Ləglaghwa Dawuda ɗifaghuta da la Filisti
27
1 Ka Dawuda ma ghəŋa ni mantsa: « Dər yawu tsi, dzaʼa dza dza Sawulu ta iʼi. Haɗ sana ghwana ɗa ta ghəŋa hwayaghuta ɗa ka laghwi da ɗifaghuta ta haɗika la Filisti, kada zlanata Sawulu ta zba iʼi ma inda vli ta haɗika la Israʼila wa. Mantsa ya dzaʼa ndapta yu da tsi, » kaʼa. 2 Ka sliʼaftá Dawuda nda gwal kawadaga nda tsi mkuʼ dərmək (600), ka tsughwaɗaghatá həŋ ka laghwi da Ahis mghama la Gat, zwaŋa Maghuk. 3 Ka nzatá Dawuda ta vata Ahis, ma Gat, tsatsi nda mnduha ni. Inda mndu ka həga ka həga, Dawuda kawadaga nda miʼa ni his, i Ahinugham makwa la Yizrəghel nda Abigayel, si markwa Naval mnda la Karmel ya. 4 Snaŋta Sawulu kazlay na hwayaghu hwaya Dawuda da Gat kəʼa, ka zlanatá tsi ta zbəgəlta.5 Ka Dawuda nda Ahis mantsa: « Kdəkkdək, ka ta zɗəɗiŋ zɗa ka ta huɗi katsi, vliha vla ta vli ma sana zwaŋa luwa ma na haɗika na, ŋa nzata ɗa. Raʼa ka nzata iʼi kwalva gha ma luwa turtuk nda kagha ma luwa ga mgham wu, » kaʼa. 6 Baɗ va tsa fitik ya, ka vlaŋtá Ahis ta luwa Tsiklag. Tsaya kəl Tsiklag ka nzakway ka ŋa mghamha la Yahuda ha gita na. 7 Ka nzatá Dawuda ma haɗika la Filisti ka vaku turtuk nda tili fwaɗ.
8 Ta laf la Dawuda nda mnduha ni da zləɗatá la Gesur, nda la Gezer, nda la Ghamalek. Hahəŋ gwal ta tsa haɗik ya daga bamma, nda təv Sur dikw ta haɗika Masar. 9 Ma inda tsa sab ta sab həŋ ya ná, ta zaɗana zaɗa Dawuda ta tsa kwakwar ya, pɗana a nda hafu ta dər zgun dər marakw wu, ama ta hlagha hla ta rina fisik, nda slaha, nda kəɗihha, nda ŋalibwaha, nda lgutha, ŋa vraghata ni da Ahis. 10 Ka Ahis ta ɗawaŋta da tsi mantsa: « Ga laghwa kuni da zləɗu gita na? » kaʼa. Ka Dawuda ta zlgha wa ni tazlay na: « Laghu nda təv suda kwakwara la Yahuda ŋni, » ka « nda təv suda kwakwara la Yərahməʼel ŋni, » ka « nda təv suda kwakwara la Keŋ, » a tsi kaʼa ta mnay. 11 Haɗ Dawuda ta zlanata nda hafu ta dər zgun dər marakw ŋa hlay da Gat wa. Kaʼa ma ghəŋa ni mantsa: « Dzaʼa laviŋ lava həŋ ta mna gwaɗa ta amu. Ka həŋ dzaʼazlay na: “Wya skwi maga Dawuda” ka həŋ dzaʼazlay, » kaʼa. Manda tsa ya skwi ta mag Dawuda ma inda tsa fitika nzakwa ni ta haɗika la Filisti ya. 12 Faf fa Ahis ta ghəŋ ta Dawuda, kaʼa ma ghəŋa ni mantsa: « Ndanana ná, ka skwa mbiɗa nzakwa ni da la Israʼila, mnduha ni. Dzaʼa nzakway tama ka kwalva ɗa ŋa ɗekɗek, » kaʼa.