Yəhusuwa 7

Gata Ahaŋ ta dmaku nda tsanaghatá guma ni

1 Lagha la Israʼila ka ɓlanaptá zlahu ma ksaŋta taŋ ta skwi ya mna lu ŋa zaɗanata. Mamu sana la Israʼila mataba mndəra la Yahuda ta nzakway ka Ahaŋ zwaŋa Karmi, Karmi zwaŋa Zabdi, Zabdi guli na zwaŋa Zerah, ka hlaftá tsi ta sanlaha ma skwiha ŋa zaɗanata nekwnekw. Tsaya kəl Yawe ka ɓasanavatá ŋuɗuf katakata ta la Israʼila.

2 Ka ghunaftá Yəhusuwa ta sana mnduha daga ma Yeriku da luwa Ghay, nda ma Betel təv safa fitik, ndusa nda Betʼaveŋ. « Ka vitsapta kuni ta Ghay ya, » kaʼa nda həŋ. Ka laghu həŋ vitsaptá Ghay. 3 Ka vraktá həŋ mnay ŋa Yəhusuwa: « Bətbət dzaʼa ghunadafta lu ta inda gwal vulu ŋa zləɗa luwa Ghay. Gwal vulu dəmbuʼ his, ka dəmbuʼ hkən a tsi ná, prək. Sira a mnduha ma tsa luwa ya wa. Ŋaw dzaʼa hərfa lu ta inda mnduha, ka ghuna həŋ na, » ka həŋ. 4 Ka sliʼaftá mnduha ta maga dəmbuʼ hkən, ama ka hwayaftá həŋ da la Ghay. 5 Ka pslatá la Ghay ta mnduha ta maga hkən mbsak mkuʼ mida mataba taŋ. Ka ŋawaftá həŋ ta sanlaha mataba taŋ daga ta wa tgha luwa kuyaʼ da Sebarim, ka pslatá həŋ ta həŋ ta vala vli. Ka rwanatá tsi ta vgha rabadakw ta həŋ.

6 Ka kwahiŋtá i Yəhusuwa nda la galata mnduha la Israʼila ta lguta taŋ, ka buhwamtá rgitik ma ghəŋ, ka zlambata zluzlumbruh ta kəma akwata Yawe, ka nzatá həŋ mantsa ha ka lagha ta fitik hawu. 7 Ka Yəhusuwa mantsa: « Nya ní mgham Yawe! Nya kəl ka ka tsughwaɗaŋnaptá Yardeŋ na? Nda nza ŋa pghamtá aŋni ma dzva la Amuru ŋa zaɗaŋnata ra? Ka má nda sna ŋni manda na ná, dər ya má nza ŋni ta ɓla Yardeŋ! » ka həŋ. 8 « Kdəkkdək mghama ɗa! Nya dzaʼa mnə yu ndana! Ya wana hwayaf hwaya la Israʼila ta kəma ghumaha taŋ? 9 Dzaʼa snanagha sna na skwi na ta inda la Kanʼana nda inda mndu ta na haɗik na. Dzaʼa guyaŋnagha guya həŋ ta ghəŋ ka zaɗaŋnata. Kinawu ká ka dzaʼa maraŋtá glakwa gha tama? » ka Yəhusuwa.

10 Ka Yawe nda Yəhusuwa mantsa: « Sliʼaf sliʼa, kabgawu kəl ka ka nzata zlumbruha ta haɗik na? 11 Gaga la Israʼila ta dmaku. Mantsa, ɓlanap ɓla həŋ ta dzratá wi ya mnanaf yu ta həŋ. Hlaf hla həŋ ta skwiha ŋa zaɗanata nekwnekw ya mnana yu ta həŋ kazlay yaha kuni da klafta kəʼa. Ka ghalaftá həŋ, ka tsakalatá wi nda ma ɗifanata ma huzla taŋ. 12 Tsaya tama, haɗ la Israʼila dzaʼa ŋəglaŋta da ghumaha taŋ wu, dzaʼa hwayaf hwaya həŋ da ghumaha taŋ. Nda nza vərɗa hahəŋ manda skwiha ŋa zaɗanata nekwnekw. Haɗ yu dzaʼa gɗavata kawadaga nda kaghuni, ka hwanzaɓiŋ a kuni ta tsa skwiha ŋa zaɗanata nekwnekw mataba ghuni ya wa. 13 Ndanana wa, sliʼaf sliʼa, la mnanatá mnduha ka ghuɓiŋta həŋ ta nzakwa taŋ. Ka ka nda həŋ na: “Ghuɓiŋwa ghuɓa ta nzakwa ghuni ŋa mahtsim, kabga wya ka Iʼi Yawe, Lazglafta la Israʼila ta mnanatá la Israʼila: Mamu skwiha ŋa zaɗanata nekwnekw ya pyaf yu ta kaghuni mataba ghuni. Haɗ kuni dzaʼa ŋəglaŋta da ghumaha ghuni, ka hwanzaɓiŋ a kuni ta tsa huzlaha ya wa. 14 Ka sagha kuni ta kəma ɗa ga sərɗək mahtsim, ka mndəra mndu, ka mndəra mndu. Tsa mndəra mndu dzaʼa ɗikwafta yu ya, ŋa sagha taŋ ta uʼa taŋ ta uʼa taŋ. Tsa la ta uʼa taŋ dzaʼa ɗikwafta Yawe ya guli, ŋa sagha taŋ ta həga ta həga. Tsa həga dzaʼa ɗikwafta yu ya guli, ŋa sagha taŋ ta mndu ta mndu. 15 Mantsa tama, mndu ya dzaʼa ɗikwafta Yawe kazlay kagha ta klaftá tsa huzla ŋa zaɗanata nekwnekw kəʼa ya, ŋa vzamta ghuni da vu, nda inda skwiha ni tani, kabga ɓlanap ɓla ta dzratá wa Yawe. Gaga ta mghama dmaku mataba la Israʼila,”» kaʼa.

16 Wrək sərɗək, ka hladaghatá Yəhusuwa ta la Israʼila ta mndəra mndu ta mndəra mndu. Ka dɗaftá tsi ta mndəra la Yahuda. 17 Ka gavadanaghatá tsi ta la Yahuda ta uʼa taŋ ta uʼa taŋ, ka dɗaftá tsi ta la Zerah. Ka gavadanaghatá lu ta la Zerah ta həga ta həga. Ka dɗaftá tsi ta həga ga Zabdi guli. 18 Ka gavadanaghatá lu ta tsaha ya ta zəʼala həga ta zəʼala həga. Ka dɗaftá tsi ta Ahaŋ zwaŋa Karmi, Karmi zwaŋa Zabdi, Zabdi zwaŋa Zerah ma mndəra la Yahuda. 19 Ka Yəhusuwa nda Ahaŋ mantsa: « Sagəŋ, vlaŋ vla ta glaku ta Yawe, Lazglafta la Israʼila, ka mnihata ka ta kahwathwata. Mniha mna ta skwi ya maga ka, ma ɗifiha ka, » kaʼa. 20 Ka Ahaŋ nda Yəhusuwa mantsa: « Kahwathwata ná, gana ga yu ta dmaku ta Yawe, Lazglafta la Israʼila. Wya skwi maga yu: 21 Ma skwiha zləɗa lu, ka slaftá yu ta sana lgut mndərga ŋa la Babila, ká ka nda ɗinakwa ni, nda tsedi ta maga kiluʼ his, nda rita kiluʼa dasu. Ka magatá yu ta haraʼutiri, ka hlaftá yu. Dzaʼa slanagha sla kuni lam yu ma haɗik ma takataka tumpula ɗa, mista ni pəghiŋta yu guli ta tsa tsedi ya, » kaʼa.

22 Ka ghunaftá Yəhusuwa ta mnduha da tumpula Ahaŋ. Ka sliʼaftá həŋ nda hwaya misimmisim, ka lagha həŋ slafta ta tsa huzla ya lam tsi ma huɗa tsa tumpula ni ya, nda fatá tsa tsedi ya mista ni. 23 Ka hlagaptá həŋ ta tsa huzla ma tsa tumpul ya, ka hlədanaghatá həŋ Yəhusuwa nda ya nda la Israʼila. Ka pghata həŋ ta kəma Yawe. 24 Ka klaftá i Yəhusuwa nda inda la Israʼila ta Ahaŋ zwaŋa Zerah, nda tsa tsedi ya tani, nda tsa lgut ya tani, nda tsa rita kiluʼa dasu ya tani. Ka hlaftá həŋ ta zwana zgwana ni nda kwagha ni tani, nda slaha ni tani, nda kəɗihha ni tani, nda rina fisika ni tani, nda tumpula ni tani, nda inda skwiha ya ta nzakway ka ŋa ni tani. Ka hlaghatá həŋ da didiŋa Akur. 25 Ka Yəhusuwa nda Ahaŋ mantsa: « Kabgawu kəl ka ka klaŋnaktá ɓadzaku na? Ndana tama, dzaʼa klaghak kla Yawe ta ɓadzaku guli ta kagha gita, » kaʼa. Ka zlambatá la Israʼila nda pala, ka dzata. Manda va tsaya ka həŋ pslatá gwal ga taŋ guli. Ka driŋtá lu ta həŋ, nda inda skwiha ka ŋa ni. 26 Tahula tsa, ka banaghatá həŋ ta ŋira pala ta nzakway mamu kulam gita. Tsaya guli ta kəl lu ka hga tsa vli ya kulam gita, ka didiŋa Akur. Tahula tsa, ka lɓatá ŋuɗufa Yawe.