Zata ghwa ta ghəŋa mghamha la Amuru
10
1 Ka snaŋtá Adunitsedek mghama Ursalima kazlay na, zu za Yəhusuwa ta luwa Ghay, ka zaɗanatá tesneʼ manda va skwi magana tsi ta Yeriku nda mghama ni tani ya kəʼa. Ka snaŋtá tsi guli kazlay na, dzraf dzra la Givghuŋ ta wi ŋa nzaku nda zɗaku mataba la Israʼila kəʼa. 2 Ka vlaŋtá tsa skwi ya ta zləŋ katakata ta Adunitsedek nda mnduha ni, kabga nda nza Givyuŋ ka luwa dagala manda luwaha ya mamu mgham mida, mal glakwa luwa Givghuŋ ka luwa Ghay. Ka mbirim inda mnduha ni guli. 3 Tsaya tama, kəl Adunitsedek mghama Ursalima ka tsəghafta lwi ŋa i Huham mghama Hevruŋ, nda ya ŋa Pirʼam mghama Yarmut, nda ya ŋa Yafiʼa mghama Lahis, nda ya ŋa Dəvir mghama Igluŋ. Kaʼa nda həŋ mantsa: 4 « Safwa sa katihata ŋa guyata nda vulu nda luwa Givghuŋ, kabga dzraf dzra mnduha ni ta wi ŋa nzakway nda zɗaku nda Yəhusuwa, nda ya nda la Israʼila, » kaʼa. 5 Hutaf mghamha la Amuru: I mghama Ursalima, nda mghama Hevruŋ, nda mghama Yarmut, nda mghama Lahis, nda mghama Igluŋ ta dzraftá wi, ka sliʼaftá huts nda inda gwal vula taŋ tani, ka tskadaghatá vgha, dɗanaghatá luwa Givghuŋ, ka vulu həŋ ta vulu nda tsi.
6 Ka tsghanaftá la Givghuŋ ta lwi ta Yəhusuwa ma ghuɓu ma Gilgal, ka həŋ nda tsi mantsa: « Yaha ka kwalaghuta kataŋtá kwalvaha gha, sawi misimmisim da hiŋnistá dzvu, ka mbaŋnafta ka! Wana gwaŋnagha gwa inda mghamha la Amuru ta ghwá ta vgha, » ka həŋ. 7 Gi ka sliʼaftá Yəhusuwa ma Gilgal, nda inda gwal vula ni, nda inda mbirimha ni tani ka lafi. 8 Ka Yawe nda Yəhusuwa mantsa: « Yaha ka da zləŋaŋtá həŋ, kabga zlaghaŋ zla yu ta həŋ ma dzva gha. Haɗ ya dər turtuk dzaʼa ŋaŋta da kagha wu, » kaʼa.
9 Petsuweɗ hana i Yəhusuwa nda ghuɓa ni ta mbaɗa girviɗik daga ma Gilgal, ka lagha həŋ dluk slanaghatá la Amuru. 10 Ka zlaɓanaftá Yawe ta la Amuru ta kəma la Israʼila. Ka dzaɓatá tsi ta həŋ ma Givghuŋ, ka hwayiŋtá tsi ta həŋ ta ŋla vli ma Betʼhuruŋ, ka ɗəgaghatá həŋ tsəlak da Ghazeka nda Makkeda. 11 Ta hwayay hwayay la Amuru ta hwaya da la Israʼila, ta valadatá həŋ ta vli ta vata vli ma Betʼhuruŋ, ka pghagatá Yawe ta luwa ta palaha dagala dagala huyalaʼ ta həŋ ha ma Ghazeka, ka rwutá həŋ. Mal mnduha psla tsa papla ya ndəghata ni, ka ya psla sludziha la Israʼila nda kafay.
12 Mantsa tama, ka gwaɗganatá Yəhusuwa ta Yawe baɗ tsa fitika zlanaŋta Yawe ta la Amuru ma dzva la Israʼila ya, kaʼa ta kəma inda la Israʼila mantsa: « Fitik, slada slada ta ghəŋa Givghuŋ! Kagha guli tili, slada slada zur nda didiŋa Ayaluŋ, » kaʼa. 13 Ka sladatá fitik, ka sladatá tili, ha ka plamta la Israʼila ta ghumaha taŋ. Wya ká lu vindafta ma ɗelewera Yasar: Slada slada fitik ɗək ma ghəŋ, ka nzata wər ka vaghu. 14 Ka yawu ka yawu, haɗ vaghu ta kəɗ magata mantsa ya wa. Sna sna Yawe ta gwaɗa mndu. Vərɗa Yawe ta vulanatá vulu ta la Israʼila.
15 Ka vraghutá Yəhusuwa nda la Israʼila da ghuɓa taŋ ma Gilgal.
Pslata Yəhusuwa ta mghamha la Amuru hutaf
16 Ka hwayaghutá tsa mghamha hutaf ya, ka laghu da ɗifaghuta ma galigha ma Makkeda. 17 Snaŋta lu kazlay slaf sla lu ta tsa mghamha hutaf ya ta ɗifa ma galigha Makkeda kəʼa, ka lagha lu da mnanatá Yəhusuwa. 18 Ka Yəhusuwa nda mnduha ni mantsa: « Taŋwaluŋwa taŋwala ta palaha dagala dagala ta wa tsa galigha ya, ka pghata kuni ta mnduha ŋa ngha həŋ. 19 Ama, ma gɗava kuni hadna, zbiŋwa zba ta ghumaha ghuni ka pslata kuni ta həŋ. Hahanafwa tvi ta həŋ, ma zlanaŋ kuni ta həŋ ta tvi ŋa lama taŋ da luwa taŋ, kabga zlaghunaŋ zla Yawe, Lazglafta ghuni ta həŋ ma dzva ghuni, » kaʼa. 20 Ka zatá i Yəhusuwa nda la Israʼila ɗekɗek ta la Amuru, wər ka zaɗanatá həŋ demdem. Hutsekw yeya mnduha ta ndandapta, ka kataptá ghəŋa taŋ da mtaku. Ka vraghata da luwa taŋ ya ŋam lu ma matsak. 21 Tahula tsa, ka vragaghutá inda la Israʼila ləŋləŋ da slanaghatá Yəhusuwa ma ghuɓa taŋ ma Makkeda, haɗ sana skwi ta ksaŋtá həŋ wu. Haɗ mndu ta tsa haɗik ya ta pslanaftá wi ta həŋ wa.
22 Ka Yəhusuwa mantsa: « Guniŋwa guna ta tsa galigha ya, ka hligiŋta kuni ta tsa mghamha hutaf ya, ka hliɗikta kuni ta həŋ, » kaʼa. 23 Ka magatá həŋ mantsa ya, ka hligiŋtá lu ta tsa mghamha hutaf ya ma galigha: I mghama Ursalima, nda mghama Hevruŋ, nda mghama Yarmut, nda mghama Lahis, nda mghama Igluŋ, ka hladaghatá lu ta həŋ da Yəhusuwa. 24 Manda hladaghata taŋ ta tsa mghamha ya ta kəma Yəhusuwa, ka hagaŋtá Yəhusuwa ta la Israʼila demdem. Kaʼa nda maliha gwal vulu, si ta vula tsa vulu kawadaga nda tsi ya mantsa: « Sawa pghaftá səla ta ŋurzluŋwa na mghamha na, » kaʼa. Ka lagha həŋ pghaftá səla taŋ ta ŋurzluŋwa taŋ. 25 Ka Yəhusuwa nda tsa maliha ni ya mantsa: « Ma zləŋ kuni, ma rwaghuna tsi ta vgha. Mbrawa mbra ta vgha, ka dihavata kuni, kabga mantsa ya dzaʼa maga Yawe ŋa inda ghumaha ghuni gwal dzaʼa guyata kuni nda həŋ, » kaʼa. 26 Tahula tsa, ka pslatá Yəhusuwa ta tsa mghamha ya, ka hahagatá həŋ kakaŋala ta fuha hutaf hada ha tekulemes fitik. 27 Na dɗatá fitik, « hlagawa hla ta mbla taŋ, » ka Yəhusuwa, ka hlaftá lu ta həŋ ka waɗadamta da tsa galigha si ɗifaghu həŋ mida ya, ka huŋta nda mghama pala. Ka nzaku həŋ hada kulam gita.
Zakta Yəhusuwa ta luwaha nda təv sud
28 Baɗ va tsa fitik ya, ka zata Yəhusuwa ta luwa Makkeda nda kafay. Ka pslatá tsi ta mghama ni, nda inda mnduha mida tani. Ka zaɗanatá tsi ta həŋ, haɗ mndu zlana tsi dər turtuk nda hafu wa. Manda va tsa magana tsi ta mghama Yeriku ya, kəʼa maganatá mghama Makkeda.
29 Ka sliʼaftá i Yəhusuwa nda la Israʼila demdem ma Makkeda, ka lagha guk liŋta Livna nda vulu. 30 Ka zlanaŋtá Yawe ta luwa Livna nda mghama ni tani ma dzva taŋ. Ka pslatá həŋ ta mnduha ma tsa luwa ya nda kafay, kul haɗ ya zlana həŋ nda hafu dər turtuk. Manda va ya magana tsi ta mghama Yeriku, ká həŋ maganatá mghama tsa luwa ya.
31 Ka sliʼaftá i Yəhusuwa nda inda la Israʼila ma Livna ka ɓhadaghata həŋ da luwa Lahis. Ka fatá həŋ ta ghuɓa taŋ ndusa nda luwa, ka liŋtá həŋ guk nda vulu ta tsa luwa ya. 32 Ka zlanaŋtá Yawe ta Lahis ma dzvu ta la Israʼila baɗ mahisa fitika taŋ ta vulu. Ka pslatá həŋ ta inda mnduha mida nda kafay, manda va ya maga həŋ ma Livna ya.
33 Ka sliʼaftá Huram mghama Gezer da kataŋtá luwa Lahis. Ama ka pslatá Yəhusuwa ta tsatsi nda mnduha ni tani, haɗ mndu zlana tsi nda hafu dər turtuk wa.
34 Ka sliʼaftá Yəhusuwa nda inda la Israʼila ma Lahis, ka laghu da Igluŋ. Ka fatá həŋ ta ghuɓa taŋ ndusa nda tsa luwa ya, ka liŋta həŋ guk nda vulu ta tsa luwa ya. 35 Baɗ va tsaya, ka zata həŋ ta tsa luwa ya. Ka zaɗanata həŋ ta inda mnduha ma tsa luwa ya nda kafay, manda va ya maga həŋ ma Lahis.
36 Ka sliʼaftá Yəhusuwa nda inda la Israʼila ma Igluŋ, ka lafi da Hevruŋ, ka liŋtá həŋ guk nda vulu. 37 Ka zata həŋ ta tsa luwa ya, ka pslatá həŋ ta mghama ni nda mnduha ni tani. Ka hlaghutá tsi guli ta inda luwaha ta waftá Hevruŋ, ka pslatá tsi ta mnduha ma tsa luwaha ya guli nda kafay. Manda va ya maga tsi ma Igluŋ, ka zaɗanatá Yəhusuwa ta tsa luwa ya, ka pslatá inda mnduha mida.
38 Tahula tsa, ka mbəɗavatá i Yəhusuwa nda inda la Israʼila ka laghu guk liŋtá luwa Dəvir nda vulu. 39 Ka zatá həŋ. Ka klaghutá həŋ ta tsa luwa ya nda mghama ni nda inda luwaha ta wafta tani, ka zaɗanatá həŋ nda kafay ta inda mnduha mida. Haɗ mndu ya zlana Yəhusuwa ŋa ndapta nda hafu dər turtuk wa. Manda va ya magana Yəhusuwa ta Hevruŋ, nda ya nda Livna nda mghama ni ya, mantsa kəʼa maganatá luwa Dəvir nda mghama ni tani.
40 Mantsa ya ká Yəhusuwa zatá ta inda haɗikha: Ya nda ta ghwá, nda haɗika Negev tani, nda haɗikha ya ta kuɗuŋur tani, nda ya ta vata ghwá tani, nda inda mghamha taŋ tani. Haɗ skwi nda hafu mida ta ndapta dər turtuk wa. Ka zaɗanatá tsi ta inda mndu manda va ya mnanaf Yawe, Lazglafta la Israʼila. 41 Ka zaktá Yəhusuwa ta haɗikha, sliʼafta ni daga ma Kadesbarnegha, dikw da Ghaza, ma Sud ha ka laghwi ta inda haɗika Guseŋ, dikw da Givghuŋ nda ma nur. 42 Turtuktuk guyata Yəhusuwa nda vulu nda tsa mghamha ya, nda haɗikha taŋ tani. Ka zaktá tsi ta həŋ, kabga Yawe, Lazglafta la Israʼila ta vulanatá vulu ta mnduha ni. 43 Ka vraghutá i Yəhusuwa nda inda la Israʼila da ghuɓa taŋ ma Gilgal.