Nəhemiya
Nəhemiya
Snaŋta Nəhemiya ta gwaɗa ta Ursalima
1
1 Gwaɗa Nəhemiya, zwaŋa Hahaliya. Ma tila Kisəlev, ma mahisambsaka vakwa mgham Artahsasta ta pala. Wya ka skwi magaku ma fitika nzakwa ɗa ma Susaŋ, wudəma luwa, 2 ka ɓhadaghata Hana ni sani mataba zwanamaha ɗa si ma Yahuda, kawadaga nda sanlaha ma mnduha. Ka ɗawu yu da həŋ ta gwaɗa ta nzakwa la Yahuda, gwal ta ndapta mataba gwal si kasagha lu ta həŋ, nda ya ka kinawu nzakwa Ursalima. 3 Ka həŋ nda iʼi mantsa: « Tsa gwal ta pɗaku mataba tsa gwal hlagha lu, ma tsa haɗik ya ná, nda nza həŋ ka skwa hiɗahiɗa, ksu ksa hula ta həŋ, zaɗana zaɗa lu ta matsaka Ursalima, dariŋ dara lu ta wa tghaha ni nda vu. »Duʼa Nəhemiya
4 Na snaŋta ɗa ta tsa gwaɗa ya, ka nzata yu, ka taw yu ta taw, kidaghi fitika ɗa ma taw, ka sumə yu ta suma, ka mag yu ta duʼa ta kəma Lazglafta ta luwa, 5 ka yu mantsa: « Kdəkkdək, Yawe, Lazglafta ta luwa, Lazglafta dagala, ta malaghutá mbraku, ta ŋanatá dzratá wi, ta maga zɗaku ŋa gwal ta ɗvuta kagha, gwal ta ŋanata zlahuha gha! 6 Wya dzvu, fa fa ta sləməŋ, guna guna ta ira gha, ŋa sna duʼa kwalva gha ta mag yu ta kəma gha ndanana, nda fitik tani nda rviɗik tani, ŋa kwalvaha gha la Israʼila, nda mnigiŋtá dmaku la Israʼila, ya maga gha ŋni. Nda iʼi tani, nda gwal ga da ɗa tani, gaga ŋni ta dmaku. 7 Ziʼuziʼa ŋni katakata, sna a ŋni ta zlahuha gha, nda tva nzaku, nda skwiha ŋa magay mnana ka ta kwalva gha Musa wa. 8 Kdəkkdək, havagaghahava, ta gwaɗaha ya mnana ka ta kwalva gha Musa, kazlay na: “Ka ŋana a kuni ta gwaɗa ɗa manda ya ta raku wu, dzaʼa wutsighunis wutsa yu ta ma səla mnduha. 9 Ala ka vrak vra kuni da iʼi ya guli, ka snata kuni ta zlahuha ɗa, ka ksa slna nda tsi, dər má ta slərəŋa luwa wutsatá kaghuni, dzaʼa tskagaghunaghatska yu ma tsa vli ya, dzaʼa varagaghunaghavara yu da vli ya zbap yu ŋa gɗavata hga ɗa.” 10 Kwalvaha gha həŋ, mnduha gha həŋ, varagagha ka nda mbrakwa gha dagala nda ya nda mbrakwa dzva gha. 11 Kdəkkdək, mghama ɗa, fa fa ta sləməŋ ka sana duʼa kwalva gha, nda duʼa kwalvaha gha zɗəgana zləŋa hga gha. Magana maga ta skwi ya kumaŋ kwalva gha. Kdəkkdək, vlaŋ vla ta tva mutsafta ni ta zɗakatahuɗi da tsa mndu ya. » Ma tsa fitik ya ná, mndu ta vla ima inabi yu mgham.