Rwatá i Sawulu nda zwana ni
31
1 Ka liŋtá la Filisti ta la Israʼila nda vulu. Ka hwayaftá la Israʼila ta kəma taŋ, ka pslatá lu ta ndəghata həŋ ta ghwá Gilbuwa. 2 Ka hwayiŋtá la Filisti ta i Sawulu nda zwana ni ka klatá wa taŋ, ka dzatá həŋ ta Yunataŋ, nda Avinadav, nda Malkisuwa, zwana Sawulu. 3 Ka laghu mbrakwa vulu nda təv Sawulu, ka slaftá hava gwal vulu tida, ka balatá katakata. 4 Ka Sawulu nda tsa mndu ta klanatá huzla vula ni ya mantsa: « Tsəhagap tsəha ta kafaya gha, ka sliglata ka ta iʼi. Ka mantsa a tsi wu ná, gwal kul tsaku fafaɗa taŋ dzaʼa sagha da magay, ŋa gay taŋ ta ghəliz ŋa ɗa, » kaʼa. Ama va a tsa mndu ta klanatá huzla vula ni ya ta dzata wu, kabga nda ksa da zləŋ katakata. Mantsa tama, ka klaftá Sawulu ta kafay ni ka vzuŋtá vgha ta wa ni. 5 Nghanata tsa mndu ta klanatá huzla vulu ya ta mtatá Sawulu, ka vzuŋtá tsatsi guli ta vgha ni ta wa kafaya ni, ka mtuta kawadaga nda tsi. 6 Mantsa ya ka i Sawulu nda zwana ni hkən, nda mndu ta klanatá huzla vula ni nda inda mnduha ni rwuta ta fitika turtuk. 7 Nghanata la Israʼila ta sana ɓla didiŋa, nda gwal ta sana ɓla Yardeŋ ta mbəɗatá hula la Israʼila ka hwaya, nda rwatá i Sawulu nda zwana ni, ka zlanavatá hahəŋ guli ta luwaha taŋ ka hwayaghuta. Ka sliʼadaghatá la Filisti nzata hada.8 Ga mahtsima ni, ka sliʼadaghatá la Filisti da hla huzla ta mbliha, ka slanaghatá həŋ ta mbla Sawulu nda zwana ni hkən rafsaŋa ta ghwá Gilbuwa. 9 Ka tsatá həŋ ta ghəŋa Sawulu, ka hlatá həŋ ta huzla vula ni. Ka wawu həŋ ma inda haɗika la Filisti, ka ta gwaɗa ta ghəŋa ni ma həgaha skwa wuyayha taŋ nda ya mataba mnduha. 10 Ka pghamtá həŋ ta huzla vula Sawulu ma həga Ghasturetha, ka hbagatá həŋ ta mbla ni ta vata matsaka luwa Betʼsaŋ.
11 Manda snaŋta la Yaves ma Gilghat ta skwi magana la Filisti ta Sawulu, 12 ka sliʼaftá inda gwal ta dra ŋuɗuf*. Tahula hana taŋ ta mbaɗa, ka tsahagatá həŋ ta mbla i Sawulu nda zwana ni ta vata matsaka luwa Betʼsaŋ. Tahula tsa ka vradaghatá həŋ da Yaves, hada, ka driŋtá həŋ ta həŋ. 13 Ka hlaftá həŋ ta ghudzifha taŋ, ka lamta mista mblam ma Yaves. Tahula tsa, ka magatá həŋ ta fitik ndəfáŋ ta suma.