1 Samuyel 30

Zata Dawuda ta ghwa ta ghəŋa la Ghamalek

1 Ta ɓhadaghatá i Dawuda nda mnduha ni baɗ mahkəna fitik da Tsiklag ná, ghada ghada la Ghamalek ta zləɗatá nda vulu ta haɗika Negev, nda ya ma luwa Tsiklag. Ka badzanatá həŋ ta Tsiklag ka driŋta nda vu. 2 Ka kasaftá həŋ ka vuʼa ta miʼaha, nda zwani tani, nda galata mnduha tani, ama haɗ mndu dza həŋ wa. Ka hlíŋtá həŋ ta həŋ ta vru həŋ dzagha taŋ. 3 Ta ɓhadaghatá i Dawuda nda mnduha ni da luwa, kəʼa ka həŋ ná, nda dra luwa, hlagha hla lu ka vuʼa ta miʼa taŋ, nda zwana taŋ, nda kwagha taŋ, 4 ka wahu i Dawuda nda mnduha ni ta wahu nda mbraku, ha ka hərfuta taŋ ma vəl wahu. 5 Hlagha hla lu ta miʼa Dawuda his his, i Ahinugham makwa la Yizrəghel, nda Abigayel, si markwa Naval mnda la Karmel ya.

6 Ka gurɗutá ŋuɗufa Dawuda katakata, kabga haɗ lu zlərtsata wu ri, ka tsa bakwa mnduha ya ta gwaɗay. Nda ŋəra ŋuɗufa inda mndu, dər wati ma mndu dabga zwana taŋ nda kwagha taŋ. Ama ka drəglaftá Dawuda ta ŋuɗuf nda zɗakatahuɗa Yawe, Lazglafta ni. 7 Ka Dawuda nda Abyatar, mnda dra skwi ŋa Lazglafta, zwaŋa Ahimelek mantsa: « Wya dzvu klagiɗagha ifut ya, » kaʼa. Ka klanaktá Abyatar. 8 Ka ɗawaŋtá Dawuda da Yawe, kaʼa mantsa: « Ka hwayiŋta yu ta na mnduha na ra? Dzaʼa ksaf ksa yu ta həŋ ra? » kaʼa. Ka Yawe nda tsi mantsa: « Hwayiŋ hwaya ta həŋ, dzaʼa ksaf ksa ka ta həŋ, dzaʼa kata kata ka ta tsa gwal ka vuʼa ya, » kaʼa. 9 Ka laghu i Dawuda nda tsa mnduha ni mkuʼ dərmək (600) ya^*. Ka ɓhadaghatá həŋ ta wa lika Bəsur ma vla pɗaghuta gwal nda gərɗa. 10 Ta kɗə i Dawuda nda mnduha fwaɗ dərmək (400) ta zbiŋtá həŋ ya ná, ta nzaghutá gwal his dərmək (200) hada, kabga nda hərfa həŋ ka tsughwaɗa tsa lika Bəsur ya.

11 Ka slaftá həŋ ta sana mnda la Masar ma mtak, ka ksaftá həŋ ka kladaghata da Dawuda. Ka vlaŋtá həŋ ta buradi ŋa zay, nda imi ŋa say. 12 Ka vlaŋtá həŋ ta gatuwa ghwalatá yakwa ghuraf, nda ghwalata zuŋura yakwa inabi. Zuta ni, ka vraktá ghəŋa ni, kabga hkən vagha ni hkən rviɗika ni, kul ɗaŋtá skwa zay nda imi. 13 Ka Dawuda nda tsi mantsa: « Wa mala ghuni, sagha ga ka na? » kaʼa. Kaʼa mantsa: « Duhwala la Masar yu. Kwalva sana mnda la Ghamalek yu, mahkəna fitika ɗa na manda zlaɗivata daŋahəga ɗa, kabga kwala ɗa kul ɗughwanaku. 14 Laghu la ŋni da zləɗata nda vulu nda ma suda kwakwara la Kəret, nda ya nda suda kwakwara la Yahuda, nda ya nda suda kwakwara la Kaleb, ka driŋtá ŋni ta Tsiklag, » kaʼa. 15 Ka Dawuda nda tsi mantsa: « Dzaʼa klay ka ta iʼi təv bakwa tsa mnduha ya ra? » kaʼa. Kaʼa mantsa: « Waɗiha waɗa nda hga Lazglafta, ka dzata a ka ta iʼi, vlata a ka ta iʼi ma dzva daŋahəga ɗa wu katsi, dzaʼa klay yu ta kagha təv bakwa tsa mnduha ya, » kaʼa.

16 Ka pghaftá tsi ta Dawuda. Wutsa wutsa la Ghamalek ta vgha ta inda tsa haɗik ya, ka zay, ka say, ka skalu nda skwa zləɗu ta fərtuta hlagaghu həŋ ta haɗika la Filisti nda ya ta haɗika la Yahuda. 17 Ka rdzak Dawuda ta həŋ daga ta tsughbura sərɗək baɗ va tsaya, ha ga hawu ga mahtsima ni. Haɗ mndu ma həŋ ta ndapta wu, ba duhwalha fwaɗ dərmək (400) ta ŋlaftá ŋalibwaha ka hwayaghuta yeya. 18 Ka zluʼatá Dawuda ta inda tsa gwal si hlagha la Ghamalek ya. Ka katatá tsi ta miʼa ni his his. 19 Haɗ mndu ta pɗaghuta wu, dər zwani, dər galata mnduha, dər zwana zgwana, dər kuʼaha, dər nahgani tsi ma skwa taŋ zləɗagha lu, dər nahgani ma skwa taŋ si hlagha lu. Ka vranaktá Dawuda demdem. 20 Ka hlaghutá Dawuda ta inda rina fisik nda slaha. Ka tsa gwal ta kla kəma ŋa tsa riniha ya mantsa: « Wana skwi zləɗagaghu Dawuda! » ka həŋ.

21 Ka vragaghatá Dawuda slanaghatá tsa mnduha his dərmək (200) ta hərfuta katakata ka dzaʼa mista ni, zlanava lu ta həŋ ta wa lika Bəsur ya kay. Ka sliʼaftá həŋ da gəma Dawuda nda mnduha ni. Ka gavadaghatá Dawuda, ka ɗawaŋta da həŋ ka ta ɗughwana həŋ. 22 Ama, ka inda mnduha ta sidi nda la falay si ta labi mista Dawuda ya mantsa: « Ya lab a hahəŋ mista mu ya wu, haɗ skwa zləɗu zluʼagap mu dzaʼa vlaŋta mu ta həŋ wu, ba miʼa taŋ, nda zwana taŋ yeya. Ka hla həŋ, ka sliʼa həŋ! » ka həŋ. 23 Ama ka Dawuda mantsa: « Zwana ma ɗa, ma mag kuni mantsa ya, ta ghəŋa skwi vlama Yawe. Tsatsi ta nghagamapta, ka vlata ma dzva mu ta ghuɓa tsa mnduha ta zləɗatá amu nda vulu ya. 24 Wa dzaʼa faghunatá sləməŋ ka sna tsaya? Ka skwa turtuk dzaʼa dga lu nda mndu ta laghu da vulu ma ghwa tani, nda mndu ta nzata ta vata huzla tani, ka tsitsiʼu dzaʼa dga inda hahəŋ, » kaʼa^*. 25 Ka fatá Dawuda ka zlahu, nda ya ka skwi ŋa gɗata ta magay mataba la Israʼila, ta ksə lu ta slna nda tsi daga baɗ tsaya ha gita.

26 Ɓhadaghata Dawuda da Tsiklag, ka hlaʼatá tsi ma skwa zləɗu ta skwi ka tsaghanaftá galata mnduha la Yahuda ka graha ni, nda mnanatá həŋ kazlay na: « Wana ŋa ghuni ma mbəhu, mayak ma skwi zləɗa lu ta ghumaha Yawe, » kaʼa. 27 Ka tsaghanaftá tsi ta la galata mndu ma Betel, nda gwal ma Ramuta Negev, nda gwal ma Yatir, 28 nda inda gwal ma Gharugher, nda gwal ma Sifmut, nda gwal ma Istemuwa, 29 nda gwal ma Rahal, nda gwal ma luwaha la Yərahməʼel, nda gwal ma luwaha la Keŋ, 30 nda gwal ma Hurma, nda gwal ma Burghasaŋ, nda gwal ma Ghatak, 31 nda gwal ma Hevruŋ, nda ya ma inda vli ŋla səla i Dawuda nda mnduha ni.