1 Samuyel 20

Katapta Yunataŋ ta Dawuda

1 Ka hwayaftá Dawuda ma Nayut, ma Rama, ka lagha da mnay ta kəma Yunataŋ: « Nahgani maga yu? Nahgani krughuva ɗa? Nahgani dmakwa ɗa magana yu ta da gha? Nu ta kəl tsi ka zba hafa ɗa? » kaʼa. 2 Ka Yunataŋ nda tsi mantsa: « Gurɗuzuŋ tsa! Haɗ ka dzaʼa da mtuta wa. Sna ɓa, dər má kinawu tsa skwi ya, haɗ da ɗa dzaʼa magata kul mniɗiŋta wa. Kabgawu dzaʼa kəl da ɗa ka ɗifihatá skwi manda tsaya, magava a tsaya wu, » kaʼa. 3 Ka Dawuda nda waɗu nda waɗu kay guli mantsa: « Nda sna da gha ɗina kazlay na, mutsaf mutsa yu ta zɗakatahuɗi da kagha kəʼa. Wya kəʼa ta ndanay: “Má ma snaŋ Yunataŋ, kada kwala tsi ta kəɓay,” kaʼa. Ama ta waɗa waɗa yu nda hga Yawe nda hafu mida, nda ya nda htsiŋa vərɗa kagha, səla turtuk yeya mataba ɗa nda mtaku! » kaʼa.

4 Ka Yunataŋ nda Dawuda mantsa: « Skwi ya ta kum ka, dzaʼa maga gha maga yu, » kaʼa. 5 Ka Dawuda nda Yunataŋ mantsa: « Wya mahtsim dzaʼa nghafta tili, má dzaʼa nza nza yu ta vata mgham ŋa za skwa zay. Ama zliha zla ka laghwa yu, ka dzaʼa yu da ɗifaghuta ma vwah ha ga hawu baɗ mahkəna fitik. 6 Ka sew ngha a da gha ta iʼi wu, ŋa mnanata gha: “Si ta ndəɓa dzvu Dawuda ŋa ɗawaftá tvi ŋa labi misimmisim da Betlehem, luwa ni, kabga ta skala pla ghəŋ ma vaku lu ŋa inda mndu ta uʼa taŋ,” ka ka dzaʼazlay, kaʼa. 7 Ka ka mgham mantsa: “Ɗina tsa,” kaʼa, tsaya na, nda hana ghəŋa kwalva gha. Ala ka nda ɓasa ŋuɗufa ni, snaŋ sna kazlay na kura kura ta zba dzihata kəʼa. 8 Magana maga ta zɗaku ta kwalva gha, ya klam kla ka da dzraftá wi nda kagha nda hga Yawe ya. Vani ná, ka si ksaf ksa dmaku ta iʼi dər təv wu tsi, dziha dza vərɗa kagha. Kabgawu dzaʼa kəl ka ka kla iʼi da da gha na? » kaʼa.

9 Ka Yunataŋ mantsa: « Gurɗuzuŋ tsa! Ka snaŋ sna yu kahwathwata kazlay kura kura da ɗa ta dzaʼa dzaghata kəʼa, dzaʼa snagham sna yu. Ta waɗa gha waɗa yu! » kaʼa. 10 Ka Dawuda nda Yunataŋ mantsa: « Wa dzaʼa da sniɗimta ka təŋtəŋa zlghafta da gha ta wa ni na? » kaʼa. 11 Ka Yunataŋ nda Dawuda mantsa: « Sawi, laghu u la da vwah! » kaʼa. Ka laghu həŋ his his da vwah.

12 Ka Yunataŋ nda Dawuda mantsa: « Nda hga Yawe, Lazglafta la Israʼila, dzaʼa dzəghaŋ dzəgha yu ta ndana da ɗa ta na luwa na mahtsim ka baɗima a tsi. Ka haɗ sana ghwaɗaka skwi ta ndan tsi ta ghəŋa kagha wu, dzaʼa ghundaghap ghuna yu ta mndu ŋa snaghamta. 13 Ala ka mamu ghwaɗaka skwi ta pay tsi ta ghəŋa kagha ya, dzaʼa tsəghaghaf tsəgha yu ta lwi ŋa hwayaghuta gha nda zɗakwa vgha gha. Ka tsaɗigha tsa Yawe ta guma katakata ka maga a yu mantsa. Ka nza nza Yawe kawadaga nda kagha, manda ya nza tsi nda da ɗa ya. 14 Ka mantsa a tsi wu, ka ta nda hafu yu, ka magihata ka ta zɗaku ya kumaŋ Yawe ŋa kwala ɗa da mtuta. 15 Yaha ka da klaptá zɗakwa gha ma həga ga ini, dər má hliŋ hla Yawe ta inda ghumaha Dawuda ta ghəŋa haɗik, » kaʼa. 16 Ka dzraftá Yunataŋ ta wi nda la ga Dawuda, nda mnay kazlay: « Ka planam pla Yawe ta ghumaha Dawuda! » kaʼa. 17 Ka fəglamtá Yunataŋ ta Dawuda da waɗu, ma ɗvuta ni, kabga ɗvu ɗva manda ghəŋa ni.

18 Ka Yunataŋ nda tsi mantsa: « Mahtsim ngha tili. Nghaŋta a lu ta kagha wu, kabga haɗta a mndu ta vla nzakwa gha wa. 19 Baɗ mahkəna fitik, dzaʼa la la ka ha da vli si kəl ka ka ɗifaghuta baɗ tsa fitik kəl tsa skwi ya ka magata ya, ka nzata ka ndusa nda pala Izel. 20 Dzaʼa hahadap haha yu ta havaha hkən nda ta vata tsa pala ya, manda skwi mamu skwi ta hə yu. 21 Mantsa tama, dzaʼa ghunadap ghuna yu ta duhwal kazlay na: “La naghaktá tsa havaha ya!” kəʼa. Ka ka yu nda tsi mantsa: “Zaghu a tsa havaha ya nda kagha wu, klaf kla!” ka yu ya, mantsa ya ná, ka sagha ka, ka nzakwa ka ta nzakwa gha ləŋləŋ, haɗ sana skwi ŋa zləŋay gha wu, ta waɗagha waɗa yu nda hga Yawe! 22 Ama ka ka yu nda tsa duhwal ya: “Zaghu za tsa havaha ya nda kagha,” ka yu katsi, laghu la gha, kabga ka laghwa ka ka Yawe nda kagha nda tsa. 23 Ka gəɗava gəɗa Yawe ka masləmtsəka gwaɗa gwaɗa u mataba u ŋa ɗekɗek! » kaʼa. 24 Ka laghu Dawuda da ɗifaghuta ma vwah.

Ka nghaftá tili, ka nzatá mgham ma vla za skwa zay, ŋa za skwa zay. 25 Ka nzatá mgham ma vla nzakwa ni fanava lu ta vata həga. Ka nzatá Yunataŋ mbəŋ nda tsi, ta nzatá Avner ta vata Sawulu. Ka nzakw vla Dawuda kul haɗ mndu tida. 26 Gwaɗaf a Sawulu baɗ tsaya wu, kabga ta ndanay kazlay na, mutsaf a Dawuda ta sagha wu, dabga ka waya kəʼa mamu skwa tsaɗa tida, kəʼa.

27 Baɗ mahisa fitik, ga mahtsima nghatá tili, ka nzakw vla Dawuda kul haɗ mndu tida. Ka Sawulu nda zwaŋa ni Yunataŋ mantsa: « Kabgawu kwal zwaŋa Yisay sagha da vla za skwa zay, dər ɗahawu, dər gita na? » kaʼa. 28 Ka Yunataŋ zlghanaftá wi ta Sawulu mantsa: « Ɗawaŋ ɗawa Dawuda ka ŋəɗaŋəɗa ta tvi da iʼi ŋa dzaʼa da Betlehem. 29 Kaʼa nda iʼi na: “Wya dzvu, vliha vla ta tvi nda sliʼa yu, kabga mamu ŋni nda pla ghəŋ ta uʼa ŋni ma luwa ŋni,” kaʼa. “Ka sagha ka, ka zwaŋama ɗa mnaɗifta guli. Ka zɗəɗiŋ zɗa ka ta huɗi katsi, vliha vla ta tvi ka dzaʼa yu da nghanaghatá zwana ma ɗa,” kaʼa. Tsaya kwal tsi sagha da vla za skwa zaya mgham, » kaʼa.

30 Ka gufaftá ŋuɗufa Sawulu katakata ta ghəŋa Yunataŋ, kaʼa nda tsi mantsa: « Masagwa ka! Ghwaɗaka marakw ta ga sidi ta yatá kagha! Nda sna yu kazlay na klaghu kla ka ta vla zwaŋa Yisay kəʼa, pghanagha pgha ka ta hula ta ghəŋa gha, pghanagha pgha ka ta hula ta ma gha ta yagaghata! 31 Ka tata hafu zwaŋa Yisay ta ghəŋa haɗik katsi, nzata a ka ɗughwana wu, nzata a na ga mgham na ɗughwana guli wa. Ndanana, lawa ksafta, ka klaɗikta kuni, kabga nda ra ka dzata, » kaʼa. 32 Ka zlghanaftá Yunataŋ ta wi ta da ni Sawulu, kaʼa mantsa: « Kabgawu dzaʼa kəl lu ka dzata na? Nahgani maga tsi na? » kaʼa. 33 Ka slradaptá Sawulu ta gupa ŋa dzata. Tsaya tama, ka graftá Yunataŋ kazlay na a va kuray da ɗa ta dzatá Dawuda na kəʼa. 34 Gi fkwats sliʼaf sliʼa Yunataŋ ma tsa vla za skwa zay ya, nda ɓasaftá ŋuɗuf, zaŋ a ta skwa zay baɗ tsa mahisa fitika nghatá tili ya wu, dabga ta ndanay ta gwaɗa ta ghəŋa Dawuda, kabga razanaf raza da ni.

35 Ga sərɗək ga mahtsima ni, ka laghu Yunataŋ da vwah da tsa vli dzraf həŋ nda Dawuda ya. Mamu sana galaɓay kawadaga nda tsi. 36 Kaʼa nda tsa galaɓay ya mantsa: « Hwayadap hwaya da hlaɗiktá havaha dzaʼa hahadapta yu ya! » kaʼa. Ka hwayadaptá tsa galaɓay ya, ka hadaptá Yunataŋ ta tsa hava ya, ka tsughwaɗaghutá tsa galaɓay ya. 37 Manda lagha tsa galaɓay ya da tsa vli hadap Yunataŋ ta tsa hava ya, ka gugɗatá Yunataŋ mista tsa galaɓay ya: « Zaghu a tsa hava ya ta kəma gha wu ra? » kaʼa. 38 Ka gugɗəglatá tsi mista ni: « Misimmisim! Kwatskwats ka ka ma sladava ka! » kaʼa. Ka hlaftá tsa galaɓaya Yunataŋ ya ta tsa hava ya, ka vrakta da daŋahəga ni. 39 Sna a tsa galaɓay ya ta sana skwi wu, ama i Yunataŋ nda Dawuda ya, nda sna hahəŋ tataŋ ta skwi ta magaku. 40 Ka vlaŋtá Yunataŋ ta huzla ni ta tsa galaɓaya ni ya. Kaʼa nda tsi mantsa: « Vríŋ vra da luwa! » kaʼa.

41 Tahula laghwa tsa galaɓay ya, ka sab Dawuda ma ɗifa ma vəl tsa pala Izel nda təv sud ya. Ka zləmbatá tsi zlumbruh ta haɗik, ka tsəlɓata hkən səla. Ka brusuvtá tsa graha ya ta vgha, ka taw həŋ his his ta taw, ama pəŋ ŋa Dawuda. 42 Ka Yunataŋ nda Dawuda mantsa: « La nda vghata zɗaku, ya waɗa waɗa u sani nda sani nda hga Yawe ya, ka nza nza Yawe ka masləmtsək ŋa ɗekɗek mataba kagha nda iʼi, nda ya mataba zivirha u, » kaʼa.