1 Samuyel 24

Zlanata Dawuda ta dzatá Sawulu

1 Ka sliʼaftá Dawuda hada, ka laghwi da nzata ma dzaŋ ta pyam ma Gheŋgedi^ª. 2 Tahula vragaghuta Sawulu ta liŋtá la Filisti, ka lu nda tsi mantsa: « Wa a Dawuda ndana ta mtaka Gheŋgedi, » ka lu. 3 Ka ɗagaptá Sawulu ta mnduha dəmbuʼ hkən (3.000) gwal ka bikwira vulu mataba inda la Israʼila, ka laghu həŋ da zba Dawuda nda mnduha ni ta kəma kutumbaha madva. 4 Ka lagha Sawulu ta kalakala tuwak ndusa nda wa tvi. Hada, mamu sana galigha. Ka lam Sawulu dida da kwana ni. Tsaw ɗifaghu ɗifa i Dawuda nda mnduha ni ma huɗa tsa galigha ya. 5 Ka mnduha Dawuda nda tsi mantsa: « Gita tsa fitik mnagha Yawe ya: “Dzaʼa vlagha vla yu ta ghuma gha ma dzva gha, ŋa maganata gha ta skwi manda ya ta zɗəgaghata,” kəʼa ya, » ka həŋ. Ka sliʼaftá Dawuda tsaʼatá ɗasuwa ta wa sɗakwa Sawulu. 6 Ama tahula tsaya, ka snə Dawuda ta babamakwa ŋuɗufa ni, kabga vəl tsaʼata ni ta wa sɗakwa Sawulu. 7 Kaʼa nda mnduha ni mantsa: « Ka pyaf pya Yawe ta iʼi ka maganatá skwi manda tsaya ta rvera ɗa, mndu ya zbaf Yawe nda ma pghanaghatá rɗi. Ka pyaf pya tsi ta iʼi ka faftá dzvu tida, kabga nda nza ka mndu ya zbaf Yawe nda ma pghanaghatá rɗi, » kaʼa. 8 Nda tsa gwaɗa ya, ka dzədzəɓanatá Dawuda ta mnduha ni, ka pyaftá tsi ta həŋ ta dzaʼa valafta ta Sawulu.

Ka sliʼaftá Sawulu, ka sab tsi ma tsa galigha ya, ka ksa tva ni. 9 Ɓats nzəɗa, ka sab Dawuda ma tsa galigha ya, ka wahatá nda hula Sawulu, « Ari rveri, mghama ɗa! » kaʼa. Ka nghaptá Sawulu nda hul. Ka dzatá Dawuda ta ghəŋ nda ta haɗik, ka tsəlɓata. 10 Ka Dawuda nda Sawulu mantsa: « Kabgawu ta kəl ka ka sna gwaɗa mnduha ta mnay kazlay na, ta zba maga ghwaɗaka skwi Dawuda ŋa gha kəʼa na? 11 Nda ngha kagha nda ira gha gita kazlay si vla vla Yawe ta kagha ma dzva ɗa ma galigha. Ka ghun lu ta iʼi ŋa dzatá kagha, ama ka zlaghatá yu, ka yu mantsa: “Haɗ yu dzaʼa faftá dzvu ta rvera ɗa wu, kabga nda nza ka mndu ya zbaf Yawe nda ma pghanaghatá rɗi,” ka yu. 12 Ngha ɓa da ɗa, kahwathwata, ngha ta wa sɗakwa gha ma dzva ɗa. Tsanaghu tsa yu ta wa lguta gha, ama dzagha a yu wa. Ɗina ka snaŋta gha, graf ka guli kazlay na haɗ ma ndana ɗa dər gavaghatá sidi, dər zba magaghatá ghwaɗaka skwi wu kəʼa. Haɗ dmaku gagha yu guli wa. Kagha yeya katək ta raya klaptá hafu ma iʼi. 13 Yawe dzaʼa tsa guma mataba kagha nda iʼi! Tsatsi dzaʼa plaghamtá ghwaɗaka skwi ya ta mag kagha ŋa ɗa, ama iʼi, haɗ yu dzaʼa faftá dzva ɗa ta kagha wa. 14 Manda ya mna mahdihdi bamma na: “Da mndu ta ga sidi ta saba sidi!” kəʼa. Ama iʼi, haɗ yu dzaʼa walaŋta faftá dzva ɗa ta kagha wa. 15 Laghu da vulu nda wa mghama la Israʼila ta vulu? Wa ta ŋawu tsi? Ta mtatá kri! Ka tsitsiɗif a tsi tama na! 16 Yawe dzaʼa tsa guma ni, tsatsi dzaʼa sladata mataba u. Tsatsi dzaʼa nghadapta ka dabgawu tsi, ka mbəɗatá gwaɗa ta iʼi, ka kataptá iʼi ma dzva gha, » kaʼa.

17 Kɗiŋta Dawuda ta mna tsa gwaɗaha ya ŋa Sawulu, ka Sawulu mantsa: « Lwa vərɗa kagha tsaya rí, a zwaŋa ɗa Dawuda? » kaʼa. Ka wahu Sawulu ta wahu nda lwi dagala dagala. 18 Kaʼa nda Dawuda mantsa: « Mal kagha nzakwa ni tɗukwa ka iʼi, kabga magiha maga ka ta skwi ɗina, ta magaghatá iʼi ta ghwaɗaka skwi^*. 19 Kagha, mariɗiŋ mara ka gita ta zɗaku ya ta mag ka ŋa ɗa. Si vla vla Yawe ta iʼi ma dzva gha, ka zlanatá ka ta dzihata. 20 Ka gruŋ gra mndu ta ghuma ni, dzaʼa zlana zla ka ksay ni ta tva ni ɗasuwa ra? Ka vlagha vla Yawe ta nisəla ma na skwi magiha ka gita na. 21 Ndanana ná, nda sna yu kazlay na dzaʼa gay ka ta mgham, dzaʼa sladam slada ga mghama la Israʼila ma dzva gha kəʼa^*. 22 Ndana tama, waɗiha waɗa nda hga Yawe kazlay na, zaɗanata a ka ta zivira ɗa ta hula ɗa wu, hərɗiŋta ka ta hga ɗa mataba la ga da ɗa wu kəʼa, » kaʼa. 23 Ka waɗanatá Dawuda ta Sawulu. Tahula tsa, ka laghu Sawulu dzagha ni, ta vraghutá i Dawuda nda mnduha ni ta ghwá da vla ɗifa taŋ.