Maɗgwirmaɗgwira la ghuma
6
1 Ka snaŋtá i Samballat nda Tubiyya, nda Gesem la Arav, nda pɗakwa ghumaha mu kazlay baf ba yu ta matsak, ta haɗ sana vli ta pɗata dər ka kiʼa wu kəʼa. Aŋ mndani, kulam ndana ta la a yu da pəghamtá parawalha wa. 2 Ka ghunaftá i Samballat nda Gesem ta mndu da hga iʼi ŋa tska vgha kawadaga nda həŋ sana luwa ma didiŋa ma Unu. Mamu həŋ si nda ndana magihatá ghwaɗaka skwi. 3 Ka yu ghunaftá mnduha zlghanaftá həŋ mantsa: « Mamu slna dagala ta mag yu, haɗ yu dzaʼa mutsaftá laha wu, ka sliʼaf sliʼa yu ka laghu slaghunaghata katsi ná, dzaʼa slada slada slna, » ka yu. 4 Fwaɗ səla taŋ ta hga iʼi manda va tsaya, manda va tsaya ta zlgha yu ta wa ni ŋa taŋ. 5 Ka ghunigaɗaghatá Samballat ŋa mahutafa səla ta kwalva ni manda va tsaya, nda gunatá ɗelewer ma dzvu. 6 Wya ka lu vindafta:« Ka lu ta mnay mataba mndəra sana mnduha manda ya mnə Gesem ná, ta kumay kagha nda la Yahuda ga sidi, tsaya kəl ka ka ba matsak. Kagha dzaʼa nzakway ka mghama taŋ guli, ka lu ta mnay. 7 Zabaf zaba ka ta anabiha ŋa mna gwaɗa ta kagha ma Ursalima kazlay nda nza ka ka mghama la Yahuda kəʼa! Dzaʼa snanagha sna tsa gwaɗa ya ta mgham manda va tsaya, sawi ka dzrafta mu. »
8 Ká yu ghunaftá mndu ŋa zlghanaftá wa ni mantsa: « Haɗ ya dər turtuk ma tsa skwiha ta mnə ka ya ta maguta wu, kagha tani ta ndanay ma ŋuɗufa gha mantsa ya, » ka yu. 9 Tsaw kumaŋ kuma hahəŋ demdem ta gaŋnaftá zləŋ. « Dzaʼa rwaku mala taŋ ŋa kwala tsa slna ya magaku, » ka həŋ ta mnay. Ndanana tama Lazglafta ɗa, mbra ta iʼi ma slna ɗa!
10 Ma sana fitik, ka sliʼafta yu ka lagha da Səmaʼaya zwaŋa Dəlaya zwaŋa Mehetabeyel, kul mutsaftá sagha da iʼi ya. Kaʼa nda iʼi mantsa: « Ŋa guyay u ta vgha ma həga Lazglafta, ma huɗa tsa həga ya, ŋa hafta u ta wa tghaha ni, kabga dzaʼa sagha sa həŋ da dzatá kagha. Girviɗik dzaʼa sagha həŋ da dzatá kagha, » kaʼa. 11 Ka yu mantsa: « Mndu manda na iʼi na dzaʼa hwaya ra? Wati ma mndu ya manda iʼi dzaʼa lami da huɗa həga Lazglafta ŋa nzata ni nda hafu na? Haɗ yu ta lam wu, » ka yu. 12 Ka tsatsaftá yu ná, Lazglafta a taghunafta wa. Kəl tsi ka mna tsaya ná, kabga skwa nda skwa i Tubiyya nda Samballat. 13 Ŋa tsaya planata lu ŋa giɗiftá zləŋ, ŋa snata ɗa ta gwaɗa ni, ŋa gata ɗa ta dmaku, ŋa mutsafta taŋ ta skwi ŋa raza iʼi, ŋa pghiɗaghatá hula.
14 Ari Lazglafta ɗa, havap hava ka i Tubiyya nda Samballat ta ghəŋa tsa slna taŋ ta magata ya, mantsa ya guli ta ghəŋa anabi Nuʼadiya ka marakw ya, nda pɗakwa sanlaha ma anabi ta kuma giɗiftá zləŋ ya!
15 Ka kɗiŋtá lu ta baftá matsak baɗ hisambsak hutaf mida ma tila Ilul. Gwagwata fitik ta maga tsa slna ya ná, fitik hutaf mbsak his mida həŋ. 16 Manda snaŋta inda ghumaha ta tsa gwaɗa ya, ka ksaftá tsi ka zləŋ ta inda mndəra sana mnduha ta waŋnafta. Ka ksutá tsi ta həŋ ka hula katakata, kabga snaŋta taŋ kazlay nda kɗa tsa slna ya kəʼa, nda katá mnda Lazglafta mu.
17 Ma tsa fitik ya, ka va tsghə gwal dagala dagala mataba la Yahuda ta ɗelewer ka suskwa ŋa Tubiyya, ta lagha la ŋa Tubiyya guli da hahəŋ. 18 Tsaw nda ndəgha sanlaha ma la Yahuda ta hbinistá huta nda waɗata nda Tubiyya, kabga klaf kla ta makwa Sekaniya zwaŋa Arah. Klaf kla zwaŋa ni Yəhuhanaŋ guli ta makwa Məsulam zwaŋa Berekiya. 19 Ka ghubu həŋ ta ŋərma slnaha ni ta kəma ɗa, mbaɗa həŋ ka hla gwaɗaha ɗa guli ŋa ni. Mbaɗa Tubiyya ka vinda ɗelewer ŋa ga zləŋ ŋa ɗa.