Dagaptá kwakwar təv dɗakwa fitik
14
1 Wya kwakwarha mutsaf la Israʼila ta haɗika Kanʼana. Lagha i Ilghazar mnda dra skwi ŋa Lazglafta, nda Yəhusuwa zwaŋa Nuŋ, nda zəʼala həga mataba mndəra mnduha kavghakavgha ka daganaftá la Israʼila. 2 Ka dagaftá həŋ ka skwa za həga taŋ manda va ya mnaf Yawe ta Musa: Ka vzaftá həŋ ta vindima ta ghəŋa tsa kwakwarha ya, ŋa daganaftá tsa mndəra mnduha təmbay nda rita ya. 3 Nziya nza tsi, daganaf daga Musa ta kwakwar ta ɓla Yardeŋ nda təv dɗakwa fitik ya, ka skwa za həga taŋ ta mndəra mnduha his nda rita, ama vlaŋ a ta ŋa mndəra la Levi wa. 4 Tsaw, his mndəra mndu mataba la Yusufu: Mndəra la Mənase, nda mndəra la Ifrayim. La Levi ya ná, mutsaf a hahəŋ ta kwakwar wa, ama luwaha yeya mutsaf həŋ ŋa nzakwa taŋ, nda vli ŋa ngha rina fisika taŋ nda slaha taŋ. 5 Mantsa ya daganapta la Israʼila ta tsa haɗik ya, manda va ya mnanaf Yawe ta Musa.Vlaŋta lu ta kwakwar ta Kalep ka skwa za həga ni
6 Ma sana fitik, ka lagha gwal ma mndəra la Yahuda slanaghatá Yəhusuwa ma Gilgal. Ka Kalep zwaŋa Yəfune mnda la Kənaz, nda tsi mantsa: « Nda sna ka ta gwaɗa mnana Yawe ta Musa, mnda Lazglafta ma Kadesbarnegha ta ghəŋa ɗa, nda ya ta ghəŋa kagha. 7 Fwaɗ mbsak ima ɗa ta ghunaftá Musa, kwalva Yawe ta iʼi ma Kadesbarnegha, ŋa dzaʼa vitsanatá haɗik Kanʼana. Manda vrakta ɗa, ka klanaktá yu ta wuna wa ni manda va ya ta raku. 8 Ka sagha tsa sanlaha ma zwana ma ta labi mista ɗa ya da rwanatá vgha ta mnduha. Ama iʼi, ka ŋanatá yu kahwathwata ta Yawe, Lazglafta ɗa nda ŋuɗufa ɗa turtuk. 9 Ma tsa fitik ya, ka waɗata Musa kaʼa mantsa: “Waɗa waɗa yu, dzaʼa mutsay kagha, nda zwana gha ka skwa za həga ghuni ŋa ɗekɗek ta inda haɗik ya ŋla ka, kabga hɗam hɗa ka ta skwi manda va ya kumaŋ Yawe, Lazglafta ɗa, nda inda ŋuɗufa gha.” 10 Ndanana, mafwaɗ mbsak hutaf mida vaku na, manda mnanata Yawe ta tsa gwaɗa ya ta Musa. Ma fitika nzakwa la Israʼila ta sabi ma mtak. Daga baɗ tsa, ka zlihatá Yawe nda hafu manda ya taf tsi ta imi ta sləməŋ. Wana ndanana ná, matghas mbsak hutaf mida ima ɗa na. 11 Ama ha gita, ta nda prəsl ma vgha ɗa, manda va ya ma tsa fitika ghunafta Musa ta iʼi ya. Ta mamu mbraku ma iʼi manda va ya ghalya, dər ŋa vulu tsi, dər ŋa maga wu tsi. 12 Ndanana tama, vliha vla ta mayaka ɗa ta haɗikha ya ta ghwá, manda ya taɗif Yawe ta imi ta sləməŋ ma tsa fitik ya. Snaŋ sna kagha baɗ tsaya kazlay na, ta nzaku ma luwaha dagala dagala ŋam lu ma matsak ŋa katá ghəŋ da vulu, na la Ghanak kəʼa. Ka kawadaga Yawe nda iʼi katsi ná, dzaʼa ghəzliŋ ghəzla yu ta həŋ manda va ya mna Yawe, » kaʼa.
13 Ka tfanaghatá Yəhusuwa ta wi ta Kalep zwaŋa Yəfune, ka vlaŋtá tsi ta luwa Hevruŋ ka skwa za həga ni. 14 Ha gita, ŋa zivira Kalep zwaŋa Yəfune mnda la Kənaz tsa Hevruŋ ya, kabga maga maga Kalep ta skwi manda va ya kumaŋ Yawe, Lazglafta la Israʼila. 15 Si ghalya ná, Kiriyatʼarba ta hga lu ta Hevruŋ, manda mnay kazlay na luwa Arba kəʼa ya. Arba ná, mndu ya kulaŋ lu mataba la Ghanak ya.
Tahula tsa tama, ka mbiʼi tsa haɗik ya ta vgha, ta haɗ vulu wa.