Dzaŋafta Izra ta zlaha Musa ta kəma mnduha demdem
8
1 Ka tskavatá inda mnduha tuts ka skwa turtuk ta daɓi ta wa tgha Imi. Ka həŋ nda Izra mnda tagha zlahuha ya mantsa: « Klagap kla ta deftera zlaha Musa vlaŋ Yawe ta la Israʼila ya, » ka həŋ nda tsi. 2 Mantsa tama, baɗ taŋtaŋa fitik ma tila mandəfáŋ, ka klagaptá Izra, mnda dra skwi ŋa Lazglafta ta tsa deftera zlahu ya ta kəma tskatá mnduha, zgwana, nda miʼaha, nda inda gwal nda mahizl ŋa snaŋta. 3 Ka dzaŋə tsi ta tsa daɓi ta kəma wa tgha Imi ya, daga wrək tghaha fitik ma ghəŋ, ta kəma zgwana, nda miʼaha, nda gwal nda mahizl ŋa snaŋta. Ka fatá mnduha demdem ta sləməŋ ka sna dzaŋa tsa deftera zlahu ya. 4 Ka sladagatá Izra mnda tagha zlahuha ta vli tskala magaf lu nda udzu paɗak ŋa tsa fitik ya. Ta vata ni, ka sladatá i Mattitiya, nda Sem, nda Anaya, nda Uriya, nda Hilkiyya nda Maʼaseya nda ga zeghwa ni. Nda ga zlaɓa ni guli ná, i Pədaya, nda Misaʼel, nda Malkiya, nda Hasum, nda Hasbaddana, nda Zakari, nda Məsulam. 5 Ma tsa nzəganaghata Izra ta mnduha demdem ya, ka gunanaftá tsi ta tsa defteri ya ta wa ira mnduha demdem. Manda gunanafta ni, ka sladatá mnduha demdem nda slada. 6 Ka rfanaghatá Izra ta Yawe, Lazglafta dagala. « Amin! Amin! » ka mnduha demdem kapaftá dzva taŋ. Ka tsəlɓatá həŋ ka zlambata zluzlumbruh ta kəma Yawe. 7 Tahula sliʼavata taŋ ka sladata ma va tsa vli ya, ka zlraftá la Levi i Yəhusuwa nda Bani, nda Sereviya, nda Yamiŋ, nda Akkuv nda Sabətay, nda Hudiyya, nda Maʼaseya, nda Kəlita, nda Ghazarya, nda Yuzabad, nda Hanaŋ, nda Playa ta tsislanaptá mnduha ta tsa zlahu ya. 8 Waɗeɗ ka həŋ ta dzaŋa tsa deftera zlaha Lazglafta ya, ka tsislanaptá həŋ ŋa snaŋta taŋ.9 Na snanata mnduha demdem ta tsa gwaɗaha ma zlahu ya, ka taw həŋ ta taw. Mantsa tama, ka mnə i guvna Nəhemiya, nda Izra mnda dra skwi ŋa Lazglafta, ta tagha zlahu, nda la Levi ta tsisla zlahu ya ŋa mnduha demdem, ka həŋ mantsa: « Nda fa na fitik gita u na ka ŋa Yawe, Lazglafta ghuni. Ma nza kuni zuzuʼuva, ma taw kuni ta taw, » ka həŋ. 10 Kaʼa nda həŋ mantsa: « Lawa la dzagha ka za kuni ta skwa zay zɗa, ka sa kuni ta skwa say gun guna. Tsatsanaf kuni ta gwal kul haɗ tsi da həŋ, kabga nda fa na fitik gita u na ka ŋa Mghama mu. Ma nza kuni zuzuʼuva! Nda nza rfu ta sagha da Yawe ka mbrakwa ghuni! » kaʼa. 11 Ka lɓanatá la Levi ta mnduha demdem. Ka həŋ mantsa: « Zlanawa taw, nda fa na fitik gita u na ka ŋa Lazglafta. Ma nza kuni zuzuʼuva! » ka həŋ. 12 Ka gazlaghatá mnduha dzagha da za skwa zay, nda sa skwa say. Tsatsanafha həŋ ta gwal kul haɗ tsi da həŋ, ka rfu həŋ ta rfu katakata, kabga nda sna həŋ tsiɗiɗ ta gwaɗaha ya snanam lu ta həŋ.
Skala dumbi
13 Ga mahtsima ni, ka sliʼadaghatá zəʼala həgaha la Israʼila demdem, nda gwal ta dra skwi ŋa Lazglafta, nda la Levi da Izra mnda tagha zlahu ŋa sna tsislatá zlahu. 14 Ma tsa vindatá zlahu vla Yawe nda ma dzva Musa ya, ka slanaghatá həŋ ta vindata ni kazlay na ka nzata la Israʼila ma dumbi ma fitika skala dumbi ma mandəfáŋa tili, 15 ka mnaŋta həŋ ta tsa skalu ya ŋa mnduha nda tiŋta ma inda luwaha taŋ nda ya ma Ursalima kəʼa, ka lu na: « Sliʼagapwasliʼa ka dzaʼa kuni ta ghwáha, ka hlagata kuni ta zligamaha fwa zaytuŋ, nda zaytuŋa mtak, nda miyaɗ, nda sluhwa zlizlam, nda mubuk ŋa maga dumbiha, manda tsa nda vinda ya, » ka həŋ. 16 Ka sliʼaftá mnduha ka laghu da hlagatá tsa zligamaha ya. Ka mamagaftá həŋ ta dumbiha taŋ, ta dədəma ta ghəŋa həga taŋ, ta daɓi tgha taŋ, ta daɓi tgha həga Lazglafta, ta daɓi ta wa tgha Imi, nda ya ta daɓi ta wa tgha Ifrayim. 17 Ka babaftá inda tsa tskata mnduha ta varagaghata si hlagha lu ta həŋ ya ta dumbiha, ka nzanzamta mida, kabga magaŋ a la Israʼila ta tsa skalu ya daga ta Yəhusuwa zwaŋa Nuŋ ha ka sagha baɗ tsaya wa. Ka rfu həŋ ta rfu katakata. 18 Ka dzaŋə lu ŋa taŋ inda fitika tsa skalu ya ta deftera zlaha Lazglafta, daga baɗ taŋtaŋa fitika ni ha ka kɗavakta fitika ni. Ndəfáŋ ka həŋ ta zatá fitik ta skala tsa skalu ya. Baɗ matghas fitik, ŋa tskafta taŋ ta tska vgha dagala manda ya mnaf lu.