Yəhusuwa 11

Vulu ta dzuɓayha Merum

1 Snaŋta Yabiŋ mghama Hatsur ta za ghwa ta zə Yəhusuwa, ka ghunaftá tsi ta mnduha ni da Yubab mghama Maduŋ, nda ya da mghama Simruŋ, nda ya da mghama Ahsaf, 2 nda ya da mghamha ma kwakwarha ta ghwáha nda təv nur, nda daɓa Gharava təv suda Kineret, nda ya ta kwakwarha ta kuɗuŋur, nda ya ma Dur təv dɗakwa fitik, 3 nda ya da la Kanʼana təv safa fitik, nda ya nda təv dɗakwa fitik, nda la Amuru, nda la Het, nda la Periz, nda la Yəbus ta ghwá, nda la Hiv mista ghwá Hermuŋ ta haɗika Mitspa. 4 Ka sliʼagaptá tsa mghamha ya demdem nda sludziha taŋ tani ŋəɗdəm manda wutak ta wa drəf. Ka sliʼaktá həŋ nda plis nda plis, nda ya nda mwata plisha, ka ka nda ndəghatá həŋ. 5 Ka dzraftá tsa mghamha ya demdem ta wi, ka lagha həŋ fata ghuɓa taŋ ndusa nda dzuɓayha Merum, ŋa guyata nda vulu nda la Israʼila.

6 Ka Yawe nda Yəhusuwa mantsa: « Ma zləŋ ka ta həŋ. Ta na luwa na mahtsim, dzaʼa psla psla yu ta həŋ demdem ta wa ira la Israʼila. Dzaʼa ratsiŋ ratsa ka ta dzalakwa plisha taŋ, dzaʼa dariŋ dara ka ta mwata plisha taŋ nda vu, » kaʼa. 7 Ka sliʼafta Yəhusuwa kawadaga nda gwal vulu mista ni. Ka lagha həŋ dluk valanaghatá həŋ ta dzuɓayha Merum, ka tamtá vgha mataba taŋ. 8 Ka zlanaŋtá Yawe ta həŋ ma dzva la Israʼila, ka pslatá həŋ, ka ŋawaftá həŋ ma nur tsəlak da Tsiduŋ luwa dagala, tsəlak da Misrefutmayim, tsəlak da didiŋa Mitspe nda ta tva safa fitik. Ka pslatá həŋ ta həŋ, haɗ ya ta ndapta dər turtuk nda hafu wa. 9 Ka maganatá Yəhusuwa ta həŋ manda ya mnanaf Yawe: Ka ɗatsanaptá tsi ta dzalakwa plisha taŋ, ka dariŋtá mwata plisha taŋ guli nda vu.

Zutá luwa Hatsur

10 Ma tsa fitik ya, ka vrakta Yəhusuwa zatá luwa Hatsur, ka dzatá tsi ta mghama ni nda kafay, kabga si tsa Hatsur ya wudəma inda tsa luwa ga mgham ya ma tsa fitik ya. 11 Ka zaɗanatá Yəhusuwa ta inda mnduha ma tsa luwa ya nda kafay. Haɗ mndu ya ta pɗata nda hafu dər turtuk wa. Ka driŋtá Yəhusuwa ta Hatsur nda vu. 12 Ka zatá Yəhusuwa ta inda tsa luwaha ya, nda inda mghamha taŋ, ka pslatá həŋ nda kafay. Ka zaɗanatá tsi manda va ya mnaf Musa kwalva Yawe. 13 Ama dariŋ a la Israʼila ta luwaha ta kuɗuŋur wa. Ba Hatsur yeya driŋ Yəhusuwa. 14 Ka hlutá la Israʼila ŋa ŋa taŋ ta inda skwa zləɗu, nda rini ya slanagha həŋ ma tsa luwaha ya, ama ka pslatá həŋ nda kafay ta inda mnduha ha ka zaɗanatá həŋ, haɗ mndu ya zlana həŋ dər turtuk nda hafu wa. 15 Si mnanaf mna Yawe ta zlahuha ta ghəŋa ni ta kwalva ni Musa. Ka mnanaftá Musa ta tsa zlahuha ya ta Yəhusuwa. Ka mag Yəhusuwa manda va tsaya. Pɗanaghu a Yəhusuwa ta inda skwi ya mnanaf Yawe ta Musa wa.

Kɗiŋta Yəhusuwa ta zaktá haɗikha

16 Ka zatá Yəhusuwa ta inda tsa haɗikha ya: Kwakwarha ta ghwáha, nda inda kwakwara Negev, nda inda kwakwara Guseŋ, nda kwakwarha ta kuɗuŋur nda təv dɗakwa fitik, nda Gharava, nda ghwáha la Israʼila nda kuɗuŋurha ni tani. 17 Ka zatá tsi ta kwakwarha sliʼafta ta ghwá Halak ta laghwi ta kwakwara Seghir, dikw da Baghalgat ma didiŋa Ləvanuŋ mista ghwá Hermuŋ. 18 Nzəɗava nzəɗa Yəhusuwa ta vula tsa vulu ya nda inda tsa mghamha ya. 19 Haɗ luwa ya ta nzata nda zɗaku nda la Israʼila wu, ba la Hiv ma Givghuŋ yeya. Nda vulu hlaghuta lu ta inda sanlaha ma luwaha. 20 Nziya nza tsi ná, Yawe ta kurata sifanaftá ghəŋa mnduha ta haɗikha, ŋa dzaʼa da vulu kul haɗ sladavata nda la Israʼila, ŋa pslata tsaha ya ta həŋ nekwnekw kul haɗ hiɗahiɗa, ka zaɗanatá həŋ nekwnekw manda ya mnanaf Yawe ta Musa.

21 Ma va tsa fitik ya, ka laghu Yəhusuwa zaɗanatá la Ghanak ta ghwáha, daga ma Hevruŋ, nda Dəvir, nda Anav, nda ya ta ghwá Yahuda, nda ya ta ghwá Israʼila. Ka zaɗanatá Yəhusuwa ta həŋ nda luwaha taŋ tani. 22 Haɗ la Ghanak ta pɗata ma haɗika la Israʼila wu, ba ma Ghaza, nda Gat, nda Asdut yeya. 23 Mantsa ya tama, ka zatá Yəhusuwa ta inda tsa haɗikha ya, manda ya mnanaf Yawe ta Musa. Tahula tsa, ka daganaftá Yəhusuwa ta tsa haɗik ya ta la Israʼila ŋa nzakwa ni ka skwa za həga taŋ, ta mndəra mndu ta mndəra mndu. Ka mbiʼi tsa haɗik ya ta vgha kul haɗ vulu.