Dzrafta la Israʼila ta wi nda la Givyuŋ
9
1 Snanaghatá tsa zaɗanata la Israʼila ta luwa Ghay ya, ta inda mghamha ma kwakwarha nda təv dɗakwa fitik ta nzatá lu ta wa zala Yardeŋ, nda kwakwarha ta ghwá nda kwakwarha ta kuɗuŋur, nda inda kwakwarha ta wa laghwa drəf dagala, ka laghu nda ma Ləvanuŋ, nda la Het, nda la Amuru, nda la Kanʼana, nda la Periz, nda la Hiv, nda la Yəbus ya, 2 ka dzraftá həŋ ta wi demdem ŋa guyata nda vulu nda i Yəhusuwa nda la Israʼila.3 Snanaghatá skwi maga Yəhusuwa ma luwa Yeriku nda Ghay ta la Givghuŋ, 4 ka maganavatá hahəŋ ta ŋa taŋ ma hiɗaku ta la Israʼila. Ka sliʼaftá həŋ ka mbaɗa ta tvi manda gwal ta dzaʼa dista luwa. Ka payaftá həŋ ta skwa zay, hlafha həŋ ta hahalata buhuha, ka pghafta ta kəɗihha taŋ, nda hahalata zliba huta nda kwaha ɗaɗahana həŋ ta kəl lu ka ta ima inabi mida, 5 nda hahalata ɓaɓahha ɗaɗahaf lu ma səla taŋ, nda ketsaketsa ta vgha taŋ. Ka hlaftá həŋ ta wiwsa ghwalata buradi ŋa zay. 6 Ka lagha həŋ da ghuɓu ma Gilgal. Ka həŋ nda Yəhusuwa, nda ya nda la Israʼila mantsa: « Sliʼaf diʼiŋ ŋni, ka sagha ŋa dzrafta ghuni ta wi nda aŋni, » ka həŋ. 7 Ka la Israʼila nda tsa la Hiv ya mantsa: « Kawayaka skwi ndusa kuni nda aŋni? Waká ŋni ta dzrafta wi nda kaghuni na? » ka həŋ. 8 Ka həŋ nda Yəhusuwa mantsa: « Nda nza ŋni ka kwalvaha gha, » ka həŋ. Ka Yəhusuwa nda həŋ mantsa: « Wa kaghuni na? Sagha ga kuni na? » kaʼa nda həŋ. 9 Ka həŋ nda tsi mantsa: « Aŋni kwalvaha gha ya ta sliʼafta ta haɗik diʼiŋ katakata, kabga snaŋnagha sna kula hga Yawe, Lazglafta gha, nda inda skwi maga tsi ma Masar. 10 Snaŋnagha sna inda skwi magana tsi guli ta mghamha la Amuru his ta təv sana ɓla zala Yardeŋ: I Sihuŋ mghama Hesbuŋ, nda Ghug mghama Basaŋ ma Ghastarut ya. 11 Ka vlaŋnatá la galata mndu nda inda mnduha ma haɗika ŋni ta hiɗaku kazlay na: “Klafwa kla ta skwa zay ŋa zay ghuni ta tvi, ka dzaʼa kuni slanaghatá la Israʼila ŋa mnanata ghuni ta həŋ kazlay kwalva ghuni ŋni, dzrafwa wi nda aŋni” kəʼa. 12 Wana skwa zay ŋni, si nda vu nda vu nzakwa ni ta klaftá ŋni mintgha ŋni ka sagha. Ndanana ná, wana ghwaluta, ka hwisuta. 13 Tsəna zlibiha na guli ná, si ta ka lfiɗ həŋ ta ndaghamtá ŋni ta ima inabi ma həŋ. Ndanana ná, wana kwahuta! Manda va tsaya guli lgutha ŋni nda ɓaɓahha ŋni, wana hahaluta, kabga diʼiŋatá vli mbaɗap ŋni, » ka həŋ.
14 Mantsa tama, ka tsuʼaftá la Israʼila ta zaʼatá skwa zaya taŋ, ama ɗawaŋ a həŋ ta Yawe ta ghəŋa ni ŋa snanatá skwi ta kum tsi wa. 15 Ka dzraftá Yəhusuwa ta wi nda həŋ, ŋa nzakway nda zɗaku, ka zlanatá həŋ nda hafu. Ka tsuʼaftá la maliha ta ghəŋa guyata ghəŋ ta waɗanatá həŋ ŋa graftá tsa dzratá wi ya.
16 Tahula fitik hkən manda dzraftá tsa wi ya nda tsa la Givyuŋ ya, ka snaŋtá la Israʼila kazlay na, sləvda taŋ həŋ kahwathwata ta nzaku ndusa nda həŋ kəʼa. 17 Mantsa tama ka sliʼaftá la Israʼila ka mbaɗa, ka ɓhadaghatá həŋ baɗ mahkən da luwaha tsa mnduha ya, ta nzakway ka Givghuŋ, nda Kəfira, nda Bəʼeru, nda Kiryatyəgharim. 18 Ama psla a la Israʼila ta hahəŋ wu, kabga waɗana waɗa maliha la Israʼila kahwathwata ta həŋ nda hga Yawe, Lazglafta la Israʼila. Ka ruruŋwaku inda la Israʼila ta ruruŋwaku ta ghəŋa maliha taŋ. 19 Ama ka tsa maliha ya nda həŋ mantsa: « Laviŋ a mu ta maganatá ghwaɗaka skwi ta na mnduha na wu, kabga waɗana waɗa mu ta həŋ nda hga Yawe, Lazglafta la Israʼila. 20 Zlanama zla ta həŋ nda hafu, kabga waɗa waɗa mu, ka mantsa a tsi wu, dzaʼa tɗak tɗa mu ta ɓasa ŋuɗufa Yawe ta ghəŋa amu. Ama wya ká mu dzaʼa magay nda həŋ: 21 Dzaʼa zlana zla mu ta həŋ nda hafu, ama dzaʼa nzakway həŋ ŋa tsanatá hasuʼu, nda ya ŋa zakanatá imi ta inda guyata ghəŋ mnduha, » ka la maliha taŋ nda həŋ.
22 Ka hagaftá Yəhusuwa ta la Givyuŋ, kaʼa nda həŋ mantsa: « Kabgawu kəl kuni ka nanaŋnafta kazlay na sliʼaf diʼiŋ ŋni kəʼa, ya wana ndusa nda aŋni kuni na? 23 Ndana tama, nda ksiʼa kuni, dzaʼa gɗavata ma ga vuʼa kuni, kaghuni dzaʼa tsanatá hasuʼu, nda zakanatá imi ta həga Lazglafta ɗa, » kaʼa. 24 Ka həŋ zlghanaftá Yəhusuwa mantsa: « Wya skwi kəl ŋni ka mnay mantsa ya: Snaŋnagha sna kazlay na, mnanaf mna Yawe, Lazglafta gha ta Musa kwalva ni kazlay na dzaʼa zlaghunaŋ zla ta inda na haɗikha na, ŋa zaɗanata ghuni ta mnduha mida kəʼa. Ka zləŋaftá ŋni ta kaghuni katakata, nda hafa ŋni, tsaya kəl ŋni ka magay mantsa. 25 Ndanana ná, ma dzva gha ŋni, maga ta skwi manda ya ta zɗəgaghata, nda ya tɗukwata nghadaptá kagha, » ka həŋ. 26 Ka maganatá Yəhusuwa manda va tsaya ta həŋ. Ka kataptá tsi həŋ ma dzva la Israʼila. Psla a lu həŋ ta həŋ wa. 27 Daga baɗ tsa, ka pghatá Yəhusuwa ta la Givyuŋ ka gwal tsanatá hasuʼu, nda zakanatá imi ta guyatá ghəŋa mnduha, nda ya ŋa ta gwira Yawe ma vli ya dzaʼa zbapta Yawe, kulam gita.