Nəhemiya 10

Kurata mnduha ta snatá zlahu

1 Nghadapta ŋni ta inda tsa skwiha ya, ka dzraftá ŋni ta wi ka vindafta. Ta tsa ɗelewer ya, ka faftá lu ta ŋizla tida, ka thaftá i maliha ŋni, nda la Leviha ŋni, nda gwal ta draŋnatá skwi ŋa Lazglafta ta dzvu tida. 2 Tsa gwal ta thaftá dzvu ya ná, wya həŋ: I guvna Nəhemiya zwaŋa Hahaliya, nda Tsidkiya, 3 nda Səraya, nda Ghazarya, nda Irmiya, 4 nda Pashur, nda Amarya, nda Malkiya, 5 nda Hattus, nda Səbaniya, nda Malluh, 6 nda Harim, nda Məreymut, nda Ubadiya, 7 nda Danyel, nda Gintuŋ, nda Baruh, 8 nda Məsulam, nda Abiya, nda Miyamiŋ, 9 nda Maʼaziya, nda Bilgay, nda Səmaʼaya. Inda tsaha ya ná, gwal ta dra skwi ŋa Lazglafta həŋ. 10 La Levi na: I Yəhusuwa, zwaŋa Azaniya, nda Binnuwi, mataba zwana Henadad, nda i Kadmiyel, 11 nda mnduha taŋ i Səbaniya, nda Hudiyya, nda Kəlita, nda Playa, nda Hanaŋ, 12 nda Miha, nda Rehuv, nda Hasavya, 13 nda Zakkur, nda Sereviya, nda Səbaniya, 14 nda Hudiyya, nda Bani, nda Beninu. 15 Maliha ta ghəŋ mnduha guli na: I Parus, nda Pahatmuwav, nda Ilam, nda Zattu, nda Bani, 16 nda Bunni, nda Azgad, nda Bebay, 17 nda Aduniya, nda Bigvay, nda Ghadiŋ, 18 nda Ater, nda Yəhizkiya, nda Ghazur, 19 nda Hudiyya, nda Hasum, nda Betsay, 20 nda Harif, nda Anatut, nda Nebay, 21 nda Magpiʼas, nda Məsulam, nda Hezir, 22 nda Mesezavʼel, nda Tsaduk, nda Yadduwa, 23 nda Platiya, nda Hanaŋ, nda Anaya, 24 nda Huseyagh, nda Hananya, nda Hassuv, 25 nda Halluhes, nda Pilha, nda Suvek, 26 nda Rəhum, nda Hasavna, nda Maʼaseya, 27 nda Ahiya, nda Hanaŋ, nda Anaŋ, 28 nda Malluh, nda Harim, nda Baʼana, hahəŋ guli.

29 Ka gwaftá sanlaha ma mnduha nda gwal ta dra skwi ŋa Lazglafta, nda la Levi, nda gwal ta ngha wa tgha, nda gwal fa laha, nda kwalvaha həga Lazglafta, nda inda gwal ta dgaghutá vgha nda mayəm ŋa ndiʼaftá vgha ta zlaha Lazglafta, nda miʼa taŋ, nda zwana zgwana taŋ nda kwagha taŋ, nda inda gwal prək ka snaŋtá skwi nda mahizl ma ghəŋa taŋ ta vgha, 30 nda zwana ma taŋ dagala dagala mataba taŋ tani. Ka waɗata kahwathwata kazlay na: Dzaʼa nzay ŋni ta nzaku manda ya mna zlaha Lazglafta nda ma wa Musa kwalva Lazglafta kəʼa. Dzaʼa sna sna ŋni, dzaʼa ksay ŋni ta slna nda inda zlahuha Yawe, mghama ŋni, nda ya nda gumaha ni, nda gwaɗaha ni mnaf tsi. Ka mantsa a tsi wu, ka ksiʼaŋnafksiʼa tsi.

31 Haɗ ŋni dzaʼa vla kwagha ŋni, ŋa gwal ta nzata ta na haɗik na ma fitika hlaghatá mnduha da ga vuʼa wa. Hləta a aŋni guli ta kwagha taŋ ŋa zwana ŋni wa. 32 Ka hlak hla həŋ ta zimi nda sanlaha ma huzlaha ŋa skwapta baɗ Sabat nda ya baɗ fitika skalu katsi, haɗ ŋni dzaʼa walaŋta skway wa. Inda magatá vaku ndəfáŋ ya ná, dzaʼa zlana zla ŋni ta vwaha ŋni ma madza, dzaʼa zlanaŋ zla ŋni ta inda dəməŋha ŋni ta mndu guli.

33 Ka fatá ŋni ka zlahu ta vlay ŋni ta turtuk ma dgatá darama tsedi hkən inda vaku ŋa slna həga Lazglafta mu. 34 Tsa tsedi ya ná, nda nza ŋa gɗata ta skwa buradi ŋa fanatá Lazglafta, nda mbəhu nda nimaya ta hlakta lu ŋa mbəhu inda fitik, nda skwa pla ghəŋ tsuh tsuh. Nda nza guli ŋa skwa skwi ŋa pla ghəŋ baɗ Sabat, nda ya ma ngha tili, nda ya ma fitika sanlaha ma skaluha ghuni. Nda nza guli ŋa skwa sanlaha ma mbəhuha ta fanata lu ta Lazglafta, nda skwa pla ghəŋ ya ta hladaghata la Israʼila ŋa mutsa pla dmakuha. Nda nza guli ŋa maga inda slna həga Lazglafta mu. 35 Ka vzaftá aŋni gwal ta dra skwi ŋa Lazglafta, nda la Levi, nda hamata mnduha tani, ta vindima ŋa dagapta mataba ŋni ta fitik ya ŋa hlakta mndəra mndu ta hasuʼu ŋa həga Lazglafta. Ŋa hlakta inda vaku ta tsa fitik tsaf lu ya ta hasuʼu manda ya ta raku, ŋa dra skwa pla ghəŋ ta gwira Yawe, Lazglafta mu, manda ya vindaf lu ma zlahu.

36 Inda vaku, dzaʼa hlakta ŋni da həga Yawe ta taŋtaŋa yakwa inda skwi hva ŋni nda hva, nda taŋtaŋa yakwa inda fuha ŋni. 37 Dzaʼa hlak hla ŋni ta zumaliha mataba zwana zgwana ŋni, nda ŋa riniha ŋni, manda ya nda vinda ma zlahu. Dzaʼa hlak hla ŋni ta zumala slaha ŋni, nda rina fisik da həga Lazglafta mu, ŋa vlaŋtá gwal ta dra skwi ŋa Lazglafta ma həga Lazglafta mu. 38 Dzaʼa hlak hla ŋni ta taŋtaŋa hwaɗatá hpwa ŋni. Dzaʼa hlak hla ŋni ta mbəhuha yakwa inda fu, nda ima inabi ka nuni, nda rɗi, ka vlaŋtá gwal ta dra skwi ŋa pghata ma dzuguviha huzlaha ma həga Lazglafta mu. Dzaʼa hlanakhla ŋni ta la Levi ta zaka skwiha hva ŋni nda hva. Ŋa dzaʼa tsa la Levi ya ka ghəŋa taŋ da hlaktá tsa zaka ya ma va tsa vli ta hvə ŋni ta hva ya. 39 Ŋa dzaʼa mnda dra skwi ŋa Lazglafta mataba mndəra la Haruna kawadaga nda la Levi, baɗ tsa fitik dzaʼa hlapta la Levi ta zaka ya. Ŋa hlakta la Levi ta zaka ma tsa zaka ya da həga Lazglafta mu da dzuguva ɗifa skwi. 40 Ŋa hlakta la Israʼila, nda la Levi ta mbəha alkama, nda ima inabi ka nuni, nda rɗi, ka pghamta ma dzuguviha huzlaha həga Lazglafta. Ma tsa dzuguviha huzlaha ya ta nzakwa huzlaha tsa həga ya, nda gwal ta dra skwi ŋa Lazglafta ta maga slna, nda gwal ngha wa tgha, nda gwal fa laha. Mantsa ya ná, haɗ ŋni dzaʼa zlanavatá həga Lazglafta mu wa.