Zləglanata Dawuda ta dzatá Sawulu
26
1 Ka lagha la Zif da slanaghatá Sawulu ma Givgha. Ka həŋ nda tsi mantsa: « Ɗifaghu a Dawuda ta kuɗuŋura Hahila, mbəŋ nda mtak tɗandazl wu ri? » ka həŋ*. 2 Ka sliʼaftá Sawulu ka laha da mtaka Zif kawadaga nda mnduha dəmbuʼ hkən (3.000) ka bikwira vulu mataba la Israʼila, ŋa zba Dawuda ta mtaka Zif. 3 Ka fatá Sawulu ta ghuɓa ni ndusa nda wa tvi ta kuɗuŋura Hahila, mbəŋ nda sana mtak tɗandazl. Ma mtak Dawuda. Nghay ni kazlay na zbiŋ zba Sawulu ma mtak kəʼa, 4 ka ghunaftá tsi ta mnduha da sunaptá vli, ŋa graftá kahwathwata kazlay na, lab la Sawulu kəʼa. 5 Ka sliʼaftá Dawuda, ka ɓhadaghatá tsi da tsa vli fa Sawulu ta ghuɓa ni ya. Ka nghaŋtá tsi ta vla hana i Sawulu nda Avner zwaŋa Ner, mali ta ghəŋa gwal vula ni. Ta hani Sawulu ma huɗa ghuɓu, nda pghatá vgha sludziha ta hani ta wanafta.6 Ka Dawuda nda Ahimelek, mnda la Het, nda ya nda Avisay zwaŋa Tseruya zwaŋama ni ma Yuʼav mantsa: « Wa ta dzaʼa laha kawadaga nda iʼi slanaghatá Sawulu ma ghuɓu na? » kaʼa. Ka Avisay mantsa: « Ta dzaʼa la la yu kawadaga nda kagha, » kaʼa. 7 Ka ɓhadaghatá i Dawuda nda Avisay girviɗik ta vata bakwa sludziha, ta hani Sawulu, dza dza hani ma huɗa ghuɓu, dzugwam dzugwa ta gupa ni ma haɗik ta vata ghəŋa ni. Ta hani i Avner nda pɗakwa bakwa sludziha ta wanafta.
8 Ka Avisay nda Dawuda mantsa: « Vlagha vla Lazglafta gita ta ghuma gha ma dzva gha. Vliha vla ta tvi ka dzugwanamta yu ta gupa turtuktuk tes da haɗik. Haɗ yu nda mahisa ni wu, » kaʼa. 9 Ka Dawuda nda Avisay mantsa: « Ma dza ka! Wa dzaʼa faftá dzvu ta mndu ya zbaf Yawe nda ma pghanaghatá rɗi, ŋa kwala dmaku ksafta na? » kaʼa. 10 Ka Dawuda guli mantsa: « Ta waɗa waɗa yu nda hga Yawe nda hafu mida! Yawe turtukwa ni dzaʼa da dzata, ka dər nda ma mtakwa ghəzləŋa ni tsi, ka ta wa vulu ma ghwa a tsi. 11 Nziya nza tsi, nda hga Yawe, haɗ yu ta walaŋtá faftá dzva ɗa ta mndu ya zbaf Yawe nda ma pghanaghatá rɗi wa! Hlaghu hla ta tsa gupa, nda beŋwbeŋwa imi ndusa nda ghəŋa ni ya, ka laghwa u, » kaʼa. 12 Ka hlaftá Dawuda ta tsa gupa ya, nda tsa beŋwbeŋwa imi ndusa nda ghəŋa Sawulu ya, ka laghwa taŋ. Haɗ mndu ta nghiŋtá həŋ wu, haɗ mndu ta snaŋta wu, haɗ mndu ta sliʼavata wa. Psla psla hani ta həŋ demdem. Hani ta saha daga da Yawe ta rwanatá həŋ.
13 Ka tsughwaɗaptá Dawuda ta didiŋa ka ŋlaghata ta bɗəma ghwá, diʼiŋ nda tsa ghuɓu ya. 14 Ka gugɗatá Dawuda nda təv tsa bakwa gwal vula Sawulu ya, nda ya nda Avner, zwaŋa Ner. Kaʼa mantsa: « Ari Avner, dzaʼa zlghiɗif zlgha ka ta wi ra? » kaʼa. Ka Avner mantsa: « Wa kagha, ta hagaku da sləməŋa mgham na? » kaʼa. 15 Ka Dawuda nda Avner mantsa: « Zgun ka kasiʼi kiʼe! Wa kamtaghu nda kagha ma Israʼila na? Nya tama kwal ka nghapta ka mgham, rvera gha na? Lam la sana mndu da taba ghuni si má ŋa dzatá mgham, rvera gha! 16 Ɗina a tsa skwi maga ka ya wa. Ta waɗa waɗa yu nda hga Yawe nda hafu mida, nda ra ka rwaghunata kabga nghap a kuni ka rvera ghuni, mndu ya zbaf Yawe nda ma pghanaghatá rɗi wa. Nghana ngha ɓa! Ga gupa mgham nda beŋwbeŋwa imi si ndusa nda ghəŋa ni ya na! » kaʼa.
17 Ka tsatsaftá Sawulu ta lwa Dawuda, kaʼa mantsa: « Lwa gha tsaya ri Dawuda, zwaŋa ɗa? » kaʼa. Ka Dawuda mantsa: « Lwa ɗa ya a mgham, rvera ɗa, » kaʼa. 18 Kaʼa guli mantsa: « Kabgawu ta kəl mghama ɗa ka ŋawa kwalva ni na? Nahgani ya maga yu na? Nahgani dmaku ga yu na? 19 Ndanana, kdəkkdək, ka fa fa mgham rvera ɗa ta sləməŋ ka sna gwaɗa kwalva ni. Ka Yawe ta famtá kagha ŋa ŋawa iʼi katsi, ka tsuʼaf tsuʼa tsi ta mbəha urdi! Ama ka mnduha tsi katsi, ka nza həŋ nda ksiʼa ta kəma Yawe. Ta ghəzla iʼi həŋ gita ŋa bəghiɗta ma za həga Yawe nda mnay kazlay na: “La da maganatá slna ta sana lazglaftaha!” kəʼa. 20 Ndanana, ma tɗa usa ɗa ta haɗik diʼiŋ nda Yawe! Sliʼaf sliʼa mghama la Israʼila ka zba tsitsiɗif zlaŋzlaŋ, manda ghəzla fufuri ta ghwáha, » kaʼa.
21 Ka Sawulu mantsa: « Gaga yu ta dmaku. Vragagha vra, zwaŋa ɗa Dawuda! Haɗ yu dzaʼa magəltá ghwaɗaka skwi ŋa gha wu, kabga gita ka ŋərma skwi hafa ɗa ta wa ira gha. Mantsa nzakwa ni, slna təkda maga yu, nanu nana yu ta ghəŋ katakata, » kaʼa. 22 Ka Dawuda zlghanaftá wi mantsa: « Wana gupa mgham, ka sagha sa sani ma duhwalha gha da zlghay. 23 Ka planam pla Yawe ta dər wati ma mndu, taɓ ta skwi maga tsi nda tɗukwa ni nda ŋərma ni. Gita ná, si vliha vla Yawe ta kagha ma dzva ɗa, ama ka zlanatá yu ta faftá dzvu ta kagha, kabga mndu zbaf Yawe nda ma pghanaghatá rɗi ka. 24 Manda va na nzakwa ni gita, ka ŋərma skwi na hafa gha da iʼi ná, mantsa ya dzaʼa nzakwa hafa ɗa ta wa ira Yawe. Dzaʼa katap kata ta iʼi ma inda ghuya ɗaŋwa, » kaʼa. 25 Ka Sawulu nda Dawuda mantsa: « Ka nza tfa wi ta ghəŋa kagha, zwaŋa ɗa Dawuda! Mantsa nzakwa ni, dzaʼa katsay ka ta skwiha ta mag ka, » kaʼa. Ka kɗaŋtá Dawuda ta ksa tva ni, ta vraghutá Sawulu dzagha ni.