2
1 Hliŋwa hla ta inda ghwaɗaka skwiha ma ŋuɗufa ghuni,
ma kuslember kuni ta kuslemberaku,
ma pghə kuni ta wirak his ma vu,
ma haraʼu kuni ta haraʼuwaku,
ma tsanava kuni ta skwi ta mndu guli.
2 Manda zwaŋa vziʼuwa ta mama uʼa da ma ni ya,
mantsa ya ka kaghuni guli mama vərɗa gwaɗa Lazglafta ŋa glay ghuni ta glaku nda tsi,
ŋa mutsay ghuni ta mbaku ŋa ɗekɗek.
3 « Lawa ta kəma ta kəma,
kabga tapana tapa kuni ta zɗakwaª Mgham Yesu Kristi. »
4 Gavanavawagava ta Mgham Yesu Kristi.
Tsatsi tsa pala ta vla hafu wuɗidiŋ mnduha ya.
Tsatsi zbap Lazglafta ta hemanata inda skwi ta wa ira ni.
5 Kaghuni guli,
nzawa nza ka pala nda hafu mida,
ya ta kəl lu ka ba həga mndərga ŋa Sulkum,
ŋa nzakwa ghuni ka guyata ghəŋa gwal nda ghuɓa ta vla skwi manda ya ta kum Sulkum.
Tsaya skwi ta zɗəganatá Lazglafta nda ma Yesu Kristi.
6 Ka lu vindafta ma deftera Lazglafta na:
« Wana zbap zba yu ta vərɗa palaka tughwa ba həga,
ka fata ma luwa Siyuna.
Mndu ya ta faftá ghəŋa ni tida ná,
haɗ sana skwi dzaʼa pghanaghatá hula ɗekɗek wu,
» kaʼa.
7 Ka ŋa kaghuni gwal ta zlghafta ya ná,
dagala sgita ni,
ama mantsa ya a da gwal kul zlghafta wa.
Ka lu vindafta ma deftera Lazglafta na:
« Va tsa pala wuɗidiŋ gwal ba həga ya,
ta nuta ka vərɗaka pala tughwa həga. »
8 Ka lu vindafta guli na:
« Tsa pala ya ná,
ta dza mndu ka tuthun.
Tsa pala ya ta zlambanapt᪠mnduha,
» kaʼa.
Ta dzay ta həŋ ka tuthun,
kabga kwalaghuta taŋ ta snanatá gwaɗa Lazglafta.
Manda tsaya thanafta Lazglafta ta həŋ daga manda ghalya.
9 Ama kaghuni ya,
nda nza kaghuni ka mndəra mndu zabap Lazglafta,
ka guyata ghəŋa gwal ta vla skwi ŋa Lazglafta,
ka gwal faghu Lazglafta ka ŋa ni.
Tsatsi ta hagaftá kaghuni ka hlagaghunapta ma grusl,
ka pghaghunamta ma tsuwaɗak ta ndərmim lu nda ndərmima,
ŋa mna skwi maga tsi ta malaghutá mbrakuª.
10 Ghalya ná,
si nza a kuni ka mnduha Lazglafta wu,
ama ndanana,
nda nza kuni ka ŋa ni.
Ghalya mutsaf a kuni ta tawa hiɗahiɗa Lazglafta wu,
ama ndanana,
mutsaf mutsaª kuni.
Nzawa nza ta nzaku ka mnduha Lazglafta
11 Zwana ma ɗa gwal ta ɗvu yu nda ŋuɗufa ɗa,
ɗina ka snaŋta ghuni kazlay,
manda mayəm nzakwa ghuni,
gɗavata a kuni ma na ghəŋa haɗik na wu kəʼa.
Tsaya ta kəl yu ka vla mbraku ŋa ghuni,
ka wara kuni ta skwi ya ta haraʼuwa kaghuni.
Ya hafa ghuni ta zbə tsa skwiha ya.
12 Ɗina ka kuni nzaku mataba gwal kul snaŋtá Lazglafta.
Ŋa nzakwa ni dər má ta vaza rutsak həŋ ta kaghuni,
ŋa nghay taŋ ta ŋərma slna ya ta mag kuni,
ŋa zləzlvay taŋ ta Lazglafta baɗu dzaʼa sagha tsi da guyaku nda həŋ.
13 Ma tsa nzakwa ghuni ka ŋa *Yesu *Kristi ya,
hanaganawa hana ta ghəŋa ghuni mista inda gwal ta ga mgham ta ghəŋa mnduha.
Haniŋwa ghəŋ mista mgham dagala,
ta ga mgham ta ghəŋa inda skwi.
14 Haniŋwa ghəŋa ghuni mista ŋumna ya fa lu ŋa tsanaghatá guma ta gwal ta maga ghwaɗaka skwi,
nda ya ŋa ghuba gwal maga skwi ɗinaª.
15 Kumaŋ kuma Lazglafta ta magay ghuni ta skwi ɗina,
ŋa hanaftá wi ta gwal kul snaŋtá skwi,
ta gutá rgha taŋ.
16 Nzawa nza ka gwal flaʼu vgha taŋ.
Nziya nza tsi ná,
ma nza tsa flauʼwatá vgha ghuni ya,
ka skwi ŋa bukwanatá ghwaɗaka skwi.
Ama nzawa nza ta nzaku ya ta maraŋtá nzakwa ghuni ka gwal ta ksanatá slna ta Lazglafta.
17 Vlawa vla ta glaku ŋa inda mndu,
ɗvuwa ɗva ta zwana ma ghuni ma zlghay nda ŋuɗuf,
zləŋawa zləŋa ta Lazglafta,
vlawa vla ta glaku ŋa Mgham dagala.
Klawa saɗa Kristi
18 Kaghuni la kwalva,
hanaganawa ghəŋa ghuni mista daŋahəga ni həga ghuni,
ka zləŋa kuni ta həŋ kahwathwata.
Mista gwal zɗa ghəŋa taŋ nda gwal leɓtekwa yeya a wu,
ama nduk nda ya mista gwal təŋ təŋa nzakwa taŋ tani.
19 Ka lagha mndu ka suʼa ghuya ɗaŋwa,
ta ghəŋa kumay ni ta nzaku manda ya ta zɗəganatá Lazglafta,
dər má si ra a ghuyay ni ta tsa ɗaŋwa ya wu katsi ná,
skwi ɗina ya.
20 Ka lagha ghuni ka gatá gwaɗa,
ka ghuy lu ta ɗaŋwa ŋa ghuni ta ghəŋa ni,
ka suʼaftá kuni katsi,
mamu mndu dzaʼa ghuba kaghuni ra?
Ama ka lagha ghuni ka magatá skwi ɗina,
ka ghuy lu ta ɗaŋwa ŋa ghuni ta ghəŋa ni,
ka suʼaftá kuni katsi,
skwi ɗina tsaya da Lazglafta.
21 Ka ŋa tsaya hgafta lu ta kaghuni,
kabga ghuy ghuya *Yesu *Kristi ta ɗaŋwa guli ta ghəŋa kaghuni.
Tvi ya taghunap tsi ŋa ksay ghuni guli ta səla ni.
22 Tsatsi ná,
walaŋ a ta gatá dmaku wu,
haɗ sana tsakalawi ta sabi ma wa niª wa.
23 Ma fitika razay mnduha,
vranam a ta həŋ nda razu wa.
Ma fitika ghuyay lu ta ɗaŋwa ŋa ni,
tha a kazlay:
Nyaʼ,
kabgawu na kəʼa wa.
Ka zlanaŋtá tsi ta ghəŋa ni ta Lazglafta ya ta tsa guma nda tva ni ya.
24 Tsatsi ka ghəŋa ni ta klaftá dmakwa mu ta vgha ni ma zləŋafta lu ta udza zləŋay.
Ŋa nzakwa mu ka gwal nda rwa təv dmaku,
ŋa nzay mu ta nzakwa tɗukwa.
Nda ma tsa balanata ya mbaghunafta lu.
25 Ghalya si nda nza kuni manda tuwakha nda zaɗaª,
ama ndanana tama,
vrak vra kuni da mnda ngha tuwak ta nghapta ka hafa ghuni guli.