Pɗakwa haɗikha ŋa zakta
13
1 Nda hala Yəhusuwa, lula ima ni. Ka Yawe nda tsi mantsa: « Nda hala ka, lula ima gha, ama ta dagala kwakwarha ŋa zakta. 2 Wya tsa kwakwarha ta pɗaku ya: Inda kwakwara la Filisti, nda inda ŋa la Gesur. 3 Klaf kla lu ta tsa haɗikha ya ka la Kanʼana demdem. Sliʼafta ni daga ma lika Sihur ta mukuma nda la Masar dikw ta mukuma nda kwakwara la Ghekruŋ nda ma nur. Ma tsa kwakwarha ya tsa mghamha hutaf ka ŋa la Filisti ya. Hahəŋ ta ga mgham ta ghəŋa la Ghaza, nda la Asdut, nda la Askəluŋ, nda la Gat, nda la Ghekruŋ, nda kwakwara la Ghiva 4 nda ma sud ya. Pɗakwa ni ŋa klaghuta guli, tsaya inda kwakwara haɗika la Kanʼana, sliʼafta ni ma Meʼara kwakwara la Tsiduŋ dikw da Afek ta mukuma nda la Amuru. 5 Pɗakwa ni ŋa klaghuta guli ná, tsaya kwakwara la Gəbal, nda inda Ləvanuŋ nda təv safa fitik, sliʼafta ni ma Baghalgat mista ghwá Hermuŋ dikw ta wa tgha lami da Hamat. 6 Pɗakwa ni ŋa kɗiŋta guli ná, tsaya kwakwarha ya ta ghwá sliʼafta ni ma Ləvanuŋ, dikw da Misrefutmayim, mnduha ma tsa kwakwarha ya ná la Tsiduŋ həŋ demdem. Dzaʼa ghəzliŋ ghəzla yu ta tsa mnduha ya ta kəma la Israʼila. Daganafta kagha ŋa gha ta tsa haɗik ya ka skwa za həga taŋ ta la Israʼila manda ya mnaghaf yu. 7 Ndana tama, daganap daga ta tsa haɗikha ya ka nzakwa tsi ka skwa za həga taŋ ŋa tsa mndəra mnduha təmbay ya, nda ya ŋa rita mndəra la Mənase, » kaʼa.Dagaptá kwakwar ta ɓla zala Yardeŋ
8 Nda ghada mutsuta sana rita mndəra la Mənase, nda la Rubeŋ, nda la Gat ta ŋa taŋ kwakwar daganaf lu ta həŋ nda ma Yardeŋ nda təv safa fitik ya. Musa kwalva Yawe ta daganaftá həŋ. 9 Vraghuta ŋa taŋ kwakwar nda ma sud ná, lab nda ma luwa Gharugher ta wa zala Arnuŋ. Ka lab tsa mukuma ya guli nda ma sana luwa ma didiŋa ta lab zala Arnuŋ nda mida. Tsa kwakwar ya ná, laghwa ni inda dandara Medeba dikw da luwa Divuŋ, 10 nda inda luwaha Sihuŋ, mghama la Amuru. Tsatsi si ta ga mgham ta ghəŋa Hesbuŋ ta kwakwar laghwa ni dikw ta mukuma nda la Ghamuŋ. 11 Kwakwara taŋ guli ná, tsaya Gilghat, nda kwakwara la Gesur, nda kwakwara la Maghaha, nda inda ghwá Hermuŋ, nda inda kwakwara Basaŋ dikw da luwa Salka. 12 Mida guli ná, mamu inda ga mghama Ghug mghama Basaŋ. Tsatsi kɗavakta sani mataba pɗakwa mndəra la Rafa. Tsatsi si ta ga mgham ma Ghastarut nda Idreghi. Kwaraf kwara Musa ta tsa mnduha ya, ka ghəzliŋtá həŋ. 13 Ama ghəzlaŋ a la Israʼila ta la Gesur, nda la Maghaha wa. Ta mataba la Israʼila həŋ ha gita.
14 Haɗik ya daganap Musa ka skwa za həga ná, mutsaf a mndəra la Levi wa. Skwa za həga taŋ ná, ta klapta ma skwi ta drə lu ŋa Yawe, Lazglafta la Israʼila lu manda ya tanaf Yawe ta imi ta sləməŋ ta həŋ.
Haɗika za həga vlaŋ lu ta la Rubeŋ
15 Ka tsanaftá Musa ta mayaka taŋ ta mndəra la Rubeŋ ta uʼa taŋ ta uʼa taŋ. 16 Vraghwa ŋa taŋ kwakwar nda ma sud ná, lab nda ma luwa Gharugher ta wa zala Arnuŋ. Ka lab tsa makuma ya guli nda ma sana luwa ma didiŋa ta lab zala Arnuŋ nda mida. Tsa kwakwar ya ná, laghwa ni ta inda dandar ta waftá Medeba, 17 nda Hesbuŋ, nda inda luwaha ta dandar. Tsaha ya Divuŋ, nda Bamut Baghal, nda Betbaʼalmeʼuŋ, 18 nda Yahtsa, nda Kedemut, nda Mefaʼat, 19 nda Kiriyatayim, nda Sivma, nda Tseretʼhasahar ta ghwá ta ghəŋa didiŋa. 20 Mantsa ya guli Betʼpəghur ta vata ghwá Pisga, nda Betʼhayesimut. 21 Inda luwaha ta dandar, nda inda ga mghama Sihuŋ mghama la Amuru ta ga mgham ma Hesbuŋ, kwaraf kwara Musa, nda maliha la Midyaŋ: I Ivi, nda Rekem, nda Tsur, nda Hur, nda Revagh. Mista ga mghama Sihuŋ həŋ, ma tsa haɗik ya ta nzakwa həŋ guli. 22 Mataba tsa gwal psla la Israʼila nda kafay ya, tekw i Bilʼam zwaŋa Bəghur ta ga ɗəgha ya mida. 23 Mukuma kwakwara la Rubeŋ ná, tsaya wa Yardeŋ. Tsa luwaha, nda zwana luwaha ta wanafta mnaga lu ya ná, tsaha ya skwa za həga mndəra la Rubeŋ ta uʼa taŋ ta uʼa taŋ.
Haɗika za həga vlaŋ lu ta la Gat
24 Ka vlaŋtá Musa ta kwakwara taŋ ta mndəra la Gat, ta uʼa taŋ ta uʼa taŋ. 25 Kwakwara taŋ ná, tsaya Yaghəzer, nda inda luwaha Gilghat, nda rita haɗika la Ghamuŋ, dikw da Gharugher mbəŋ nda Raba ya, 26 nda ya daga ma Hesbuŋ, dikw da Ramatmitspe, nda Betunim, nda sliʼafta ni ma Mahanayim, dikw ta kwakwara Dəvir. 27 Ma didiŋa ma Yardeŋ ya guli ná, tsa kwakwar ya guli ná, tsaha ya luwa Betʼharam, nda Betʼnimra, nda Sukut, nda Tsafuŋ. Tsaha ya pɗakwa luwaha ma ga mghama Sihuŋ mghama Hesbuŋ. Tsa kwakwar ya ná nda ta tva safa fitik ta nzatá lu ta wa Yardeŋ. Tsa Yardeŋ ya makuma tsa haɗik ya, dikw ta wa drəfa Kineret nda ma nur. 28 Inda tsa luwaha ya nda zwana luwaha tani, ta nzakway ka skwa za həga mndəra la Gat ta uʼa taŋ ta uʼa taŋ.
Haɗika za həga vlaŋ lu ta rita mndəra la Mənase
29 Kuraghuta kwakwar ya vlaŋ Musa ta rita mndəra la Mənase ta uʼa taŋ ta uʼa taŋ ná, 30 zlrafta ni ta Mahanayim, nda inda kwakwara Basaŋ, nda inda ga mghama Ghug mghama Basaŋ, nda inda luwaha Yaʼir mkuʼ mbsak ma tsa kwakwar ya. 31 Mida rita haɗika Gilghat, nda luwaha Ghastarut, nda Idreghi, luwaha ga mghama Ghug ma Basaŋ. Inda tsa kwakwar ya vlaŋ lu ta rita mndəra la Mahir zwaŋa Mənase ta uʼa taŋ ta uʼa taŋ.