Maga skwi ya ta zɗəganatá Lazglafta
4
1 Nda sna mu kazlay:
Ghuy ghuya *Kristi ta ɗaŋwa ma sluʼuvgha kəʼa.
Kaghuni guli,
nzawa nza nda fata vgha ŋa ghuyay manda ŋa ni.
Mndu ta ghuytá ɗaŋwa ma sluʼuvgha ná,
haɗ ta gəgəltá dmaku wa.
2 Ma na pɗakwa fitik ŋa zay ghuni nda hafu ta na ghəŋa haɗik na ná,
nzawa nza ta nzaku manda ya ta zɗəganatá Lazglafta,
manda ya ta haraʼu sluʼuvgha ya a wa.
3 Ma nzakwagapta ghuni manda ghalya ná,
mburapmbura kuni ma maga skwi ta zɗəganatá gwal kul snaŋtá Lazglafta.
Ma magay ghuni ta sliʼiŋsliʼiŋ,
nda haraʼu ta iri,
nda ghuyaku,
nda zɗakwa skwi katakata,
nda sasaku,
nda manzakɗawaya skwa wuyayha.
4 Ndanana tama,
ta ndərmim nda ndərmima gwal kul snaŋtá Lazglafta ta kwalaghuta ghuni ta gugəltá ghəŋ nda həŋ ma tsa nzakwa sliʼiŋsliʼiŋ ya,
ka razu həŋ ta kaghuni.
5 Ama hahəŋ nda wa taŋ dzaʼa mnaŋtá slna taŋ ta kəma Lazglafta ya nda fa vgha ni ŋa tsanaghatá guma ta gwal nda hafu nda gwal nda rwa tani.
6 Tsaya kəl lu ka mnanatá *Lfiɗa Gwaɗa ta dər gwal nda rwa,
ŋa nzakwa taŋ nda hafu manda ya ta kum Lazglafta nda ma Sulkum dər má tsanagha tsa Lazglafta ta guma ta həŋ ma ghəŋa haɗik,
manda va ŋa hamata mnda səla.
Nzaku ma guyatá ghəŋ
7 Ndusak ndusa kɗavakta fitika inda skwi.
Nzawa nza hzleŋa nda ɗifil ma ghəŋ,
ŋa ŋavata ghuni ma maga duʼa.
8 Mali ma inda skwi ná,
tsaya gɗavata ghuni nda ɗvuvustá vgha nda ŋuɗuf turtuk sani nda sani,
kabga ta tiŋway ɗvu ta mndu ŋa plinistá ndəghata dmakwaª mnduha.
9 Ma ruruŋwaku kuni ta ruruŋwaku ta tsuʼa mayəm ta lagha da kaghuni.
10 Inda kaghuni,
magawa maga ta slna nda tva ni ŋa sanlaha nda skwi ya vlaghuna Lazglafta.
Mantsa ya dzaʼa kəl kuni ka nzakway ka vərɗa gwal ta ksa slna nda zɗakatahuɗi kavghakavgha ya ta vlə Lazglafta.
11 Ka vlaŋ vla Lazglafta ta mbrakwa gwaɗa ta mndu katsi,
ka mna tsi ta skwi mnana Lazglafta.
Mndu ya vlaŋ Lazglafta ta mbrakwa maganat᪠slna ta mndu guli,
ka maga tsi nda mbraku ya vlaŋ Lazglafta.
Magawa maga mantsa ya ŋa zləzlvay mnduha ta Lazglafta ma inda skwi,
kabga Yesu Kristi.
Ŋa ni glaku,
nda mbraku,
ŋa kɗekedzeŋ.
Amin!
Ghuya ɗaŋwa nzaku ka mnda Kristi
12 Zwana ma ɗa gwal ta ɗvu yu,
yaha kuni da ndərmima ghuya ɗaŋwaha ya ta fwaghunata da nzaku tsi ka skwa madukwa da kaghuni.
13 Rfawa rfa ta rfu katək,
nda nzakwa ghuni kawadaga nda *Kristi ma ghuya ɗaŋwa,
kada ndəghafta ŋuɗufa ghuni nda rfu baɗu dzaʼa maraŋta tsi ta glakwa ni ŋa inda mndu.
14 Ka ta razay mnduha ta kaghuni,
ta ghəŋa nzakwa ghuni ka ŋa Kristi katsi,
rfawa rfa ta rfu kabga ta nzaku Sulkum ya dagala ta nzakway ka Sulkuma Lazglafta ta ghəŋa kaghuni.
15 Ka ta ghuyay sani mataba ghuni ta ɗaŋwa katsi,
ma nza tsi,
kabga vəl dzata ni ta mndu,
kabga ghalatani ta ghali,
kabga vəl magata ni ta ghwaɗaka skwi,
kabga vəl valamtani da skwi kul nghanata.
16 Ala,
ka lagha mndu ka ghuya ɗaŋwa,
kabga vəl nzakwa ni ka krista katsi,
yaha tsaya da ksay ka skwa hula.
Katək na,
ka rfa tsi ta Lazglafta ta ghəŋa vəl favatani ta tsa hgu ya.
17 Sagha sa fitik ŋa zlraftá Lazglafta ta tsa guma.
Tiŋəl ta ghəŋa həga ni dzaʼa zlrafta tsi ta tsay.
Ala,
ka si nda amu ka lu zlrafta katsi,
kinawu dzaʼa kɗavakta tsi ta ghəŋa gwal kul snatá *Lfiɗa Gwaɗa Lazglafta na?
18 Ka lu vindafta ma deftera Lazglafta na:
« Ka nda ɗaŋwa mbafta mndu tɗukwa katsi,
kinawu dzaʼa kɗavakta ŋa ghwaɗaka mnduha,
nda gwal ta ga dmakuª na?
» kaʼa.
19 Tsaya tama,
gwal ta ghuya ɗaŋwa manda ya ta kum Lazglafta ya,
ka gɗata həŋ ta maga skwi ɗina.
Ka fanamta həŋ ta ghəŋa taŋ ma dzvu ta Lazglafta ya ta magaftá həŋ,
kul haɗ ta mbəɗanaftá skwi mna tsi ya.