1 Samuyel 22

Dawuda ma vla ɗifa

1 Ka sliʼaftá Dawuda ma Gat, ka hwayaghuta da ɗifaghuta ma galigha ndusa nda Ghadulam^*. Ka snaŋtá zwana ma ni, nda inda la ga da ni, ka laha həŋ da slanaghata. 2 Ka tskavatá inda gwal ma ghuya ɗaŋwa, nda inda gwal nda dməŋ ta həŋ, nda inda gwal nda gurɗa ŋuɗufa taŋ ta vata ni, ka nutá tsatsi ka mala taŋ. Mantsa tama, ta magay mnduha ta fwaɗ dərmək (400) ta lagha ta vata ni.

3 Ka sliʼaftá Dawuda hada ka laghwi da Mitspe ma haɗika Muwav. Kaʼa nda mghama Muwav mantsa: « Vlaŋ vla ta tvi ta i da ɗa, nda ma ɗa, ka saghwa həŋ da kaghuni, ha ka snanata ɗa ta skwi dzaʼa mag Lazglafta nda iʼi, » kaʼa. 4 Ka hladatá tsi ta həŋ da mghama Muwav, ka nzatá həŋ hada ma inda tsa fitika nzakwa Dawuda ma vla ɗifa ni ya.

5 Ka anabi Gat nda Dawuda mantsa: « Ma nzam ka ma vla ɗifa. La ka dzaʼa ka ta haɗika la Yahuda! » kaʼa. Ka sliʼaftá Dawuda tama ka laghwi da həga fu ma Heret.

Rwanatá gwal dra skwi ŋa Lazglafta ma luwa Nuv

6 Ka snaŋtá Sawulu kazlay nda sna lu ta vli hada i Dawuda nda mnduha ni kəʼa. Ma tsa fitik ya, ta nzaku Sawulu mista mblam ta kuɗuŋur ma Givgha, nda ŋatá gupa ni ma dzvu, ta sladu inda kwalvaha ni ta vata ni. 7 Ka Sawulu nda tsa kwalvaha ta sladu ta vata ni ya mantsa: « Fawa fa ta sləməŋ la Biŋyamiŋ! Dzaʼa valaghuna vala Dawuda zwaŋa Yisay ta na kaghuni na demdem ta vwahha, nda inabiha ra? Dzaʼa pgha pgha ta kaghuni demdem ka maliha ta ghəŋa gwal vulu dəmbuʼ dəmbuʼ (1.000), ka nda ya dərmək dərmək (100) a tsi ra^*? 8 Ka si mantsa a tsi wu, kabgawu ŋa dzray ghuni ta gwaɗa ta ghəŋa iʼi na? Haɗ mndu ta mnihata kazlay na nda dzra wa zwaŋa ɗa nda zwaŋa Yisay kəʼa wa. Haɗ ya dər turtuk ma kaghuni ta ndanaŋtá mnihata wa. Haɗ ya ta mnihata kazlay na baraf bara zwaŋa ɗa ta Dawuda kwalva ɗa ya, ŋa ŋaɗiftá dəɓəl manda na gita na kəʼa wu! » kaʼa.

9 Ka Duʼeg mnda la Idum, si mali ta ghəŋa kwalvaha Sawulu ya guli mantsa: « Nda ngha yu ta zwaŋa Yisay ta lagha da luwa Nuv, da Ahimelek, zwaŋa Ahituv. 10 Ka ndəɓu Ahimelek ta dzvu da Yawe ta ghəŋa Dawuda, vlaŋha guli ta skwa zay, nda kafaya Guliyat mnda la Filisti, » kaʼa.

11 Mantsa tama, ka ghunaftá mgham ta mndu ŋa hgaktá Ahimelek, mnda dra skwi ŋa Lazglafta, zwaŋa Ahituv, nda inda la ga taŋ, gwal dra skwi ŋa Lazglafta ta nzakw ma Nuv. Ka lagha həŋ demdem da mgham. 12 Ka Sawulu mantsa: « Fa fa ta sləməŋ ɗina zwaŋa Ahituv! » kaʼa. « Mantsa nzakwa ni mghama ɗa! » ka Ahimelek. 13 Ka Sawulu nda tsi mantsa: « Kabgawu kəl kuni nda zwaŋa Yisay ka dzraftá wi ta ghəŋa iʼi, ŋa magihatá ghwaɗaka skwi na? Kabgawu kəl kagha ka vlaŋtá buradi nda kafay na? Kabgawu kəl ka ka ndəɓa dzvu da Lazglafta ta ghəŋa ni na? Mantsa ya ná, iʼi liɗis tsi ka pghihatá buɗukwa, manda na nzakwa ni gita na? » kaʼa. 14 Ka Ahimelek zlghanaftá wi ta mgham mantsa: « Mataba inda kwalvaha gha ná, mamu vərɗa mndu manda Dawuda ra? Gwasa mgham ya, tsatsi mali ta ghəŋa gwal ta ngha kagha, ya malaghu lu ta vlaŋtá sgit ma həga ga ghuni. 15 Baɗ tsaya zlrafta yu ta ɗawa Lazglafta ta ghəŋa ni ra? Diʼiŋ tsaya nda iʼi, ma uwalaŋ mgham ta aŋni, dər iʼi, dər mndu ma həga ga ini. Vani ná, sna a kwalva gha ɗekɗek ta inda na skwiha na wu, » kaʼa.

16 Ama ka mgham mantsa: « Dzaʼa mtaku ka, Ahimelek, kagha nda inda gwal ga da gha! » kaʼa. 17 Ka mgham nda gwal ta nghay ta sladu ta vata ni mantsa: « Kwiɗwa, pslawa psla ta gwal dra skwi ŋa Yawe, kabga ka skwa turtuk həŋ nda Dawuda. Nda sna həŋ kazlay na hwaya ta hway tsi kəʼa, ka kwalaghutá həŋ ta mniɗiŋta, » kaʼa. Ama ka kwalaghutá kwalvaha mgham ta faftá dzvu ta mnda dra skwi ŋa Yawe. 18 Ka mgham nda Duʼeg tama mantsa: « Kagha, kwiɗi psla psla ta tsa gwal dra skwi ŋa Lazglafta ya! » kaʼa. Ka lab vərɗa Duʼeg mnda la Idum, ka pslatá gwal dra skwi ŋa Lazglafta. Ka pslatá tsi baɗ tsaya ta gwal ta kla ifut ka liŋ ta vgha, tghas mbsak hutaf mida (85). 19 Ka rdzakanatá tsi nda kafay, ma Nuv, luwa mnda dra skwi ŋa Lazglafta, ta zgwana nda miʼaha, nda zwani nda vziʼuwaha, nda slaha, nda kəɗihha, nda rina fisik.

20 Ta ghəŋa zwaŋa Ahimelek zigha Ahituv turtuktuk yeya ta hwayapta. Abyatar hga ni. Ka hwayaghutá tsi, ka laghwi da slanaghatá Dawuda. 21 Ka rusanaftá Abyatar ta Dawuda kazlay na, psla psla Sawulu ta gwal dra skwi ŋa Yawe kəʼa. 22 Ka Dawuda nda Abyatar mantsa: « Na nghay ɗa ta Duʼeg mnda la Idum hada baɗ tsaya ná, va graf gra yu kazlay na kwalaghuta a ta snanamtá Sawulu wu kəʼa. Iʼi ta ganavatá tsa skwi ya ta inda la ga ghuni. 23 Nza nza kawadaga nda iʼi, ma zləŋ ka, kabga tsa mndu ta zba hafa gha ya ná, ta zbay ta ŋa ɗa guli. Ta vata iʼi ná, haɗ skwi dzaʼa ksaghata wu, » kaʼa.