Tsgha ta lwa
Yakubu
Ga zgu
1
1 Iʼi Yakubu ta nzakway ka kwalva i Lazglafta nda Mgham *Yesu *Kristi,
ta ga zgu yu ŋa ghuni mndəra mnduha Ghwaŋpəɗ his ta wutsa ta vgha ta ghəŋa haɗikª.
Mbra vgha ma ghuya ɗaŋwa
2 Zwana ma ɗa,
ka slaghunagha sla dər mndərga wati ma ghuya ɗaŋwa tsi katsi,
nghawa ngha manda skwa rfu.
3 Ɗina ka snaŋta ghuni kazlay:
Skwi ta dzəghaŋtá zlghay nda ŋuɗufa ghuni ná,
ta klaghunak kla ta ksa ŋuɗuf kəʼa.
4 Ama ɗina ka maravata tsa ksa ŋuɗufa ghuni ya kahwathwata,
kada nzakwa kuni ka gwal kul haɗ sana skwi ta ghəŋa ghuni,
ka gwal nda dedeʼa,
ka gwal kul haɗ sana skwi ta htapta ma həŋ ɗekɗek.
5 Ka mamu sana mndu mataba ghuni pɗugudunus ɗifil katsi,
ka ɗawa tsi da Lazglafta,
dzaʼa vlaŋ vlaª.
Ta muvla Lazglafta nda inda mndu,
ta vlay nda zɗaku.
6 Ama ka ɗawa tsi nda zlghay nda ŋuɗuf,
yaha tsi dgaŋtá ghəŋ dər ka kiʼa ta ghəŋa ni.
Ka ta dga ghəŋ mndu ná,
nda nza ka guram nda gamtsaʼuwakwa drəf ta vyə falak dər ndiga ndiga ya nzakwa ni.
7 Yaha mndərga tsa mndu ya da ndanay kazlay:
Dzaʼa mutsay yu ta sana skwi da Mgham Lazglafta kəʼa,
8 kabga mndərga tsa mndu ya ná,
his ŋuɗufa ni,
slada a ghəŋa ni ma vla turtuk ma inda skwi ta mag tsi wa.
Pɗu nda Gadghəl
9 Ka rfa zwaŋama ya ta nzakway ka pɗu ta rfu,
kabga nda nza ka mndu nda kapa da Lazglafta.
10 Ka rfa mndu ka gadghəl guli ta rfu,
nda vraganata Lazglafta,
kabga dzaʼa lula manda gəgdakwa vzlizla.
11 Safa fitik ghəɗandaŋ dzafta ta kuzuŋ ná,
ŋa ghwalutani,
ŋa rkuta vzlizlaha ni,
ŋa lutaª ɗinakwa rkatarkani.
Manda tsaya dzaʼa luta mnda gadghəl ma slnaha ni ta mag tsi.
Tiŋwa a Lazglafta ta mndu da ghwaɗaka skwi wa
12 Rfu da mndu ta ksa ŋuɗuf ka suʼa skwi ta dzghaŋta,
kabga tahula dzghaŋta,
dzaʼa mutsay ta zewzewa hafu ya tanaf Mgham Lazglafta ta imi ta sləməŋ ta inda gwal ta ɗvuta.
13 Ka dzghaŋ dzgha skwi ta mndu,
yaha da mnay kazlay:
Lazglafta ta dzəgha iʼi kəʼa.
Haɗ ghwaɗaka skwi ta dzəgha Lazglafta wa,
dzəgha a tsatsi guli ta mndu wa.
14 Ka dzghaŋ dzgha skwi ta dər wati ma mndu ná,
ghudzaku ma vgha ni ta barafta,
ka tɗamta tsi.
15 Ka zlanaŋ zla lu ta ghəŋ ta tsa ghudzaku ya katsi,
ŋa zlghafta ni ta huɗi,
ŋa yata ni ta dmaku.
Tahula ndəhafta dmaku,
ŋa klakta ni ta mtaku guli.
16 Zwana ma ɗa,
gwal ta ɗvu yu,
ma nanə kuni ta ghəŋa ghuni.
17 Inda skwi ya ta ɗinuta,
nda inda mbəhu ya kul haɗ sana skwi ta ghəŋa ni ná,
ta luwa ta saha tsi,
da Lazglafta ta nzakway ka Da ni ma tsuwaɗakha.
Haɗ tsatsi ta mbəɗavafta wa,
haɗ sana skwi ta zawataku ka grum da tsatsi wa.
18 Tsatsi ka ghəŋa ni ta ɗvutá vlamata hafu nda ma gwaɗa ni ta nzakway ka kahwathwata,
kada nzakwa mu ka taŋtaŋa ni mataba skwiha ya zlaganap tsi.
Ksa slna nda gwaɗa Lazglafta snaŋər lu
19 Zwana ma ɗa gwal ya ɗvu yu,
wya skwi ŋa snaŋta ghuni:
Ɗina nzakwa inda mndu ka mndu ta gi slru gwaɗa da sləməŋa ni.
Ka mndu kul haɗ gwaɗa ta nzuŋta ta wi a wu,
ka mndu ta gi ɓasa ŋuɗufª a wu,
20 kabga haɗ mndu ta ɓasa ŋuɗuf ta maga skwi ya ɗina ta zɗəganatá Lazglafta wa.
21 Tsaya tama,
pghiŋwapgha ta inda skwiha ya ta ŋəriŋtá mndu,
nda inda ghwaɗaka skwiha.
Tsuʼawatsuʼa nda hanata ghəŋ ta gwaɗa ya ŋəɓam Lazglafta ma kaghuni ta laviŋtá mbanafta hafa ghuni.
22 Nzawa nza ka gwal ta ksa slna nda tsa gwaɗa ya.
Yaha kuni da nzakway ka gwal ta snamtá snay snay,
da nanətá kuni ta ghəŋa ghuni.
23 Ka lagha mndu ka snaŋtá gwaɗa kul ksa slna nda tsi ná,
ka guram tsa mndu ya nda mndu ya ta ngha tsata vgha ni ma dalagar.
24 Tahula nghaŋta ni ta tsatá vgha ni ka laghu tsi,
ŋa gi zanapta ni ta tsa nzakwa tsata ni ya.
25 Ama mndu ya ta faftá ira ni ta zlahuha Lazglafta,
zlahuha ya ta vlamata flauʼwatá vgha,
ka ndiʼafta vgha tɗukwa tida,
kul haɗ ta zanaptá gwaɗa tahula snaŋta ni,
ta ksay ta slna nda tsi ná,
dzaʼa nzakway tsa mndu ya nda rfu ma inda skwiha ni ta mag tsi.
26 Ka mnda dina yu ka mndu ta gray,
tsaw sna a ta ksanaghutá ghanika ni wu katsi,
nana ghəŋa ni ta nanə tsi,
bətbət tsa dinani ya.
27 Wya vərɗa dina ya ta nghə Lazglafta ka dina nda ghuɓa kul haɗ rutsak tida:
Nghapta ka zwana tawakri nda wadguha ma ɗaŋwahaª taŋ,
nda nghay mndu ta ghəŋa ni ma ghwaɗaka skwiha ta ghəŋa haɗik da ŋəriŋta tsi ta ghəŋa ni.