Mbəɗay Yunataŋ ta gwaɗa ta Dawuda
19
1 Ka mnanatá Sawulu ta zwaŋa ni Yunataŋ nda inda kwalvaha ni ŋa dzata taŋ ta Dawuda. Tsaw Yunataŋ zwaŋa Sawulu ná, ɗvu ɗva ta Dawuda katakata, 2 ka snanamtá tsi ta Dawuda, kaʼa mantsa: « Ta zbay da ɗa Sawulu ta tva dzata kagha. Ɗasuwa ka ka da nzata ga sərɗək mahtsim, ka mutsafta ka ta vla ɗifa gha ɗina ŋa ɗifaghuta gha. 3 Iʼi ya ná, dzaʼa sab sa yu ka sladanavatá da ɗa ma vwah ya dzaʼa nzamta kagha. Dzaʼa mnay yu ta gwaɗa ta kagha ŋa da ɗa, ŋa nghay ɗa ka kinawu kəʼa dzaʼa da magay ya, ŋa snaghamta ɗa, » kaʼa.4 Ka mnə Yunataŋ ta gwaɗa ɗina ɗina ta ghəŋa Dawuda ŋa da ni Sawulu. Kaʼa mantsa: « Yaha mgham da gatá dmaku nda kwalva ni Dawuda, kabga haɗ dmaku gagha tsi wa. Mghama skwiha ta mag tsi guli ná, ŋərma skwiha ya ka ŋa gha. 5 Pərɗa zaɗiŋtá hafa ni, dza dza ta mnda la Filisti, ka hɗamtá Yawe ta mbaku dagala ŋa inda la Israʼila. Nda ngha kagha, ka rfu ka ta rfu. Kabgawu dzaʼa gata ka ta dmaku nda ma pghiŋta gha ta usa mndu kul haɗ dmakwa ni, nda ma dzata gha ta Dawuda kul haɗ sana skwi maga gha tsi na? » kaʼa. 6 Ka fanatá Sawulu ta sləməŋ ta Yunataŋ, ka waɗatá tsi, kaʼa mantsa: « Ta waɗa waɗa yu nda hga Yawe nda hafu mida, haɗ lu dzaʼa dzatá Dawuda wu! » kaʼa. 7 Ka hgaftá Yunataŋ ta Dawuda, ka mnanaftá inda tsa gwaɗaha ya. Ka kladaghatá Yunataŋ ta Dawuda da Sawulu, ka mag Dawuda ta slna ni manda va ya ta mag tsi tazlay.
Katapta Mihal ta zəʼala taŋ Dawuda
8 Ka sliʼiglaftá vulu, ka laghu Dawuda da vulu nda la Filisti. Ka liŋtá tsi ta həŋ ka ŋəɗaŋəɗa, ka tatá həŋ ta vgha nda hwaya ta kəma Dawuda.
9 Ma sana fitik, ta nzaku Sawulu ma həga ni nda ŋatá gupa ni ma dzvu, ka saha ghwaɗaka sulkum ghunaga Yawe suw ta ghəŋa Sawulu. Nda ŋatá kəzliŋkəzliŋ ni Dawuda ta dzay dzay. 10 Ka kum Sawulu ta slratá Dawuda ta vata həga nda gupa ni, ama ka waratá Dawuda, ka laghu gupa Sawulu tes da vata həga. Ka hwayaftá Dawuda ka ndapta ta tsa rviɗik ya.
11 Ka ghunaftá Sawulu ta mnduha ŋa ɗakwatsaftá Dawuda ma həga ni, ŋa dzata ga sərɗək ga mahtsima ni. Ka tɗanaŋtá markwa taŋ Mihal ta sləməŋ ta Dawuda, kaʼa mantsa: « Ka katap a ka ta hafa gha ta na rviɗik na wu katsi ná, dzaʼa dza dza lu ta kagha mahtsim*, » kaʼa. 12 Ka fidiŋtá Mihal ta Dawuda nda ta rwiɗ. Ka hwayaghutá tsi, mantsa ya kəʼa kataptá hafa ni. 13 Ka klaftá Mihal ta skwa wuyay, ka fafta ta ghəzləŋ, ka fatá tsi ta filu ka swida gu nda ta ghəŋa ni, ka bukwanaghata nda lgut. 14 Manda ghunadapta Sawulu ta mnduha da ksa Dawuda, ka tsa marakw ya mantsa: « Ɗughwana a wu, » kaʼa. 15 Ka ghunəglaftá Sawulu ta mnduha ŋa dzaʼa nghanatá Dawuda, kaʼa nda həŋ mantsa: « Klagaɗighawa kla nda ghəzləŋ nda ghəzləŋ ŋa dzata, » kaʼa. 16 Lama tsa gwal ghunay ya, skwa wuyay yeya ta ghəzləŋ, nda filu ka swida gu nda ta ghəŋa ni. 17 Ka Sawulu nda Mihal mantsa: « Kabgawu kəl ka ka nanaftá iʼi mantsa na? Ka zliŋta ka ta ghuma ɗa, ka ndaghuta na! » kaʼa. Ka Mihal nda Sawulu mantsa: « Tsatsi ta mnihata: “Zliha zla ka laghwa yu, ka mantsa a tsi wu, dzaʼa dzagha dza yu!” » kaʼa nda iʼi.
I Sawulu nda Dawuda ma Rama
18 Mantsa ya hwayaghuta Dawuda ka ndaghuta, ka ɓhadaghatá tsi da Samuyel ma Rama, ka snanamtá tsi ta inda skwi maga Sawulu. Ka laghu tsi kawadaga nda Samuyel da nzata ma Nayut. 19 Ka sagha lu da mnanatá Sawulu: « Wa a Dawuda kay ma Nayut, ma Rama, » ka lu. 20 Ka ghunaftá Sawulu ta gwal ghunay ŋa ksaftá Dawuda. Ka nghaŋta həŋ ta tskatá la anabi ta kla lwa Lazglafta, Samuyel ta klanatá kəma ta həŋ. Ka saha Sulkuma Lazglafta suw ta tsa gwal ghunaf Sawulu ya, ka lam hahəŋ da kla lwa Lazglafta guli. 21 Ka lagha lu da snanamtá Sawulu, ka ghunaftá tsi ta sanlaha guli, ka lam hahəŋ da kla lwa Lazglafta guli. Ka ghunəglaftá tsi ta sanlaha ka mahkən, ka lam hahəŋ guli da kla lwa Lazglafta. 22 Ka sliʼaftá vərɗa Sawulu, ka labi da Rama, ka lagha tsi ta wa sana mghama vavrəm ma Sehu. Ka ɗawaŋtá tsi: « Ga i Samuyel nda Dawuda ya na? » kaʼa. Ka lu nda tsi mantsa: « Wa a həŋ ma Nayut, ma Rama! » ka lu nda tsi. 23 Ka lab tsi da Nayut ma Rama. Ka saha Sulkuma Lazglafta suw ta ghəŋa tsatsi guli, ka kɗə tsi ta mbaɗa ni, nda kla lwa Lazglafta ha ka ɓhadaghata ni da Nayut, ma Rama. 24 Ka suɗiŋtá tsatsi guli ta lgutha ni, ka klə tsatsi ta lwa Lazglafta guli ta kəma Samuyel. Tahula tsa, ka zləmbatá tsi ka fərdiʼu, ka nzata mantsa ya tekulemes fitik, petsuweɗ vli. Tsaya kəl lu ka mnay kazlay na: « Tekw Sawulu guli mataba la anabi ra? » kəʼa ya*.