Tghas yeya həŋ kweŋkweŋ.
21 Tsa imi ya ná,
gray nda batem ta mba kaghuni gitana ya.
Rɗak ta vgha a ta ghuɓu na batem wa.
Magaftá batem ná,
vlaŋta mu ta ghəŋa mu ta Lazglafta nda vərɗa ŋuɗufa mu ya.
Ndana guli,
ta mbay batem ta kaghuni nda ma sliʼagapta Yesu Kristi ma mtaku.
22 Vraghu vra Yesu Kristi ta luwa,
ta nzaku nda ga zeghwa Lazglafta,
ta ga mgham ta ghəŋa duhwalha Lazglafta,
nda inda sanlaha ma skwiha nda mbra nda mbra.