21
1 Ka sliʼaftá Dawuda ka laghwi, ta vraghatá Yunataŋ da luwaª.
Hwayaghata Dawuda da Nuv
2 Ka ɓhadaghatá Dawuda da luwa Nuv da Ahimelek, mnda dra skwi ŋa Lazglafta. Ka lagha Ahimelek nda ghudzaku da guya Dawuda, kaʼa nda tsi mantsa: « Nya kəl ka ka sagha turtukwa gha, kul haɗ mnduha ta pgha kagha na? » kaʼa*. 3 Ka Dawuda nda Ahimelek, mnda dra skwi ŋa Lazglafta mantsa: « Mgham ta mnaɗiftá slna ŋa magay. Kaʼa nda iʼi na: “Haɗ mndu dzaʼa snaŋtá skwi ya ghunaf yu ta kagha, dər skwi ya mnaghaf yu wu,” kaʼa. Mnana mna yu ta duhwalha ɗa ta vli ŋa guyakwa ŋni. 4 Nahgani skwi ŋa zay da kagha na? Vliha vla ta buradi hutaf, ka skwi dzaʼa slanaghata ka a tsi, » kaʼa. 5 Ka tsa mnda dra skwi ŋa Lazglafta ya nda Dawuda mantsa: « Haɗ hamata buradi da iʼi wu, ba buradi fana lu ta Lazglafta yeya. Dzaʼa laviŋ lava ka ta klay ŋa zay ghuni, ka ksaŋ a duhwalha gha ta miʼaha ma na fitik na! » kaʼa*. 6 Ka Dawuda zlghanaftá wi ta mnda dra skwi ŋa Lazglafta mantsa: « Mantsa, ksaŋ a ŋni ta miʼaha wu, manda ya ma fitika dzaʼa ɗa da ghwa wa. Ta fa fa ŋni nda ghuɓa ta skwa ŋni, dər má hamata slna ta mag ŋni. Gita yeya dzaʼa kwal ŋni nzata nda ghuɓa rke! » kaʼa. 7 Ka vlaŋtá mnda dra skwi ŋa Lazglafta ta tsa buradi faghu lu ŋa Lazglafta ya ta Dawuda, kabga haɗ sana buradi wa. Ka klagaghuta ta kəma Yawe, ka mbəɗapta nda ya nda vu nda vu.
8 Tsaw baɗ va tsaya, mamu sani turtuk ma kwalvaha Sawulu ŋana slna hada ta kəma Yawe. Duʼeg hga ni mnda la Idum, tsatsi mali ta mbruta ta ghəŋa gwal ta ngha rina Sawulu*.
9 Ka Dawuda nda Ahimelek mantsa: « Mamu gupa ka kafay a tsi da kagha hadna ra? Klaf a yu ta kafaya ɗa, dər huzla vula ɗa wu, kabga ta hwaya ta hwaya tsa skwi mnaɗif mgham ya, » kaʼa. 10 Ka tsa mnda dra skwi ŋa Lazglafta ya mantsa: « Mamu tsa kafaya Guliyat mnda la Filisti, ya dza ka ma didiŋa Ila ya kay*. Wana hadna mbsam lu ma sɗakw ta hula ifut. Ka ta kumay ka ta klay ŋa gha, kla ɓa, kabga haɗ sani hadna wu, » kaʼa. Ka Dawuda mantsa: « Haɗ sani taɓta nana wa. Vliha vla, » kaʼa.
Hwayaghata Dawuda da Gat
11 Baɗ va tsaya, ka sliʼaftá Dawuda ka hwayaghuta diʼiŋ nda Sawulu. Ka ɓhadaghatá tsi da Ahis, mghama la Gat*.
12 Ka kwalvaha Ahis nda tsi mantsa: « Nana Dawuda na a mghama haɗik kay wu ra? Ŋa tsatsi a fa lu ta laha ka skalu kazlay na:
“Dəmbuʼ (1.000) pslata Sawulu ta ŋa ni,
dəmbuʼ ghwaŋ (10.000) pslata Dawuda ta ŋa ni,” kəʼa ya kay ra? » ka həŋ*.
13 Ka famtá Dawuda ta tsa gwaɗa ya ma ghəŋa ni, ka zləŋaftá tsi katakata ta Ahis mghama la Gat. 14 Mantsa tama, ka magaku tsi manda mndu ksaŋ skwi ta ghəŋa ni ta wa ira taŋ. Inda fitika nzakwa ni kawadaga həŋ ya, nzata ni manda mndu nda ksa da halaway. Mbaɗa ka taha skwiha ta parawalha matsaka luwa taŋ, ka mbəza sərɗək yarara ta ghumaya ni. 15 Ka Ahis nda kwalvaha ni mantsa: « Nda ngha kaghuni kazlay ksaŋ ksa skwi ta ghəŋa na mndu na kəʼa. Kabgawu kəl kuni ka klaɗikta na? 16 Ta pɗa halaway yu, kəl kuni ka klaɗiktá na mndu na, ŋa sagha da ga halaway ta vata iʼi ra? Nana mndu na ŋa lam da həga ɗa ra? » kaʼa.