Tsgha ta lwi ŋa
La Hebru
Gwaɗgamata Lazglafta nda ma Zwaŋa ni
1
1 Manda ghalya ná,
nda kɗa fitika Lazglafta ta gwaɗganatá dzidzíha mu nda ta tvi kavghakavgha nda ma wa la anabi.
2 Ama ndanana,
nda ma Zwaŋa ni ta gwaɗa Lazglafta ta gwaɗa nda amu.
Ma fitika zlagigiŋta Lazglafta ta ghəŋa haɗikª ná,
nda tsa Zwaŋa ni ya zlagigiŋ tsi.
Tsa Zwaŋa ni ya guli fanagha tsi ta ga mgham ta ghəŋa inda skwi.
3 Tsa Zwaŋ ya ta mara glakwa Lazglafta.
Manda va nzakwa Lazglafta ya ná,
manda va tsaya nzakwa tsatsi guli.
Nda ma mbrakwa gwaɗa ni ŋanata tsi ta inda skwi ta ghəŋa haɗik.
Tahula kɗiŋta ni ta magatá slna ghuɓiŋtá dmakwa mnduha,
ka nzatá tsi ta luwa nda ga zeghwa Lazglaftaª ya ta ga mgham ta ghəŋa inda skwi.
Mal Yesu ka inda duhwalha Lazglafta
4 Mantsa ya kəl tsa Zwaŋ ya ka malaghutá duhwalha Lazglafta,
manda va hgu ya vlaŋ tsi ka malaghutá ŋa taŋ ya.
5 Haɗ duhwala Lazglafta ya ta kəɗ walaŋta Lazglafta ta mnanata kazlay:
« Kagha ná,
Zwaŋa ɗa ka,
nda nza yu ka Da gha daga gita » kəʼa wa.
Haɗ ya guli ta kəɗ walaŋta tsi ta mnanata kazlay:
Dzaʼa nzakway yu ka Da gha,
dzaʼa nzakway kagha ka Zwaŋa ɗaª kəʼa guli wa.
6 Sana skwi guli,
ma fitika dzaʼa Lazglafta ghunagatá kɗakwa Zwaŋa ni da ghəŋa haɗik,
kaʼa mantsa:
« Ka tsəlɓa inda duhwalha Lazglafta ta tsəlɓu ŋa ni,
» kaʼa.
7 Ama wya kaʼa mnata ta ghəŋa duhwala ni:
« Gwal ksihatá slna hahəŋ,
ŋa nanaftá həŋ manda falak,
ŋa nzakwa taŋ manda ghanika vu,
»ª kaʼa.
8 Ŋa Zwaŋa ni ya,
wya ka Lazglafta mnata ta ghəŋa ni:
« Dughurukwa ga mghama gha Lazglafta ná,
nda nza ŋa kɗekedzeŋ.
Dafa ga mghama gha ná,
nda nza ŋa ga mgham ta ghəŋa mnduha nda tvi tɗukwa.
9 Skwiha tɗukwa tɗukwata zɗəgaghatá kagha,
ɗva a kagha ta ghwaɗaka skwiha wa.
Tsaya kəl Da gha Lazglafta ka pghaghaghatá rɗa zɗaghaftá ŋuɗuf,
ka ɗvutá tsi ta kagha ka malaghutá grahaª gha,
» kaʼa.
10 Kaʼa guli:
« Kagha ná,
Mgham ka.
Ma zlrafta ni,
kagha ta magaftá ghəŋa haɗik.
Luwa guli ná,
magatá slna dzva gha ya.
11 Inda tsa skwi ya ná,
dzaʼa hərɗu hərɗa həŋ.
Ama kagha ná,
nda nza kagha ŋa kɗekedzeŋ.
Tsa haɗik ya nda luwa tani ná,
dzaʼa haluhala həŋ manda halakwa lgut.
12 Manda ya ta mbsafta lu ta lgut ya,
manda tsaya dzaʼa mbsafta ka ta həŋ.
Dzaʼa mbəɗavaf mbəɗa həŋ,
manda ya ta mbəɗavafta lgut.
Ama kagha,
manda va tsa nzakwa gha ya ná,
manda va tsaya ka,
haɗ kɗavaktaª nzakwa gha wa. »
13 Ta walaŋ a Lazglafta ta mnanatá ya dər turtuk mataba duhwalha ni kazlay:
« Sawi nzata nda ga zeghwa ɗa,
dzaʼa pgha pgha yu ta ghumaha gha
ŋa nzakwa taŋ ka skwata pgha səlahaª gha » kəʼa wa.
14 *Duhwalha Lazglafta ná,
sulkumha ta maganatá slna ta Lazglafta,
ta ghwanu lu ta həŋ ŋa kataŋtá gwal ta nzakway ŋa mutsa mbaku ya.