Nəhemiya 9

Ɗaway mnduha ta pla dmaku

1 Baɗ hisambsak fwaɗ mida ma va tsa tila mandəfáŋ ya, ka tskavatá la Israʼila ŋa suma. Ka pghavatá həŋ ta buhu ta vgha, ka buhwamtá həŋ ta rgitik ma ghəŋ. 2 Ka dgaghutá la Israʼila ta vgha nda mndəra sanlaha ma mnduha. Ka sliʼaftá həŋ ka manigiŋtá dmakuha taŋ, nda krughuvha dzidzíha taŋ tani. 3 Tahula tsa, ka sladatá həŋ ma vla taŋ. Ka magatá lu ta ler hkən ta dzaŋa deftera zlaha Yawe, Lazglafta taŋ. Ka magatá həŋ ta ler hkən guli ta manigiŋtá ta dmakuha, ta tsəlɓə ta kəma Yawe, Lazglafta taŋ. 4 Ma tsa vli tskala ŋa la Levi ya, ka nzatá i Yəhusuwa, nda Bani, nda Kadmiyel, nda Səbaniya, nda Bunni, nda Sereviya, nda Bani, nda Kənani. Ka sladatá həŋ ka ɗawa katu da Yawe, Lazglafta taŋ nda lwi dagala dagala. 5 Ka la Levi i Yəhusuwa, nda Kadmiyel, nda Bani, nda Hasabniya, nda Sereviya, nda Hudiyya, nda Səbaniya, nda Pətahya mantsa: « Sliʼafwa sliʼa, zləzləvawa Yawe, Lazglafta ghuni dər yawu tsi ŋa ɗekɗek. Ka zləzləva inda mndu ta glakwa hga gha ta malaptá inda zləzləvu nda inda ghubu, » ka həŋ.

6 Kagha turtukwa gha Yawe! Kagha ta zlagigiŋtá luwa, luwa ta ghəŋa luwa nda inda skwiha tida tani. Kagha ta zlagigiŋtá haɗik nda inda skwiha mida tani. Mantsa ya drəfha guli nda inda skwiha mida. Kagha ta famtá hafu ma inda tsa skwiha ya. Ta tsəlɓu inda skwiha ta luwa ta kəma gha.

7 Kagha Yawe, Lazglafta ta zbaptá Abram. Ka klagaptá ka ma Ur ta haɗika Kaldiya. Ka tsanaftá ka ta hgu ka Abraham. 8 Ka nghanatá ka ta ŋuɗufa ni ka vərɗa ni ta wa ira gha, ka dzraftá ka ta wi nda tsi, ka tanaftá ka imi ta sləməŋ ŋa vlaŋtá zivirha ni ta haɗika la Kanʼana, nda la Het, nda la Amuru, nda la Periz, nda la Yəbus, nda la Girgis. Hɗanam hɗa ka ta tsa gwaɗaha gha ya, kabga tɗukwa ka.

9 Nghaŋ ngha ka ta ghuya ɗaŋwa dzidzíha ŋni ma Masar, snaghaghasna waha taŋ ma nzakwa taŋ ta wa drəfa Zaŋwafiha. 10 Ka maganatá ka ta mandərmimiha nda mazəmzəmha ta Firʼawna nda inda kwalvaha ni, nda inda mndu ta haɗika ni, kabga nda sna kagha ta mndərga gla ghəŋ glə həŋ ta dzidzíha ŋni. Ndaɗaʼa tutá hga gha manda va ya ta nzakway gitana wu. 11 Tanaptá ka drəf tsəzlaʼ ta dzidzíha ŋni, ka tsughwaɗapta həŋ ta drəf ta ghwalata vli. Ama ka pghaghatá ka ta inda tsa gwal ta zbiŋtá həŋ ya da gudzuvruŋ, ka zaghata həŋ tɗem da imi manda pala. 12 Nda kusay sundul klafta ka ta mnduha gha gifitik, nda vu sundul klafta ka ta həŋ girviɗik, ŋa tsuwaɗakanatá tvi ta həŋ ta mbaɗ həŋ ta mbaɗa. 13 Ka saha ka daga ta luwa ka gwaɗganatá ka ta həŋ ta ghwá Sinay. Ka mnanaftá ka ta həŋ ta guma tɗukwa, nda vərɗa tagha skwi, nda ŋərma zlahuha nda dvuha. 14 Nda ma kwalva gha Musa, ka snanamtá ka ta həŋ ta Sabat, fitik nda fa ka ŋa gha. Ka mnanaftá ka ta həŋ ta dvuha nda zlahuha. 15 Ka vləganatá ka ta həŋ daga ta luwa ta skwa zay ŋa ghəzla maya taŋ. Ka mbəzəganaptá ka ta imi ma kutumba ta həŋ ŋa ghəzla ndala taŋ. Ka ghunaftá ka ta həŋ da zatá haɗik ya tanaf ka ta imi ta sləməŋ nda waɗu ta həŋ, ŋa vlaŋtá həŋ.

16 Ama ka glanaftá dzidzíha ŋni ta ghəŋ ka təŋanaftá. Ka kwalaghutá həŋ ta snatá zlahuha gha. 17 Ka kwalaghutá həŋ ta snata, havak a həŋ ta mazəmzəmha gha ta maganatá həŋ wa. Ka təŋanaftá həŋ ta ghəŋ, ka fatá mgham ŋa vru da ga vuʼa taŋ ma Masar. Ama kagha, zlanava a ka ta həŋ wu, kabga Lazglafta ta pla dmaku ka, ta magay ka ta zɗakatahuɗi, nda tawa hiɗahiɗa. Zlah ta ɓasa ka ta ŋuɗuf, dagala zɗakwa gha, wuɗiŋ a ka ta həŋ, 18 kulam nda slranafta taŋ ta ghəŋa taŋ ta mamakwa sla nda kfur nwap həŋ. Ka həŋ mantsa: « Wana Lazglafta gha ta klagaghapta ma Masar, » ka həŋ. Ma tsa magata taŋ mantsa ya, razagharaza həŋ katakata, 19 ama kabga fərta ta hiɗahiɗa gha, zlanava a ka ta həŋ ma mtak wu, laghu a kusay sundul ta kla həŋ ta tvi gifitik, nda vu sundul ta kla həŋ ka tsuwaɗakanatá vli ta həŋ ta mbaɗ həŋ ta mbaɗa ta tvi girviɗik wa. 20 Ma zɗakwa gha, ka vlaŋtá ka ta Sulkuma gha ta həŋ ŋa vlaŋtá mahizl ta həŋ. Klaghu a ka ta manna gha ta wa taŋ wu, vlaŋ vla ka ta imi ta həŋ ŋa ghəzla ndala taŋ. 21 Fwaɗ mbsak vakwa gha ta nghapta ka həŋ ma mtak, haɗ sana skwi pɗa həŋ wa. Rdu a lgutha taŋ wu, haslaf a səlaha taŋ wa. 22 Vlaŋ vla ka ta ga mghamha nda mndəra mnduha ta həŋ, ka tsatsanaftá ka ta vliha ta həŋ. Ka zatá həŋ ta haɗika Sihuŋ mghama Hesbuŋ, nda haɗika Ghug mghama Basaŋ. 23 Ka yanaftá ka ta zivira taŋ tusak manda tekwatsaha ta luwa, ka hladaghatá ka ta həŋ ta tsa haɗik mnana ka ta dzidzíha taŋ ya, ŋa lama taŋ ka zata ya. 24 Ka lam həŋ ka zutá tsa haɗik ya ŋa taŋ. Ka raghwanatá ka ta kəma taŋ ta la Kanʼana ta nzaku tsa haɗika ya. Ka vlatá ka ma dzva taŋ ta mghamha taŋ, nda mnduha ma tsa haɗik ya, ŋa magay taŋ ŋa taŋ ta skwi manda ya kumaŋ həŋ. 25 Ka hlaghutá həŋ ta luwaha ma matsaka huzlu, nda vwahha ya zɗa zɗa. Ka zutá həŋ ta həgaha nda ndagha inda nda skwiha ɗina ɗina mida, nda ghwa lalap lu, nda inabiha, nda zaytunha, nda ndəghata fuha ta zə lu nda za. Ka zə həŋ, ka babaghaku həŋ, ka uwaʼuwaslaku həŋ. Ka zə həŋ ta mghama taŋ ma zɗakwa gha dagala.

26 Ama ka kawalaghutá həŋ ta snata ka gavaghatá sidi, ka wuɗiŋtá həŋ ta zlaha gha nda ga mahulhul. Ka pslatá həŋ ta anabiha ta mna gwaɗa ta kala wa taŋ ŋa varanaktá həŋ da kagha. Ka rarazaghatá həŋ katakata. 27 Tsaya tama ka vlatá ka ta həŋ ma dzva ghumaha taŋ, ka ganaptá həŋ ta iri ta həŋ. Ma tsa ghuya ɗaŋwa taŋ ya, ka wahu həŋ ta wahu da kagha. Ka snagatá kagha daga ta luwa, ma tsa tawa hiɗahiɗa gha katakata ya, ka vlaŋtá ka ta həŋ ta mnduha ta hlaptá həŋ ma dzva ghumaha taŋ. 28 Ama manda mutsafta taŋ ta nzaku nda zɗaku ná, ka zlrəglaftá həŋ ta magaghatá ghwaɗaka skwi. Ka zləglaŋtá ka ta həŋ ma dzva ghumaha taŋ. Ka nzanaghatá tsaha ya ta ghəŋa taŋ. Ka wahugəltá həŋ ta wahu da kagha. Ka snagatá ka daga ta luwa. Ka gɗatá ka ta katá həŋ kabga dagala tawa hiɗahiɗa gha. 29 Ka dvə ka ta həŋ ŋa vragaghata da zlaha gha, ama hahəŋ ma gla ghəŋa taŋ, ka kwalaghutá həŋ ta snatá zlahuha gha. Ka gaghatá həŋ ta dmaku ka ɓlanaptá skwiha mnaf ka. Nziya nza tsi ná, ka sna sna mndu ta nza nza nda hafu. Ka mbəɗaghatá həŋ ta hul, ka təŋanaftá ghəŋa taŋ, ka kwalaghutá snata. 30 Nda kɗa vakwa gha ta ksa ŋuɗuf nda həŋ. Ka vlaŋtá ka ta Sulkuma gha ta anabiha ŋa dvanaghatá həŋ, ama fagha həŋ ta sləməŋ wa. Mantsa tama, ka vlatá ka ta həŋ ma dzva mndəra sana mnduha. 31 Kulam nda tsa, dabga tsa tawa hiɗahiɗa ni gha katakata ya, zaɗana a ka ta həŋ wu, zlanava a ka ta həŋ wu, kabga Lazglafta ta zɗakatahuɗi nda tawa hiɗahiɗa ka.

32 « Lazglafta ŋni, kagha Lazglafta dagala, ta mbruta, makwitkwit ka, ta ŋana ŋa ka kahwathwata ta dzratá wa gha nda zɗakwa gha ŋa ŋni. Ndanana ná, ma nghə ka ka skwi kwitikw ta inda ghuya ɗaŋwa ya ta gruŋnusta nda mghamha ŋni, nda maliha ŋni, nda gwal ta draŋnatá skwi ŋa Lazglafta, nda anabiha ŋni, nda dzidzíha ŋni, nda inda mnduha gha, zlrafta ta fitika mghamha Asur ha ka sagha ta na fitik na. 33 Ama nza nza kagha tɗukwa ka vərɗa mndu ma inda tsa skwiha ta slaŋnaghata ya, dər má ta ga sidi aŋni. 34 Ksa a mghamha ŋni, nda maliha ŋni, nda gwal ta draŋnatá skwi ŋa Lazglafta, nda dzidzíha ŋni ta slna nda tagha skwa gha wa. Fa a həŋ ta vgha taŋ ka maga slna nda zlahuha gha, nda ya nda dvu ya ta dvanaghata ka ta həŋ wa. 35 Ma ga mghama taŋ nda baghatá həŋ da inda skwiha ɗina ɗina vlaŋ ka ta həŋ ta haɗik ya dagala zɗa ya pgha ka ta həŋ tida ná, maga gha a həŋ ta slna wa. Mbəɗana a həŋ ta hul ta ghwaɗaka slnaha taŋ wa. 36 Gita, wana ŋni ka vuʼa. Tsəna haɗik vlaŋ ka ta dzidzíha ŋni, ŋa zay taŋ ta mghama taŋ nda inda tsa skwiha ya ná, ta ga vuʼa ŋni tida. 37 Tsa skwi ta ŋwaku ta tsa haɗik ya ná, nda nza ŋa mghamha ya vla ka ta aŋni ma dzva ni dabga dmakuha ŋni. Mbaɗa həŋ ka ga mgham ta ghəŋa aŋni nda rina ŋni tani manda ya kumaŋ həŋ. Ka nzaku ŋni tulek katakata, » ka həŋ.