Vriŋta la Filisti ta Dawuda
29
1 Ka tskanatá la Filisti ta inda bakwa gwal vula taŋ ma Afek. Ta fatá la Israʼila ta ghuɓa taŋ ndusa nda dzuɓaya Yizrəghel. 2 Ka gavu maliha la Filisti nda bakwa sludziha taŋ dərmək dərmək (100), nda bakwa sludziha taŋ dəmbuʼ dəmbuʼ (1.000) ya, ta mbaɗ Dawuda nda sludziha ni ka kwanaha ni, nda Ahis. 3 Ka maliha la Filisti mantsa: « Nahgani ta mag la Hebru hadna na? » ka həŋ. Ka Ahis nda həŋ mantsa: « Dawuda, kwalva Sawulu, mghama la Israʼila a wu ra! Nda kɗa fitika ni kawadaga nda iʼi, ta slanagha a yu nda skwi ŋa dvanaghata ka yawu sagha ni ha ka sagha ta gita wu, » kaʼa*. 4 Ama ka ganavatá maliha la Filisti ta sida ta Ahis, ka həŋ nda tsi mantsa: « Ghəzliŋ ghəzla ta na mndu na! Ka vra tsi da vli ya fa ka. Ma la tsi da vulu kawadaga nda amu ma ghwata vulu, dá mbəɗavata tsi ka ghuma mu ma vulu. Ndana kagha ɓa! Kinawu ka na mndu na dzaʼa laviŋtá vru nda zɗaku da mghama ni, ka nda hlíŋta ni ta ghəŋa mnduha mu a tsi na? 5 Nana Dawuda na a fə lu ta laha ka skalu kazlay na:“Dəmbuʼ (1.000) pslata Sawulu ta ŋa ni,
dəmbuʼ ghwaŋ (10.000) pslata Dawuda ta ŋa ni” kəʼa kay wu ra? » ka həŋ*.
6 Ka hgaftá Ahis ta Dawuda, kaʼa nda tsi mantsa: « Ta waɗa waɗa yu nda hga Yawe nda hafu mida, tɗukwa mndu ka. Ta rfu yu nda nghay ɗa ta kagha ta dzaʼa da ghuɓu ka vragapta kawadaga nda iʼi, kabga haɗ ghwaɗaka skwi slanagha yu da kagha, daga ka yawu sagha gha da iʼi ha ka sagha ta gita wa. Ama zɗəgana a ka ta sanlaha ma maliha wa. 7 Vra! Ka dzaʼa ka nda vghata zɗaku, yaha lu magatá sana skwi kul zɗəganatá maliha la Filisti, » kaʼa. 8 Ka Dawuda nda Ahis mantsa: « Nahgani ya maga yu? Nahgani ya nghaŋ ka da iʼi kwalva gha, daga ka yawu nzakwa ɗa kawadaga nda kagha, ha ka sagha ta gita, ŋa kwala ɗa dzaʼa da vulu nda ghumaha mgham, rveri ɗa na? » kaʼa. 9 Ka Ahis zlghanaftá wi ta Dawuda mantsa: « Nda sna yu ɗina ɗina, zɗagiha zɗa ka manda duhwala Lazglafta*. Ama va a maliha la Filisti ta dzaʼa gha mista taŋ da vulu wa. 10 Kɗavakta ni ná, tsavaf tsava ga sərɗək, kawadaga nda kwalvaha mghama gha Sawulu ta sabi mista gha. Tsavafwa tsava ga sərɗək, ka dzaʼa kuni tsaɗakwər vli, » kaʼa.
11 Ga sərɗək tsaɗar vli, ka tsavaftá i Dawuda nda mnduha ni ŋa vru ta haɗika la Filisti, ta ŋlaghatá la Filisti da Yizrəghel.