Ksatá gra i Dawuda nda Yunataŋ
18
1 Na gi kɗiŋta Dawuda ta gwaɗa nda Sawulu, ka ndiʼanavatá Yunataŋ ta vgha ta Dawuda, ka ɗvuta manda va ghəŋa ni. 2 Daga baɗ tsa ya, ka ŋaghutá Sawulu ta Dawuda, zligliŋ a ŋa vra ni dzagha ga da ni wa. 3 Mantsa tama, ka dzraftá Yunataŋ ta wi nda Dawuda, kabga ɗvu ɗva manda va ghəŋa ni. 4 Ka suɗatá Yunataŋ ta guduŋgaba ta vgha ni, ka vlaŋtá Dawuda, vlaŋha ta huzla vula ni, nduk nda kafaya ni, nda lgheɗa ni, nda ɓanava ni. 5 Ta za za Dawuda ta ghwa ma inda vli ta ghunafta Sawulu nda gwal vulu. Ka fatá Sawulu ta Dawuda ka ghəŋ ta ghəŋa gwal vulu, ka zɗəganatá tsaya ta mnduha nda kwalvaha Sawulu tani.Dray Sawulu ta Dawuda
6 Tahula dzata Dawuda ta tsa la Filisti ya, ta vragaghatá həŋ ta vulu, ka sliʼagaptá inda miʼaha ma inda luwaha la Israʼila da guya mgham Sawulu, nda falaha nda falaha, nda skalu nda skalu, nda dza tim nda dza tim, nda hayayi nda hayayi, ka rfu, nda tehwtsa nda tehwtsa.
7 Tsa miʼaha ta falaha ka dzaʼa nda skalu ya, ka həŋ ta zlgha wa ni sani nda sani mantsa:
« Dəmbuʼ (1.000) pslata Sawulu ta ŋa ni,
dəmbuʼ ghwaŋ (10.000) pslata Dawuda ta ŋa ni! » ka həŋ.
8 Ka ɓasaftá Sawulu ta ŋuɗuf katakata, zɗəgana a tsa laha ya wa. Kaʼa mantsa: « Ka vlaŋta lu ta dəmbuʼ ghwaŋ (10.000) ta Dawuda ná, dəmbuʼ (1.000) ŋa ɗa. Ga mgham a pɗakwa ni nda tsa wu ri! » kaʼa. 9 Daga baɗ tsaya, nda ira fsa vara ta ngha Sawulu ta Dawuda.
10 Ga mahtsima ni, ka saha ghwaɗaka sulkum suw ghunaga Lazglafta ta ghəŋa Sawulu, ka gi lam tsi da mna wayəm ma həga ga taŋ. Ta dzay dzay Dawuda ta kəzliŋkəzliŋa ni manda ya ma tsa sana fitikha ya kay. Nda ŋatá gupa ni Sawulu ma dzvu. 11 Ka slradaptá Sawulu ta gupa ni, kaʼa mantsa: « Dzaʼa sliglanavatá Dawuda yu ta vata həga! » kaʼa. Ama his səla Dawuda ta warata. 12 Ka zləŋatá Sawulu ta Dawuda, kabga kawadaga Yawe nda Dawuda, zlanava zla ta Sawulu*. 13 Mantsa tama, ka kliŋtá Sawulu ta vata ni, ka fata ka mali ta ghəŋa mnduha dəmbuʼ (1.000). Daga baɗ tsaya, Dawuda ta klanatá kəma ŋa gwal vulu, 14 ta dzaʼa ta kəma ta kəma Dawuda ma inda skwi ta mag tsi, kawadaga Yawe nda tsi guli. 15 Nghay Sawulu ká Dawuda ta gɗata ta dzaʼa ta kəma ta kəma ma inda skwi, ka zləŋatá tsi. 16 Ama ka ɗvutá inda la Israʼila, nda la Yahuda ta Dawuda, kabga tsatsi ta klanatá kəma ta həŋ ma vulu.
Klafta Dawuda ta marakw
17 Ka Sawulu nda Dawuda mantsa: « Wana Merav, zumala ɗa ka makwa. Tsatsi dzaʼa yu da vlaghata ka marakw. Skwi kweŋkweŋ ná, ŋavata kagha ka bikwira vulu ŋa gha ma slna ɗa, ka vula ka ta vuluha Yawe, » kaʼa. Ka Sawulu ma ghəŋa ni ya na: « Ma faf yu ta dzvu tida, la Filisti katsi! » kaʼa. 18 Ka Dawuda nda Sawulu mantsa: « Wa iʼi ma ɗali na? Wa iʼi ta uʼa ɗa, dər mndəra ini ma Israʼila a tsi, ŋa nzakwa ɗa ka gwasa mgham na? » kaʼa. 19 Ma tsa fitik má dzaʼa vlə lu ka marakw ta Merav makwa Sawulu ŋa Dawuda ya, ka vlaŋtá lu ta Adriʼel, mnda la Məhula*.
20 Ka ɗvutá Mihal sana makwa Sawulu ta Dawuda. Ka mnanatá lu ta Sawulu, ka zɗəganatá tsi. 21 Ka Sawulu mantsa: « Dzaʼa vlaŋ vla yu ka marakw, ŋa nzakwa ni ka dəɓəl ka ŋa ni, ŋa dɗamta ni da dzva la Filisti, » kaʼa. Ka Sawulu ka mahis nda Dawuda tama mantsa: « Gita, dzaʼa nzakway ka ka gwasa ɗa, » kaʼa. 22 Ka Sawulu mnanaftá kwalvaha ni mantsa: « Mnanawa mna kɗekkɗek ta Dawuda. Ka kuni nda tsi na: “Zɗəgana zɗa ka ta mgham, ɗvu ɗva inda kwalvaha ni ta kagha, nza nza ka gwasa mgham!” ka kuni nda tsi, » kaʼa.
23 Ka mnanamtá kwalvaha Sawulu ta tsa gwaɗaha ya ma sləməŋ ma sləməŋ ta Dawuda. Ka Dawuda mantsa: « Ka skwi kwitikw na nzata ka gwasa mgham ra? Iʼi ná, pɗu yu, haɗ hayhaya ɗa wu, » kaʼa.
24 Ka lagha tsa kwalvaha ya da mnanatá tsa zlgha wa Dawuda ya ta Sawulu. 25 Ka Sawulu mantsa: « Wya ká kuni da mnanatá Dawuda: “Va a mgham ta skwa wuma wu, ama fafaɗa la Filisti dərmək yeya ta kum tsi ŋa planamtá ghumaha ni,” » kaʼa, ka həŋ. Ma tsaya ná, ta kumay Sawulu ta dɗamta Dawuda nda ma dzva la Filisti. 26 Ka lagha kwalvaha Sawulu da mnanatá tsa gwaɗaha ya ta Dawuda. Ka kum tsa gwaɗa nzakway ka gwasa mgham ya ta zɗəganatá Dawuda. Ma kɗaku tsa fitik tsaf lu ya, 27 ka sliʼaftá Dawuda nda mnduha ni, ka pslatá la Filisti his dərmək (200). Ka ɗatsaktá Dawuda ta fafaɗha taŋ, ka mbəɗaftá lu ta kəma mgham, ŋa nzakwa Dawuda ka gwasa mgham. Ka vlaŋtá Sawulu ka marakw ta makwa ni Mihal.
28 Kəʼa ka Sawulu ná, ka graftá tsi kazlay na kawadaga Yawe nda Dawuda kəʼa. Mihal makwa ni ya tani, ɗvu ɗva tsatsi ta Dawuda. 29 Ka sgəglavaghatá zləŋay Sawulu ta Dawuda, ka nzatá Sawulu ɗekɗek ka ghuma Dawuda. 30 Inda gɗata mghamha la Filisti ta dzaʼa da vulu ya, mal Dawuda ta dzaʼa ta kəma ta kəma ka inda maliha ma sludziha Sawulu, ha ka laghu hga ni katakata da zərwa.