Masanapta Nəhemiya ta ima taw ma iri ta gwal nda hta
5
1 Ma sana fitik, ka wah zgwana nda miʼaha ta wahu ta ghəŋa skwi ta mag zwana ma taŋ la Yahuda. 2 Ka sanlaha ta mnay mantsa: « Nda ndəgha ŋni nda zwana ŋni, zgwana nda kuʼaha tani. Ta kumay ŋni ta mutsaftá skwi ŋa zaŋta ŋa tsaŋnamtá hɗits, » ka həŋ. 3 Ka sanlaha nda ŋa taŋ: « Ta vla vla ŋni ka muluɗay ta vwaha ŋni, nda inabiha ŋni, nda həgaha ŋni, ŋa mutsa skwi ŋa zaŋta ma maya, » ka həŋ. 4 Ka sanlaha nda ŋa taŋ guli: « Nzawa ta ɓlafta ŋni ta vwaha ŋni, nda ya ta inabiha ŋni, ŋa pla dzəmna ŋa mgham. 5 Va mndəra mndu turtuk mu ya kay guli! Nda ghəŋa ni a zwana ŋni nda ŋa taŋ wa. Ama nda nza tkweʼ ka vlata ŋni ta zwana zgwana ŋni, nda kwagha ŋni, ka kwalva. Nda nza sanlaha ma kuʼaha ka vuʼa. Haɗ sana skwi lavgliŋ aŋni ta magay wa, kabga nda nza vwaha ŋni, nda inabiha ŋni ka ŋa sanlaha, » ka həŋ.6 Snaŋta ɗa ta wahu taŋ nda tsa gwaɗaha ya ná, ka drə tsi ta ŋuɗuf. 7 Tahula ndananaghata ɗa ta ndanu ná, ka davanaghatá yu ta gwal dagala dagala, nda la mali. Ka yu nda həŋ mantsa: « Ta mbəlay kuni ta zwana ma ghuni, ka fa imi ta ghəŋ nzawa ta tsafta həŋ da kaghuni, » ka yu. Ka hgatá yu ta hgu ŋa tskavata. 8 Ka yu nda həŋ mantsa: « Nda skwi ya laviŋ mu ta magata varagaghata mu ta zwana ma mu la Yahuda dzawanap lu ta mndəra sana mnduha. Ama kaghuni ka ghəŋa ghuni ta dzawuglaptá zwana ma ghuni, ŋa va tsa amu ya ta dzawapta kuni ta həŋ guli, » ka yu. Ka trapta həŋ ta skwi ŋa gwaɗay, ka nzata həŋ tsətsəriɗ. 9 Ka kɗaŋtá yu ta gwaɗa: « Ɗina a tsa skwi maga kuni ya wa. Nzawa nza ta nzaku ma zləŋa Lazglafta mu, ŋa wara razuha da sanlaha ma mndəra mnduha, ta nzakway ka ghumaha mu. 10 Iʼi, zwana ma ɗa, nda gwal ta ksihatá slna guli ná, Ɓlanaf ɓla ŋni ta nzawa tsedi, nda alkama ta həŋ. Zlanama zla ta fanaghatá imi ta ghəŋa ni ta həŋ. 11 Varanavawavara ta həŋ gita gita ta vwaha taŋ, ta inabiha taŋ, ta zaytuŋha taŋ, nda həgaha taŋ, nda imi ta ghəŋa tsedi, nda ya ta ghəŋa alkama, nda ya ta ghəŋa ima inabi ka nuni, nda ya ta ghəŋa rɗi, ya si zlaghaghu kuni da həŋ ya, » ka yu. 12 Ka həŋ mantsa: « Dzaʼa maga maga ŋni ta tsa skwi mnaŋna ka ya, dzaʼa varanavavara ŋni ta həŋ, ɗawta a ŋni ta skwi da həŋ wa, » ka həŋ. Mantsa tama, ka hagagaghatá yu ta gwal dra skwi ŋa Lazglafta ŋa nzakwa taŋ ka masləmtsək. Ka yu nda gwal dagala dagala, nda ya nda la mali mantsa: « Waɗawa waɗa kazlay dzaʼa maga maga kuni ta tsa skwi kura kuni ya kəʼa, » ka yu. 13 Ka gəgdaŋtá yu guli ta lguta ɗa, ka yu ta ghəŋa ni mantsa: « Dər wa ta kwalaghuta hɗanamtá tsa gwaɗa ya ná, ka gəgdiŋgəgda Lazglafta ma həga ni, nda ya nda skwiha ni. Manda va tsaya dzaʼa gəgduta tsi ka nzata bɗadar, » ka yu. « Amin! Ka nza tsi mantsa! » ka mnduha demdem. Ka zləzləvə həŋ ta Yawe. Ka magata mnduha manda va tsa kura həŋ ya.
14 Daga baɗ va tsa fitik ya, ka fatá lu ta iʼi ka guvna ta haɗika Yahuda, zlrafta ni ta mahisambsaka vakwa mgham Artahsasta ta pala, ha ka lagha ta mahkən mbsak his mida vakwa ni ta pala. Ma tsa vakuha ghwaŋpəɗ his ya, dər iʼi, dər la ini, ɗaŋ a ŋni ta dzəmna guvna wa. 15 Makəɗ iʼi, tsa guvnaha ta laghu nda hul ya ná, ta mnduha si nzafta həŋ. Si ta hlaghu hla həŋ ta skwa zay, nda ima inabi, nda sulay fwaɗ mbsak ta ghəŋa ni, da həŋ. Ndaɗaʼa ka gwal si ta ksa slna kawadaga nda həŋ si ta ghuya mnduha wa. Ama iʼi, magaŋ a yu mantsa wu, kabga ta zləŋay yu ta Lazglafta ɗa. 16 Katək ná, vərɗa iʼi ta fata ghəŋa ɗa ka ŋavata ka ba matsak. Haɗ vli skwa yu wa. Gwaf gwa inda mnduha ɗa guli ta vgha ka maga slna. 17 Ta zuŋ za yu tazlay ta skwa zay ta la Yahuda nda la mali ta klaftá dərmək nda hutaf mbsak ga ini, kawadaga nda gwal ta sagha ma mndəra mnduha ta waŋnafta. 18 Inda fitik, ta payaf paya mnduha ta sla turtuk, nda zbatá tuwakha mkuʼ, nda skwi nda zlghəŋ. Ma inda maghwaŋa fitik, ta vliha vla lu ta ima inabi ŋulum. Kulam nda va tsaya, ɗawaŋ a yu ta dzumna ya ta raŋta guvna wa, kabga ndəganaghandəga slna ta mnduha. 19 Lazglafta ɗa, havap hava ka inda skwi ya magana yu ta na mnduha na, ka magihata ka ta zaɗaku.