4
1 Ama manda snaŋta i Samballat nda Tubiyya, nda la Arav, nda la Ghamuŋ, nda la Asdut kazlay ta payaypayay aŋni ta tsa matsaka Ursalima ya, ta kapaku kapaku, ta gwayaku gwayaku vliha ta zlazlapta kəʼa, ka ɓasaftá həŋ ta ŋuɗuf katakata. 2 Ka dzraftá həŋ demdem ta wi ka skwa turtuk ŋa sagha zlaguŋta Ursalima nda vulu nda ya ŋa hwazlaɓanafta. 3 Mantsa tama, ka magatá ŋni ta duʼa da Lazglafta ŋni, paghaha ŋni ta gwal ngha aŋni, nda fitik tani, nda rviɗik tani, ŋa pya həŋ. 4 Ama wya ká la Yahuda fay:« Ta haɗ mbraku ma gwal ta ksa slna wu,
ta ŋulum babata palaha kufik.
Laviŋta a mu ta bəgəldaftá na matsak na wu, » ka həŋ.
5 Ka ghumaha ŋni ta mnay na: « Snaŋta a həŋ wu, nghaŋta a həŋ ta amu wu, ta ghəŋa mataba taŋ dzaʼa dukwafta həŋ ta amu, ŋa pslata mu ta həŋ ka hlanatá tsa sla ya, » ka həŋ. 6 Ka mbəɗ la Yahuda ma inda vli ndusa nda həŋ ta səla da aŋni ŋa mnaŋnaŋta. Ta magay səla taŋ taghwaŋ mana mana, ka həŋ mantsa: « Saghuwa sa ta vata aŋni! » ka həŋ. 7 Ka payanatá yu ta vli ma didiŋaha ta hula matsak, nda ya ma vliha ta wa lilwa. Ka paghata yu ta mnduha ta uʼa taŋ ta uʼa taŋ, ka ghuɓu ka ghuɓu, nda hlatá budugwaha taŋ, nda gupaha taŋ, nda lgheɗ taŋ ma dzvu. 8 Tahula nghanata ɗa ta nzakwa mnduha, ka yu nda gwal dagala dagala, nda ya nda la maliha, nda ya nda hamata mnduha mantsa: « Ma zləŋ kuni ta ghumaha ghuni! Havakwahava ta Mghama mu dagala ta malaghutá mbraku, kəʼa. Vulawavula ta vulu ka ŋa zwana ma ghuni, nda zwana ghuni, nda kwagha ghuni, nda miʼa ghuni, nda ya ŋa həgaha ghuni, » ka yu. 9 Ka snaŋtá ghumaha ŋni kazlay snaŋnagha sna tsa skwi payaf həŋ ya, zliŋ zla Lazglafta kəʼa, ka vraftá ŋni demdem da matsak, ka dər wa ta slna ni.
10 Daga baɗ tsaya ná, rita sanlaha ma mnduha ɗa ya, ta ksa slna, rita sanlaha ya guli ná, nda hbatá vgha həŋ nda gupaha, nda zalamha, nda lgheɗha, nda zalamha ghuva ka kfur. Hegeuʼ la mali mali mista la Yahuda. 11 Tsa gwal ta ba matsak, nda tsa gwal hla pala ya ná, nda dzvu turtuk ta ksa həŋ ta slna, huzla vulu ma sana dzvu. 12 Tsa gwal ta ba matsak ya ná, inda taŋ nda fafatá budugwa ta ɓanava taŋ. Ta dzaʼa mista ɗa mista ɗa tsa mndu ta vya talakwaha ya. 13 Ka yu nda gwal dagala dagala, nda ya nda la mali, nda ya nda sanlaha ma mnduha mantsa: « Ta dagala slna ŋa magay ta wanafta na matsak na. Nda wiɗa vgha mu ta matsak, diʼiŋ sani nda sani. 14 Ka nda sna kuni ta vyata talakwa, dər ga kuni ya, ka tskakta kuni ta vgha ta vata iʼi. Dzaʼa vulamavula Lazglafta mu ta vulu, » ka yu. 15 Mantsa ya ta maga ŋni ta slna. Nzata nda ŋatá gupa ma dzvu ŋa rita mnduha mataba ŋni, na sabi wurək tghaha ka zlagapta tekwatsaha. 16 Ka yu nda mnduha guli, ma va tsa fitik ya mantsa: « Inda mali ta ghəŋa ghuɓu kawadaga nda mnda ksanatá slna, ka hana həŋ ma huɗa Ursalima, kada nzakwa həŋ ka gwal ta ngha amu girviɗik, ŋa magay taŋ ta slna gifitik, » ka yu. 17 Dər iʼi, dər zwana ma ɗa, dər kwalvaha ɗa, dər gwal ta ngha mndu ta dzaʼa mista ɗa, haɗ mndu ta suɗagatá lguta ni ta vgha wu. Inda mndu nda ŋatá huzla vula ni ma dzva zeghwi.