Mutsafta Nəhemiya ta tvi ŋa sliʼi da Ursalima
2
1 Baɗ sana fitik ma tila Nisaŋ, ta mahisambsaka vakwa mgham Artahsasta ta pala ná, ka fatá lu ta skwa zay ta kəma ni. Ka klafta yu ta ghuzu, ka tanamtá mgham ma leghwa. Sgwama kuma ɗa, skwi ya ta kul walaŋta yu ta magata ta kəma ni. 2 Ka mgham nda iʼi mantsa: « Kabgawu kəl ka nzata sgwama na? Wana má ta ɗughwana ka. Nahgani ya ta ŋuɗufa gha? » kaʼa. Ka ksafta tsi ta iʼi ka zləŋ katakata. 3 Ka yu nda mgham mantsa: « Ta mblam ka hafa gha mghama ɗa! Waká yu dzaʼa kwal kul nzata sgwama tama? Tsa nzakwa ni ya ní, kusam ɓadzatá luwa ya lam lu ta dzidzíha ɗa, dru dra wa tghaha ni guli, » kaʼa. 4 Ka mgham nda iʼi mantsa: « Nu ta ɗaw ka da iʼi tama ɓa? » kaʼa. Ka gi mag yu tsa duʼa da Lazglafta ta luwa. 5 Ka yu nda tsi mantsa: « Ka zɗəgana zɗa tsi ta mgham, ta rfu ŋuɗufa ni guli ta ghəŋa vuʼa ni katsi, vliha vla ta tvi ka dzaʼa yu ta haɗika Yahuda, da luwa ya nda kula dzidzíha ɗa, ka bəglafta yu, » ka yu. 6 Ka mgham nda iʼi, ta nzaku markwa taŋ ta vata ni mantsa: « Kidaghi dzaʼa zakta ka ta fitika tsa mayəma gha ya? Yawu dzaʼa vrakta ka? » kaʼa. Ka tsanaftá yu ta fitika ni ta mgham, ka zɗəganata tsi ta mgham, ka zliɗista tsi ŋa dzaʼa. 7 Ka yu guli nda mgham mantsa: « Rvera ɗa, ta ndəɓa dzvu yu da kagha, ka vindiɗifta ka ta ɗelewerha ŋa valaŋtá guvnaha ta ɓla ghwa nda təv dɗakwa fitik, kada tsiɗiŋta həŋ ta tvi ŋa ɓhadaghata da Yahuda. 8 Vindiɗif ka guli ta ya ŋa vlaŋtá Asaf, mndu ya ta ghəŋa fuha mgham, kada vlihata tsi ta hasuʼuha prək ka maga wa tgha həga huzlu, ndusa nda həga Lazglafta, nda ya ŋa maga matsaka luwa, nda ya ŋa maga həga ya dzaʼa lam yu dida, » kaʼa. Ka vivindiɗifta mgham, kabga ta hula ɗa Lazglafta. 9 Ka sliʼaftá yu ka laghu, ka ɓhadaghatá yu da guvnaha ta ɓla ghwa nda təv dɗakwa fitik, ka vlaŋtá yu ta həŋ ta tsa ɗelewerha mgham ya. Tsaw ghunaf ghuna mgham ta maliha ta ghəŋa gwal vulu nda gwal ta plis, ŋa pgha iʼi. 10 Manda snaŋta i Samballat mnda la Huruŋ, nda Tubiyya la Ghamuŋ, ka kwalva ya, ta sagha mndu da kataŋta la Israʼila, ka kwal tsi zɗəganatá həŋ.Vlaŋta Nəhemiya ta mbraku ta gwal ba matsak
11 Manda ɓhadaghata ɗa da Ursalima, ka zata yu ta fitik hkən hada. 12 Haɗ mndu kulunus yu ta skwi ya fiɗim Lazglafta ma ŋuɗufa ɗa ŋa maganatá Ursalima wa. Tahula tsa, ka sliʼafta yu kawadaga nda sanlaha ma mnduha hudzekw girviɗik ka mbaɗa, ta ghəŋa kəɗih ta kla iʼi yeya rini da iʼi. 13 Ka sabi yu girviɗik ma luwa nda ta wa tgha Didiŋa, ka laghu təv Dzuɓaya Gərhaŋ, nda ya nda təv wa tgha Maghdzək. Ka nghanavata yu ta ɓadzatá matsak ta wamtá Ursalima, nda wa tghaha ni dghwaɗu vu. 14 Ka kɗaŋtá yu ta dzaʼa təv wa tgha Dzuɓay nda ya təv ghwa mgham, ama ka htatá vli ŋa laba tsa kəɗih nzaf yu tida ya. 15 Ma va tsa rviɗik ya, ka ŋladafta yu nda ma lika, ka nghanavata yu ta matsak. Ka vradamtá yu ka nda ta wa tgha Didiŋa. 16 Tsaw ta sna a gwal ta dzra gwaɗa ma luwa ta vli laghu yu, nda skwi ta mag yu wa, kabga ta rusanaf a yu karaku ta sana skwi ta la Yahuda, dər ŋa gwal ta dra skwi ŋa Lazglafta, dər ŋa gwal dagala dagala, dər ŋa gwal ta dzra gwaɗa, dər ŋa hamata mnduha ta ghəŋa sana slnaha wa.
17 Ka yu nda həŋ tama mantsa: « Nda nghay kuni ta nzakwa tuleka ta amu, ka kufik Ursalima, nda dara wa tgha ni. Sawa ka bəglafta mu ta matsaka Ursalima, kada kwala mu nzakway ma hula, » ka yu. 18 Ka rusanaftá yu ta həŋ ka Lazglafta nzata ta hula ɗa, nda gwaɗaha ya maniha mgham. Ka həŋ tama mantsa: « Sliʼafmasliʼa, bamaba, » ka həŋ. Mantsa tama, ka hbə həŋ ta vgha hageuʼ ŋa maga tsa ŋərma slna ya.
19 Ka snaŋta i Samballat mnda la Huruŋ, nda Tubiyya mnda la Ghamuŋ, ka kwalva ya, nda Gesem mnda la Arav, ka ghuɓas həŋ ta aŋni, ka hərtataŋnata. Ka həŋ mantsa: « Nahgani na skwi ta mag kuni na na? Ta kumay kuni ta dza kuma nda mgham ra? » ka həŋ. 20 Ka yu zlghanaftá həŋ mantsa: « Lazglafta ta luwa ka ghəŋa ni dzaʼa nzata ta hula ŋni. Aŋni kwalvaha ni ya, dzaʼa sliʼaf sliʼa ŋni maga slna ka bəglafta luwa. Haɗ ŋa ghuni mida wu, nzanagha a kaghuni ta ghəŋa Ursalima wu, haɗ mndu dzaʼa havakta ka kaghuni ma na luwa na guli wu, » ka yu.