Zata la Israʼila ta luwa Ghay
8
1 Ka Yawe nda Yəhusuwa mantsa: « Ma zləŋ ka ta zləŋ, ma rwu mala gha, hlaf hla ta inda gwal vulu kawadaga nda kagha, ka dzaʼa ka da gruŋtá luwa Ghay. Ngha ɓa, vlagha vla yu ta mghama Ghay ma dzva gha. Zlaghaŋ zla yu ta mnduha ni, nda luwa ni, nda haɗika ni tani. 2 Manda va skwi magana ka ta luwa Yeriku nda mghama ni ya ná, manda va tsaya dzaʼa maganata ka ta luwa Ghay nda mghama ni tani. Nziya nza tsi ná, ka hla kuni ŋa ghuni ta inda skwa gadghəl nda rini tani dzaʼa zləɗata kuni. Nda ta hula luwa dzaʼa pghanata ka ta buɗukwa ta tsa luwa ya, » kaʼa.
3 Ka sliʼaftá Yəhusuwa kawadaga nda inda mnda vulu ka ŋlu ŋa dzaʼa guyata nda luwa Ghay. Ka zabaptá tsi ta gwal vulu dəmbuʼ hkən mbsak ka mbirim ka mbirim. Ka ghunaghatá tsi ta həŋ girviɗik. 4 Kaʼa mnanaftá həŋ mantsa: « Lawa la! Ka pghata kuni ta buɗukwa ta hula luwa. Yaha kuni diʼiŋaghuta katakata nda luwa. Ka payavata inda kaghuni. 5 Iʼi ya, dzaʼa gavadagha gava yu nda mnduha kawadaga nda iʼi, ndusa nda luwa. Sliʼagapta mnduha ma luwa da guyuŋnusta manda tsa taŋtaŋ ya kay ya, dzaʼa hwayaf hwaya aŋni da həŋ, 6 ŋa hwayiŋnista taŋ, ŋa gatigiŋta ŋni ta həŋ diʼiŋ nda luwa. “Hwayafta ta da aŋni mantsa taŋtaŋ ya kay ya,” ka həŋ dzaʼazlay. 7 Mantsa tama, ŋa sliʼagapta kaghuni ma vla pghatá buɗukwa ghuni, ŋa zata ghuni ta tsa luwa ya, kabga dzaʼa zlaghunaŋ zla Yawe, Lazglafta ghuni ma dzva ghuni. 8 Manda zluʼaghuta ghuni ta tsa luwa ya, ŋa fafiŋta ghuni nda vu, ŋa magay ghuni manda va gwaɗa ya mna Yawe. Tsaya zlahu ta mnaghunafta yu, » kaʼa. 9 Ka ghunaftá Yəhusuwa ta gwal vulu. Ka laghu həŋ pghatá buɗukwa. Ka pghatá həŋ ta buɗukwa ma takataka Betel nda Ghay, nda təv dɗakwa fitik ta nzatá lu ma Ghay. Ka han Yəhusuwa baɗ tsa kawadaga nda pɗakwa gwal vulu.
10 Ga mahtsima ni ka tsavaftá Yəhusuwa ga sərɗək naghanavatá ghuɓuha gwal vula ni. Tahula tsa, ka klə tsi ta kəma kawadaga nda la galata mndu mataba la Israʼila, ŋa guyata nda luwa Ghay. 11 Ka sliʼaftá gwal vulu kawadaga nda tsi, ka gavadaftá həŋ ndusanavata, ka nzata mbəŋ nda luwa Ghay. Ka fatá həŋ ta ghuɓa taŋ nda ma nura Ghay. Mamu didiŋa ta dganatá həŋ nda luwa. 12 Ka ɗagaptá Yəhusuwa ta zgwana ta maga dəmbuʼ hutaf, ka pghatá tsi ta həŋ ma buɗukwa ma takataka Betel nda Ghay, nda təv dɗakwa fitik ma luwa Ghay. 13 Ka pghatá gwal vulu ta taŋtaŋa ghuɓa taŋ nda ma nura tsa luwa ya, ta nzatá sana ghuɓu nda təv dɗakwa fitik ma tsa luwa ya. Baɗ tsa, ka gavadatá Yəhusuwa da hanay ma tsa didiŋa ya. 14 Ga sərɗək tama, kəʼa ka mghama Ghay ná, ka nghaŋtá tsi ta la Israʼila. Ka gi sab tsi misimmisim ma luwa kawadaga nda inda gwal vula ni. Ka lab həŋ da guyata nda la Israʼila ma va tsa vla taŋ ghalya ya, təv Gharava. Ama sna a tsatsi kazlay na mamu gwal ta pghanatá buɗukwa ta hula luwa kəʼa wa. 15 Ka nzatá Yəhusuwa nda inda la Israʼila manda gwal ta fanatá vgha ta həŋ, ka hwayaftá həŋ ka dzaʼa nda ma mtak. 16 Mista taŋ kuni, ka lu nda la Ghay. Ka gataghatá lu ta həŋ da mtak diʼiŋ nda luwa. 17 Haɗ zgun dər turtuk ta pɗata ma luwa Ghay nda Betel wu, sliʼaghu sliʼa həŋ mista la Israʼila, ka zlanatá luwa laŋ kul haɗ mndu ŋa nghapta.
18 Mantsa tama, ka Yawe nda Yəhusuwa mantsa: « Ɗikwadap na baraway gha na nda təv Ghay, dzaʼa vlagha vla yu ta na luwa na ma dzva gha, » kaʼa. Ka magatá Yəhusuwa manda va tsaya. 19 Na tsa gi ɗikwadapta ni ta dzvu ya, ka gi sliʼagaptá tsa gwal ma buɗukwa ya, ka sliʼamta da luwa, ka zatá həŋ. Ka gi fafiŋtá həŋ ta tsa luwa ya guli nda vu. 20 Kəʼa ka la Ghay nghapta nda hul ná, ta ɗukwaku ɗiŋ ma luwa taŋ da ghuvaŋata luwa. Ta haɗ tvi ŋa hwayapta taŋ dər ndiga ndiga wa. Gi ka mbəɗavatá tsa la Israʼila hwayiŋ həŋ ya kay, guk mbəɗanatá həŋ. 21 Kəʼa ka i Yəhusuwa nda inda la Israʼila ná, za za tsa gwal vulu ta pghatá buɗukwa ya kay ta luwa, ta ɗukwaku ɗukwaku ɗiŋ guli. Gi kutsibliɗ mbəɗava mbəɗa həŋ mistik mista la Ghay. 22 Ka sliʼagaptá sanlaha ma la Israʼila ma luwa da liŋtá həŋ guli. Ka wamtá lu ta la Ghay ma takataka dlewesl, ka pslatá lu ta həŋ demdem. Haɗ mndu ta ndapta wu, haɗ mndu ta pɗata nda hafu wa. 23 Ama mghama Ghay ya, ka ksaftá lu nda ksa, ka kladaghata da Yəhusuwa.
24 Ka zaɗanatá la Israʼila ta ghumaha taŋ ma takataka mtak, ma tsa vli hwayiŋ həŋ ta həŋ ya. Manda pslata taŋ ta tsa ghumaha ya, ka vraktá həŋ ka sliʼamta da luwa Ghay slanaghatá pɗakwa mnduha, ka zaɗanatá həŋ nda kafay. 25 Inda tsa la Ghay zgwana nda miʼaha tani zaɗana lu baɗ tsaya ná, dəmbuʼ ghwaŋpəɗ his həŋ. 26 Vragana a Yəhusuwa ta tsa dzva ni ta ɗikwa tsa Ghay nda baraway ni ya wu, ha ka zaɗanatá inda taŋ demdem. 27 Manda va tsa mnanaf Yawe ta Yəhusuwa ya, ka zləɗaghatá la Israʼila ta skwiha gadghəl nda rini tani ma tsa luwa ya. 28 Ka driŋtá Yəhusuwa ta luwa Ghay, ka niŋta ka kufik ŋa ɗekɗek, ka nuta husam ha gita. 29 Ka hbagatá lu ta mghama Ghay kaŋal ta fu. Ka zlanata ha hawu. Dɗakwa fitik, klagawa kla ta mbla ni ka Yəhusuwa. Ka lagha lu wuɗata ta wa tgha luwa, ka banaghatá ŋira pala ta nzakway ha gita.
Dzaŋa zlahu ta ghwá Gheval
30 Ma tsa fitik ya, ka banaftá Yəhusuwa ta gwir ta Yawe, Lazglafta la Israʼila ta ghwá Gheval. 31 Ka baftá tsi manda va ya mnanaf Musa, kwalva Yawe ta la Israʼila. Nda vinda guli ma ɗelewera zlaha Musa kazlay tsa gwir ya ná, baf nda pala kul fiɗaŋtá lu nda kfur lu kəʼa. Tahula tsa, ka dranaftá lu ta skwa pla ghəŋ ŋa dray tsuh tsuh ta tsa gwir ya, ta Yawe. Ka vlaŋtá lu ta skwa pla ghəŋa zɗaku guli. 32 Ka vindaftá Yəhusuwa ka mahis hada ta palaha ta va tsa zlaha Musa ta vindanaftá la Israʼila ya. 33 Inda la Israʼila, nda la galata mnduha taŋ tani, nda maliha taŋ tani, nda gwal tsanatá guma ta həŋ tani, nda zwana haɗik tani, nda la mayəm ma səla taŋ tani, inda tsa mnduha ya ta sladata nda ga slərpuha tsa akwata dzratá wa Yawe ya. Ka nzatá həŋ mbəŋ nda tsa la Levi gwal dra skwi ŋa Lazglafta ya ta kla tsa akwati ya. Gəts la Israʼila nda təv ghwá Gərizim. Gəts la Israʼila guli nda təv ghwá Gheval. Mantsa ya ka lu dzaʼa magata, ka Musa kwalva Yawe mnuta ŋa tfanaghatá wi ta la Israʼila. 34 Ta hula tsa, ka dzaŋaftá Yəhusuwa ta inda gwaɗa ya vindaf lu ma ɗelewera zlahu, nda gwaɗa tfa wi tani, nda gwaɗa ksiʼi tani. 35 Ka dzaŋaftá Yəhusuwa ta inda zlaha Musa, haɗ ya zanap tsi dər ka turtuk mataba ni wa. Ka dzaŋaftá tsi ta kəma inda la Israʼila nda zgwana tani, nda miʼaha tani, nda zwani tani, nda matbayha ma səla taŋ guli tani.