1 Samuyel 23

Katata Dawuda ta luwa Kəghila

1 Ma sana fitik, ka lagha lu da mnay ŋa Dawuda: « Wa a la Filisti ta vulu nda la Kəghila, ka hlaghutá həŋ ta zima taŋ ta wa blikwi, » ka lu. 2 Ka ɗawaŋtá Dawuda da Yawe, kaʼa mantsa: « Ka laba yu da guyata nda tsa la Filisti ya ra? » kaʼa. Ka Yawe nda Dawuda mantsa: « La, dzaʼa zak za ka ta tsa la Filisti ya, dzaʼa kataf kata ka ta la Kəghila, » kaʼa. 3 Ama ka mnduha Dawuda nda tsi mantsa: « Hadna, dər ma luwa la Yahuda ná, ta nzakw nda zləŋ mu ta nzaku. Nu kəʼa dzaʼa magaku ka lab la mu da Kəghila, da gəmata nda gwal vula la Filisti na? » ka həŋ.

4 Ka ɗawuglaŋtá Dawuda da Yawe. Ka Yawe zlghanaftá wi mantsa: « Sliʼa sliʼa ksatá tvi! Vala da Kəghila, kabga dzaʼa vla vla yu ta la Filisti ma dzva gha, » kaʼa. 5 Ka laghu i Dawuda nda mnduha ni da luwa Kəghila, ka liŋtá həŋ ta la Filisti. Ka pslatá tsi ta həŋ katakata, ka tsagaghutá tsi ta bra rina taŋ. Ka katatá Dawuda ta la Kəghila.

6 Tsaw, manda hwayadaghata Abyatar, zwaŋa Ahimelek ta vata Dawuda ma Kəghila ná, ka kladanaptá tsi nda ifut ma dzvu.

7 Ka snanamtá lu ta Sawulu kazlay na, lam la Dawuda da Kəghila kəʼa, ka Sawulu mantsa: « Kweŋ! Vla vla Lazglafta ma dzva ɗa, kabga ham ha vərɗa tsatsi ta ghəŋa ni, ma lama ni da luwa ya nda ŋərzla nda kra wa tgha ni, » kaʼa. 8 Ka mbalaftá Sawulu ta inda mnduha ni, ŋa laha da vulu ma Kəghila, ŋa ratsamtá Dawuda nda mnduha ni. 9 Snaŋta Dawuda kazlay ta dzərka maga ghwaɗaka skwi Sawulu ta ghəŋa ni kəʼa, kaʼa nda Abyatar, mnda dra skwi ŋa Lazglafta mantsa: « Klak kla ta ifut! » kaʼa. 10 Ka Dawuda mantsa: « Ari Yawe, Lazglafta la Israʼila! Snaŋ sna kwalva gha ta mnay kazlay na, ta zba sagha Sawulu da Kəghila, ŋa zaɗanatá luwa dabga iʼi kəʼa! 11 Dzaʼa lam la gwal dagaldagala ma Kəghila da dzva ni ra? Dzaʼa la la Sawulu manda tsa snaŋ kwalva gha ya ra? Yawe, Lazglafta la Israʼila, kdəkkdək, snanam sna ta kwalva gha! » kaʼa. Ka Yawe mantsa: « Dzaʼa la la, » kaʼa. 12 Ka Dawuda mantsa: « Dzaʼa vla vla la Kəghila ta iʼi, nda mnduha ɗa, ma dzva Sawulu ra? » kaʼa. Ka Yawe mantsa: « Dzaʼa vla vla həŋ ta kaghuni ma dzva ni, » kaʼa.

13 Ka gi sliʼaftá i Dawuda nda mnduha ni, ta maga mkuʼ dərmək (600), ka saghu həŋ ma Kəghila, ka laghwi da ra vliha. Ka snanamtá lu ta Sawulu kazlay na, ndap nda Dawuda ma Kəghila kəʼa, ka vratá tsi ta dzaʼa.

Dawuda ta mtaka Zif

14 Ka laghu Dawuda da nzata ma dzaŋ ta pyama ghwá ta mtaka Zif. Inda tsa fitik ya, ta zbay zbay Sawulu, ama vla a Lazglafta ma dzva ni wa. 15 Nghay Dawuda ta laba Sawulu da zba htsiŋa ni, ka nzatá tsi ma Hursa ta mtaka Zif. 16 Ka sliʼaftá Yunataŋ, zwaŋa Sawulu da slanaghatá Dawuda ma Hursa ŋa vlaŋtá mbraku ŋa fafta ni ta ghəŋ ta Lazglafta. 17 Kaʼa nda tsi mantsa: « Ma zləŋ ka ta zləŋ, laviŋta a da ɗa Sawulu ta ɓhavaghata wa. Kagha dzaʼa ga mgham ta ghəŋa la Israʼila, iʼi dzaʼa nzakway ka dzva zeghwa gha. Nda sna dər da ɗa guli ɗina ɗina, » kaʼa. 18 Ka dzraftá həŋ his his ta wi ta kəma Yawe^*. Tahula tsa, ka laghu Yunataŋ dzagha ni, ta nzatá Dawuda ma Hursa.

Hwaygudunusta Dawuda ta Sawulu

19 Ka laf sanlaha ma la Zif da Sawulu ma Givgha^*. Ka həŋ nda tsi mantsa: « Waʼa Dawuda ta ɗifa da aŋni ma dzaŋ ta pyam ma Hursa, ta kuɗuŋura Hahila nda təv suda mtak tɗandazl. 20 Ka ta kumay ka ta laha katsi mghama ɗa ná, la la gha. Aŋni katək dzaʼa vlata ma dzva mgham! » ka həŋ. 21 Ka Sawulu mantsa: « Ka tfaghunagha tfa Yawe ta wi, kaghuni gwal ta tawa hiɗahiɗa ta iʼi ya! 22 Lawa la tama da psaptá gwaɗa ta ghəŋa ni, ka grafta kuni, ka snaŋta kuni ta vli ta nzakw tsi, nda mndu ya dzaʼa nghaŋta, kabga hiɗuhiɗa katakata, ka lu nda iʼi. 23 Ka nghanata kuni, ka tsatsafta kuni ta inda vli dzaʼa laviŋta tsi ta ɗifaghuta. Ka vrakta kuni da sliɗaghata, grafər kuni, ŋa dzaʼa ɗa kawadaga nda kaghuni. Mantsa tama, ka ma tsa kwakwar ya tsi, dzaʼa psap psa yu ta inda la Yahuda ta uʼa taŋ ta uʼa taŋ, » kaʼa.

24 Ka sliʼaftá həŋ ka vraghuta da Zif, ka tiŋlaghutá həŋ ta Sawulu. Ta mtaka Maghuŋ i Dawuda nda mnduha ni, ma daɓa Gharava, nda təv suda mtak tɗandazl. 25 Ka laghu i Sawulu nda mnduha ni da psa Dawuda. Ka snanamtá lu ta Dawuda. Ka laha tsi da nzata ma kutumba ta mtaka Maghuŋ. Ka snaŋtá Sawulu, ka zbiŋtá tsi ta Dawuda ta mtaka Maghuŋ. 26 Ka lab Sawulu nda təv sana slərpa tsa ghwá ya, nda təv sana slərpu i Dawuda nda mnduha ni. Ka tsaŋtá Dawuda ta səla ŋa hwagudunustá Sawulu. Taghwaŋ a i Sawulu nda mnduha ni ka ɓhanavatá Dawuda nda mnduha ni ŋa ratsamta, ŋa ksaftá wu, 27 ta lagha sana mnda ghunay da mnay ŋa Sawulu, kaʼa mantsa: « Sawi misimmisim, waʼa dɗanaghata la Filisti ta haɗika mu nda vulu! » kaʼa. 28 Ka vragaghutá Sawulu ta zbiŋtá Dawuda, ka laghu da guyata nda la Filisti. Tsaya kəl lu ka hga tsa vli ya ka Kutumba Dga Vgha.