1 Samuyel 28

1 Ma tsa fitik ya, ka tskanatá la Filisti ta bakuha gwal vula taŋ ka baku turtuk, ŋa vulu nda la Israʼila. Ka Ahis nda Dawuda mantsa: « Nda sna ka re, ɗina ka snaŋta gha kazlay na ta dzaʼa ka da vulu kawadaga nda iʼi kəʼa, kagha nda mnduha gha tani, » kaʼa. 2 Ka Dawuda nda Ahis mantsa: « Mantsa nzakwa ni! Dzaʼa nda ngha ka ta skwi dzaʼa mag kwalva gha, » kaʼa. Ka Ahis nda Dawuda mantsa: « Ɗina tsa! Dzaʼa fa fa yu ta kagha ŋa ɗekɗek ŋa ngha iʼi, » kaʼa.

Sawulu ga sana markwa ɗəgha

3 Mtuta Samuyel, ka tawamtá inda la Israʼila, ka paɗamtá lu ma Rama, ma luwa ni^*. Tsaw si hliŋ hla Sawulu ma haɗika ni ta ga ɗəgha, nda gwal ta gwaɗa nda gwal ma haɗik^*.

4 Ka tskavatá la Filisti, ka lagha fata ghuɓa taŋ ma Sunem. Ka tskanatá Sawulu ta inda la Israʼila, ka fatá həŋ ta ghuɓa taŋ ma Gilbuwa. 5 Ka nghaŋtá Sawulu ta ghuɓa la Filisti, ka zləŋaftá tsi ta zləŋ, ka tɗatá ŋuɗufa ni katakata. 6 Ka ɗawaŋtá Sawulu da Yawe, ama zlghanaf a Yawe ta wi wu, dər ma suni, dər nda ma Urim^*, dər nda da la anabiha wa. 7 Ka Sawulu nda kwalvaha ni mantsa: « Zbaɗifwa zba ta marakw ta laviŋtá gwaɗa nda sulkuma gwal ma haɗik, ka dzaʼa yu da ɗawaŋta da tsi, » kaʼa. Ka kwalvaha ni nda tsi mantsa: « Mamu sana marakw ma Ghendur ta laviŋtá gwaɗa nda sulkuma gwal ma haɗik, » ka həŋ. 8 Ka slahwaftá Sawulu ta vgha nda sana lgutha ŋa kwal kul tsəmafta, ka laghu tsi, nda mnduha his. Ka ɓhadaghatá həŋ da tsa marakw ya girviɗik. Ka Sawulu nda tsi mantsa: « Vzaɗif vza ta mandaŋ ka gwaɗganata ka ta sulkuma gwal nda rwa, ka hgaɗiŋta ka ta mndu dzaʼa mnaghata yu, » kaʼa. 9 Ka tsa marakw ya nda tsi mantsa: « Nda sna kagha ka ghəŋa gha ta skwi maga Sawulu. Hliŋ hla Sawulu ma na haɗik na ta gwal ta ga ɗəgha nda gwal ta gwaɗganatá sulkuma gwal nda rwa. Kabgawu ta kuma ka ta ksamtá iʼi da dəɓəl, ŋa dzatá iʼi na? » kaʼa. 10 Ka waɗanatá Sawulu nda hga Yawe: « Ta waɗa waɗa yu nda hga Yawe nda hafu mida! Haɗ sana ghwaɗaka skwi dzaʼa ksaghata ma na skwi na wu, » kaʼa. 11 Ka tsa marakw ya mantsa: « Wa ta kum ka ta hgəgaghafta ɗa na? » kaʼa. Kaʼa mantsa: « Hgəgiɗif hga ta Samuyel, » kaʼa.

12 Nghaŋta tsa marakw ya ta Samuyel, ka wahatá tsi nda lwi dagala dagala. Kaʼa nda Sawulu mantsa: « Kabgawu kəl ka ka nanaɗifta na? Kagha a Sawulu ra! » kaʼa. 13 Ka tsa mgham ya nda tsi mantsa: « Ma zləŋ ka! Nya nghaŋ ka na, mniha mna? » kaʼa. Ka tsa marakw ya nda Sawulu mantsa: « Nda ngha yu ta skwi ka glamglam ta safi ma haɗik, » kaʼa. 14 Kaʼa nda tsi mantsa: « Kinawu nzakwa ni na? » kaʼa. Ka tsa marakw ya mantsa: « Sana halata mndu ya ta safi, nda slahwatá vgha ni nda sɗakw, » kaʼa. Ka graftá Sawulu kazlay na, Samuyel ya kəʼa. Ka zləmbatá tsi zlumbruh ta haɗik, ka tsəlɓata.

15 Ka Samuyel nda Sawulu mantsa: « Kabgawu kəl ka ka gərzliɗifta ta mbiʼa vgha ɗa, ka hgagaɗifta na? » kaʼa. Ka Sawulu mantsa: « Mamu sana skwi ta kəɓa iʼi katakata. Ta vulu la Filisti nda iʼi, ka mbəɗihatá Lazglafta ta hul. Zlghəgla a ta wa ɗa, dər nda təv la anabi, dər nda ma suniha wa. Tsaya tama kəl yu ka hgaŋ ta kagha ŋa sniɗimta ta skwi ŋa magay ɗa, » kaʼa. 16 Ka Samuyel mantsa: « Kabgawu kəl ka ka ɗaway da iʼi, ka si mbəɗagha mbəɗa Yawe ta hul, ka nzakw tsi ka ghuma gha na? 17 Maga gha maga Yawe manda ya mna tsi nda ma wa ɗa ya kay^*. Zluʼaghu zluʼa ta ga mgham ma dzva gha, ka vlaŋtá sani, ka vlaŋtá Dawuda, 18 kabga sna a ka ta gwaɗa Yawe wu, ksanaŋ a ka ta la Ghamalek taɓ ta gufatá ŋuɗufa ni wa. Tsaya ta kəl Yawe ka magay manda tsaya ŋa gha gita^*. 19 Dzaʼa vla vla Yawe ta la Israʼila nduk nda kagha tani ma dzva la Filisti. Mahtsim, nda zwana gha nda kagha tani, dzaʼa kawadaga kuni nda iʼi ma haɗik, dzaʼa vla vla Yawe ta bakwa gwal vula la Israʼila ma dzva la Filisti, » kaʼa^*.

20 Ka gi zləmbatá Sawulu ta haɗik zərnaʼ, da ksata ni da zləŋa tsa gwaɗa mnana Samuyel ya. Ta ghəŋa tsa, ka nzatá tsi hulepeteʼ, kabga ɗaŋ a ta skwa zay tep vagha ni, petsuweɗ vla ni wa. 21 Ka gavadaghatá tsa marakw ya ta vata Sawulu, kəʼa kəʼa ná, nda ga zləŋa ni ɗekɗek. Kaʼa nda tsi mantsa: « Snagha sna yu ta skwi mnaf ka. Pərɗa pərɗa hafa ɗa, ama skwi ya mnaɗif ka maga yu. 22 Ndanana, kdəkkdək fana fa kagha guli ta sləməŋ ta kurɗa gha. Ka vlagha vla yu ta skwa zay, ka zuta ka, mantsa ya, dzaʼa mutsay ka ta mbraku ŋa mbaɗa ta tvi, » kaʼa. 23 Ama ka kwalaghutá tsi. Kaʼa mantsa: « Haɗ yu dzaʼa zay wu, » kaʼa. Ama ka mblaftá kwalvaha ni, nda tsa marakw ya tani, ka snatá tsi ta gwaɗa taŋ. Ka sliʼaftá tsi ta haɗik ka nzafta ta ghəzləŋ. 24 Ga tsa marakw ya, mamu sana mamakwa sla ta nuʼu lu ma gamak ga taŋ. Ka gi hnatá tsi. Klafha ta hpu ka hwaɗamta, ka datá buradi kul haɗ is mida. 25 Ka pghatá tsi ta inda ni ta kəma i Sawulu nda kwalvaha ni, ka zutá həŋ. Tahula tsa, ka sliʼaftá həŋ ka vraghuta ta va tsa rviɗik ya.