Kwalaghuta Naval ta kataŋtá Dawuda
25
1 Ka mtutá Samuyel. Ka tskavatá inda la Israʼila, ka tawamta. Ka paɗamtá lu ma luwa ni ma Rama. Ka sliʼaftá Dawuda ka laha ta mtaka Paraŋ.2 Mamu sana mndu ma Maghuŋ ka gadghəl katakata, ta tsakala ma Karmel. Mamu tuwaka ni dəmbuʼ hkən (3.000), dəmbuʼ (1.000) gwa ni. Ma tsa fitik ya ma Karmel tsatsi ta gatsa swida tuwakha ni. 3 Naval hga tsa mndu ya, Abigayel hga markwa taŋ. Dagala mahizl ma ghəŋa tsa marakw ya, ká ka nda ɗinakwa ni guli, ama təŋ təŋa tsa zəʼala taŋ ya, ta sidi ma magakwa ni. Sab ma mndəra la Kalep.
4 Ma nzakwa Dawuda ma mtak, ka snaŋtá tsi kazlay na ta gatsa swida tuwaka ni Naval kəʼa. 5 Ka ghunaftá Dawuda ta duhwalha ni ghwaŋ, kaʼa mnanaftá həŋ mantsa: « Ŋlawa ŋla da Karmel, ka dzaʼa kuni slanaghatá Naval, ka ganaghata kuni ta zgu nda hga ɗa. 6 Ka kuni dzaʼazlay nda tsi na: “Ta mblam ka hafa gha! Ka nza zɗaku nda kagha, nda gwal ga ghuni, nda ya nda inda skwiha gha! 7 Sniɗagha sna kazlay mamu gwal ta gatsa swida tuwak ga ghuni kəʼa. Ma fitika nzakwa gwal ngha rina gha ma Karmel kawadaga nda aŋni ná, magana a ŋni ta ghwaɗaka skwi ta həŋ wu, haɗ skwa taŋ ta zaɗavaghuta wa. 8 Ɗawaŋ ɗawa da mnduha gha, dzaʼa snagham sna həŋ. Ka mutsafta tsa duhwalha ɗa ya ta zɗaku da kagha, kabga sagha sa ŋni ma fitika skala rfu! Kdəkkdək, vlaŋ vla ta kwalvaha gha, nda ya ŋa zwaŋa gha Dawuda ta skwi ya laviŋ ka ta vlaŋtá həŋ,” ka kuni dzaʼazlay, » kaʼa.
9 Ɓhadaghata duhwalha Dawuda, ka mnanatá həŋ manda va tsaya ta Naval, nda hga Dawuda. Ka nzatá həŋ ka kəzlay. 10 Ka Naval nda kwalvaha Dawuda mantsa: « Wa Dawuda, wa zwaŋa Yisay na? Nda ndəgha kwalvaha gitana ta hwahwayapta ga daŋahəga taŋ. 11 Ka klafta ɗa ta burada ɗa, nda ima ɗa, nda rina ɗa hnana yu ta gwal ta gatsa swida tuwakha ɗa, ŋa vlaŋtá mnduha ka sab ga həŋ! » kaʼa.
12 Ka vraghutá duhwalha Dawuda. Vradaghata taŋ, ka rusanaftá həŋ ta tsa gwaɗa ya demdem ta Dawuda. 13 Ka Dawuda nda mnduha ni mantsa: « Inda kaghuni, hlafwa hla ta kafayha ghuni! » kaʼa. Ka habaftá inda taŋ ta kafayha taŋ ta tataya taŋ. Ka klaftá Dawuda ta ŋa ni guli. Ta magay mnduha ta fwaɗ dərmək (400) ta laf mista Dawuda, his dərmək (200) gwal ta pɗata ta vata huzla.
Tawa Abigayel ta kəma Dawuda
14 Ka sani ma taba duhwalha Naval nda Abigayel markwa Naval mantsa: « Ghunagagha ghuna Dawuda ta mnduha daga ma mtak ŋa ganaghatá zgu ta daŋahəga mu, ka ghəzlaftá daŋahəga mu ta həŋ. 15 Tsaw si ŋərma mnduha tsa mnduha ya nda amu. Haɗ sana ghwaɗaka skwi magama həŋ wu, haɗ sana skwa mu ta zwaɗuta ma inda tsa nzakwa mu mataba taŋ ma mtak ya wa. 16 Si nda nza həŋ manda matsaka huzlu ta waŋnafta nda rviɗik tani nda fitik tani, inda tsa fitik nza ŋni kawadaga nda həŋ ta ngha rina fisik ya. 17 Ndanana, ɗina ka nghadapta gha, ka snaŋta ka ta skwi ŋa magay, kabga dzaʼa klanak kla tsa magakwa ni ya ta ɓadzaku kahwathwata ta daŋahəga mu, nda inda gwal ga taŋ tani. Tsatsi tani, sidi ŋa ni ta ŋanata, haɗ mndu ta laviŋtá gwaɗa nda tsi wu, » kaʼa.
18 Ka hlaftá Abigayel misimmisim ta buradi his dərmək (200), nda hulama ima inabi his, nda hanatá tuwak hutaf, nda duguma masula, dərmək (100) gatuwa ghwalata yakwa inabi, his dərmək (200) ŋa ghwalata yakwa ghuraf. Ka pghaftá tsi demdem ta kəɗihha. 19 Kaʼa nda duhwalha ni mantsa: « Mbaɗwa ta kəma ɗa, ta dzaʼa yu nda hula ghuni, » kaʼa. Ama snanam a ta Naval, zəʼala taŋ wa. 20 Ta laha tsi ta kəɗih, ka mbuŋtá sana ghwá, ta saha i Dawuda nda mnduha ni zur nda si. Ka gəmatá tsi gwedza gwedza nda həŋ. 21 Ka Dawuda ma ghəŋa ni mantsa: « Ka bətbət a kataŋta yu ma mtak ta inda skwa tsa mndu ya, kul haɗ sana skwi ta zaɗavaghuta ma inda skwiha ni wu ri? Ka vriɗimtá tsi ta skwi ɗina nda ŋaslu a wu ri? 22 Ka dziha dza Lazglafta, ka zlana zla yu nda hafu ta ya dər turtuk mataba zgwana ni ma kɗaku sərɗək mahtsim! » kaʼa.
23 Na nghaŋta Abigayel ta Dawuda, ka gi saha tsi misimmisim ta kəɗiha ni, ka zləmbatá tsi zlumbruh ta haɗik ta kəma Dawuda, ka tsəlɓata tsi. 24 Ka zləmbatá tsi ma ghuva ni, kaʼa mantsa: « Krughuva ɗa ya, rvera ɗa! Vlaŋ vla ta tvi ta kurɗa gha ka gwaɗgaghata tsi! Kdəkkdək, snana sna ta gwaɗa ni. 25 Yaha rvera ɗa da sna gwaɗa tsa ghwaɗaka mndu ta sidi, Naval ya, kabga manda va tsa hga ni ya ná, raŋta ni ya. Tsa hga ni ka Naval ya ná, tsaya təkda. Kahwathwata ná, ka ndiʼaftá tsa təkda ya tida. Ama iʼi, kurɗa gha, nghiŋ a yu ta tsa duhwalha si ghunadap rvera ɗa ya wa. 26 Ndanana, rvera ɗa ta waɗa waɗa yu nda hga Yawe nda hafu mida, nda ya nda ŋa gha hafu. Yawe ta pyaftá kagha ka pghiŋtá us ka ŋaghutá dzva gha. Má ka nza kɗavakta ghumaha gha, tsa gwal ta zba maganatá ghwaɗaka skwi ta rvera ɗa ya, manda ŋa Naval ya! 27 Tsuʼaf tsuʼa ta na mbəhu kləgaghagha kurɗa gha na rvera ɗa, ka daganafta lu ta na duhwalha mista gha na, a rvera ɗa. 28 Kdəkkdək, plana pla ta krughuva kwarakwara kurɗa gha. Nziya nza tsi ná, haɗ Yawe dzaʼa kwalaghuta vlaŋtá həga nda diha ta rvera ɗa wu, kabga ta vulay rvera ɗa ta vula Yawe. Má ma slanagha lu ta ghwaɗaka skwi da kagha ma inda nzakwa gha. 29 Ka sliʼaf sliʼa mndu ŋa dzaŋtá kəma nda rvera ɗa, ka zba hafa gha katsi, dzaʼa bukwana bukwa Yawe, Lazglafta gha ta hafa gha ma vli ta ɗif tsi ta hafu, ama dzaʼa wuɗidiŋta diʼiŋ ta hafa ghumaha gha, manda wuɗa skwi nda tsivuʼ. 30 Kɗakwa Yawe ta maganatá mghama ɗa ta inda skwi ɗina ɗina ya taghaf tsi ta imi ta sləməŋ, ka fatá kagha ka mgham ta ghəŋa la Israʼila ya, 31 yaha ka da ghuya ghəŋa gha ka haga madər ka bətbət ta ghəŋa pghiŋta gha ta us, dabga tsata kagha ka ghəŋa gha ta guma. Baɗ magaghar Yawe ta zɗaku rvera ɗa, ka havapta ka ka kurɗa gha, » kaʼa.
32 Ka Dawuda nda Abigayel mantsa: « Ta rfanagha rfa yu ta Yawe, Lazglafta la Israʼila, ta ghunagaghatá kagha gita ŋa guyaku nda iʼi! 33 Ta rfaghagha rfa yu ta kagha guli, ta ndanaptá na ŋərma ndanu na. Kagha ta pyaftá iʼi gita ta dzaʼa pghiŋtá us, ka tsata iʼi ka ghəŋa ta guma. 34 Ama kahwathwata ná, Yawe, Lazglafta la Israʼila ta pyaftá iʼi ka magaghatá ghwaɗaka skwi. Ta waɗagha waɗa yu nda hga Yawe nda hafu mida, ka si má sagha a ka misimmisim da gəmaku nda iʼi wu katsi, haɗ zgwana má dzaʼa pɗata ga Naval ha ka lab ta tsaɗakwa vli ga sərɗək wu! » kaʼa. 35 Ka zlghaftá Dawuda ta tsa skwi hladagha Abigayel ya. Kaʼa nda tsi mantsa: « La dzagha gha nda vghata zɗaku. Nda ngha ka re, snagha sna yu ta gwaɗa gha, zɗaghaŋ zɗa yu ta huɗi, » kaʼa.
Nzakwa Abigayel ka markwa Dawuda
36 Ka vradaghatá Abigayel da Naval. Ta magutá skwa zay ni ta raŋtá mgham ma həga ni. Ta rfu Naval, ghuyu ghuya katakata. Gwaɗgana a Abigayel dər teʼ ha ga sərɗək wa. 37 Ga sərɗək tama, sab sa ghuzu ma ghəŋa Naval, ka rusanaftá markwa taŋ ta skwi ta maguta. Ka tsutá ŋuɗufa Naval ɗekɗek, ka ghwalutá tsi səluŋ. 38 Ka nda maga re maga wa a fitika ni ghwaŋ, ka dzuŋtá Yawe ta Naval, ka mtuta tsi.
39 Ka snaŋtá Dawuda kazlay na nda mta Naval kəʼa, kaʼa mantsa: « Ta rfanagha rfa yu ta Yawe ta mbəɗatá gwaɗa ta iʼi, ma tsa skwa hula pghiɗagha Naval ya, ka ksaghutá tsi ta kwalva ni ta dzaʼa magatá ghwaɗaka skwi. Ka vranamtá Yawe ta tsa ghwaɗaka skwi maga Naval ya da kuma ni, » kaʼa. Ka ghunaftá Dawuda ta mndu ŋa gwaɗganatá Abigayel ŋa nzakwa ni ka marakw taŋ. 40 Ka laha kwalvaha Dawuda da Abigayel ma Karmel, ka həŋ nda tsi mantsa: « Dawuda ta ghunagaghatá aŋni da kagha, kabga ta kumay ta klaftá kagha ka markwa taŋ, » ka həŋ.
41 Ka sliʼaftá Abigayel, ka zləmbata zlumbruh ta haɗik ka tsəlɓata. Kaʼa mantsa: « Wana iʼi, kurɗa gha, nda fa vgha kurɗa gha ŋa mbazanatá səlaha kwalvaha gha, a rvera ɗa, » kaʼa. 42 Ka gi sliʼaftá Abigayel ka laf tsi ta kəɗiha ni, ka pghaftá daghala kuʼaha hutaf. Ka laghu tsi mista tsa ghunatá mnduha Dawuda ya. Mantsa tama, ka nutá tsi ka markwa taŋ.