Tɗuta matsaka ma Yeriku
6
1 Hahaghu haha lu ka ŋərzlafta ɗina ta wa tghaha luwa Yeriku dabga la Israʼila. Haɗ mndu ta lami wu, haɗ mndu ta sabi wa. 2 Ka Yawe nda Yəhusuwa mantsa: « Ngha ɓa, vlagha vla yu ta Yeriku ma dzva gha: Nda mghama ni tani, nda sludziha ni ka mbirim tani. 3 Kagha nda inda sludziha gha tani, ka wa kuni ta luwa Yeriku. Inda fitik, turtuktuk dzaʼa wanafta kuni. Ka maga ka mantsa ya ha fitik mkuʼ. 4 Ndəfáŋ tsa gwal ta dra skwi ŋa Lazglafta ya dzaʼa labi ta kəma akwata dzratá wi. Inda taŋ nda klatá dula maŋazak. Baɗ mandəfáŋa fitik ya, ndəfáŋ səla dzaʼa wanafta kuni ta luwa. Ta dzaʼa gwal dra skwi ŋa Lazglafta nda vya dula taŋ. 5 Ka vyata həŋ ta dula taŋ ka tɗaŋtá lwa ni. Na gi snaŋta ghuni ta lwa tsa duli ya, ka dzata mnduha ta lawlaw, dzaʼa tɗu tɗa matsaka luwa. Mantsa tama, ŋa gi ŋla la Israʼila zur nda kəma taŋ, » kaʼa. 6 Ka hagaktá Yəhusuwa zwaŋa Nuŋ ta gwal dra skwi ŋa Lazglafta, kaʼa nda həŋ mantsa: « Klafwa kla ta akwata dzratá wi, ka laba gwal ndəfáŋ mataba ghuni nda duli nda duli ta kəma akwata Yawe, » kaʼa. 7 Tahula tsa, kaʼa nda mnduha guli mantsa: « Lawa la! Ka wanafta kuni ta luwa. Ka laba gwal vulu ta kəma akwata Yawe, » kaʼa.8 Mbaɗa lu ka magay manda ya ta mnə Yəhusuwa. Ka lab gwal ndəfáŋ mataba gwal dra skwi ŋa Lazglafta, nda vya duli ta kəma akwata Yawe ta klə lu ta akwata dzratá wa Yawe mista taŋ. 9 Ka lab gwal vulu ta kəma gwal dra skwi ŋa Lazglafta ta vya duli ya, ta dzaʼa sanlaha ma gwal vulu mista akwati. Ta mbaɗ gwal vulu ya, ta dzaʼa gwal dra skwi ŋa Lazglafta nda vya tsa duli maŋazak ya, nda tɗaŋtá lwa ni. 10 Ama wya ka Yəhusuwa mnanatá mnduha: « Tsəriɗ ka kuni da nzata! Yaha kuni pslaftá wi, iʼi dzaʼa mnaghunata, kada dzata kuni ta lawlaw, » kaʼa. 11 Ka wanaftá gwal dra skwi ŋa Lazglafta ta tsa luwa ya turtuk səla nda tsa akwata Yawe ya. Tahula tsa, ka vragaghuta həŋ da ghuɓa taŋ da hani.
12 Ka tsavaftá Yəhusuwa ga sərɗək ga mahtsima ni, ka kləglaftá gwal ta dra skwi ŋa Lazglafta ta tsa akwata Yawe ya. 13 Ka sliʼiglaftá tsa gwal ta dra skwi ŋa Lazglafta ndəfáŋ nda dula maŋazak ya, ka mbaɗa ta kəma tsa akwata Yawe ya, ka dzaʼa nda vya duli. Ka dzaʼa gwal vulu ta kəma gwal dra skwi ŋa Lazglafta, ta dzaʼa sanlaha ma gwal vulu ta hula akwata Yawe. Ta mbaɗ həŋ ta mbaɗa ya, ta dzaʼa həŋ nda vya duli nda tɗanaghatá lwa ni. 14 Baɗ mahisa fitik, ka wanaftá həŋ ta tsa luwa ya turtuk guli, ka vrəglaghutá həŋ da ghuɓa taŋ. Ka magatá həŋ mantsa ya ka fitik mkuʼ.
15 Baɗ mandəfáŋa fitik, ka sliʼaftá həŋ wrək sərɗək, ka wanaftá həŋ ta tsa luwa ya. Manda va tsaya ka həŋ magata ndəfáŋ səla. Baɗ tsaya kweŋkweŋ wanafta həŋ ta tsa luwa ya ndəfáŋ səla. 16 Ta tsa mandəfáŋa səla taŋ, manda vyata gwal dra skwi ŋa Lazglafta ta duli ya, ka Yəhusuwa nda mnduha mantsa: « Dzawa dza ta lawlaw, kabga vlaghuna vla Yawe ta na luwa na. 17 Dzaʼa hwanzaɓiŋ hwanzaɓa lu ta na luwa na, nda inda skwiha mida tani, kabga nda nza ŋa Yawe. Rahab ta nzakway ka karwa yeya dzaʼa zlanata lu nda hafu, nda ya nda gwal ma həga ga taŋ, kabga ɗifama ɗifa ta gwal vitsamatá luwa ya si ghunagagha mu ya. 18 Ama ɗaswa ka kuni! Yaha kuni ksaŋtá skwiha nda fa ŋa zaɗanata nekwnekw, kabga ka klaf kla kuni ta skwiha má dzaʼa kuni hwanzaɓiŋta katsi, dzaʼa tɗanak tɗa kuni ta maswaɗaka ta ghuɓa la Israʼila, ŋa zaɗanata. 19 Inda tsedi, nda dasu tani, nda inda huzlaha ka ghuva tili tani, nda kfur tani, dzaʼa nzaku tsaha ya ŋa Yawe, ŋa pghamta ghuni ma dzuguva ɗifa skwi ŋa Yawe, » kaʼa. 20 Ka hlaftá mnduha ta wi ɗuwwa, ka vyə lu ta duli. Na tsa snaŋta mnduha ta tsa vya duli ya, ka hlaftá həŋ ta wi nda mbraku. Ka tɗutá matsak. Ka gi ŋaladaftá la Israʼila da tsa luwa ya, dər wa zur nda kəma ni, ka zatá həŋ ta tsa luwa ya. 21 Ka zaɗanata həŋ nda kafay ta inda mnduha ma tsa luwa ya, nda zgwana tani, nda miʼaha tani, nda duhwalha tani, nda halata mnduha tani. Ka pslatá həŋ nduk nda slaha tani, nda rina fisik tani, nda kəɗihha tani.
Zlanata Yəhusuwa ta Rahab nda gwal ga taŋ tani nda hafu
22 Ka Yəhusuwa nda tsa mnduha his ta vitsaptá tsa haɗik ya mantsa: « Lamwa la da həga ga Rahab, tsa karwa ya, ka klagapta kuni, nda inda gwal ga taŋ tani, manda va tsa waɗana kuni ya, » kaʼa. 23 Ka sliʼaftá tsa duhwalha ta vitsanatá tsa haɗik ya, ka lami da həga, ka klagaptá həŋ ta i Rahab nda da ni, nda ma ni, nda zwana ma ni, nda inda gwal ma həga ga taŋ. Ka hligiŋtá həŋ ta inda gwal ga taŋ, ka pghatá həŋ ta hula ghuɓa la Israʼila. 24 Ka driŋtá həŋ nda vu ta tsa luwa ya, nda inda skwiha mida tani. Skwi kweŋkweŋ zlana həŋ na: Tsedi, nda dasu, nda huzlaha ka ghuva tili, nda ya ka kfur. Ka hlaftá həŋ ka pghamta ma dzuguva ɗifa skwi ŋa Yawe. 25 Ka zlanatá Yəhusuwa ta Rahab ka karwa ya nda hafu, nda inda gwal ma həga ga da ni, kabga ɗifanata ni ta gwal ghunaf Yəhusuwa ŋa vitsanatá Yeriku ya. Ka nzatá tsi mataba la Israʼila. Ta tekeʼa mndəra taŋ kulam gita.
26 Ma tsa fitik ya, ka waɗatá Yəhusuwa kaʼa mantsa: « Ka ksiʼaf ksiʼa Yawe ta mndu ya dzaʼa walaŋtá bəglaftá na luwa Yeriku na. Dzaʼa plata nda zumala ni ta laptá tughwa ni. Nda zughuva ni dzaʼa plata tsi ta pghamtá wa tghaha ni, » kaʼa.
27 Kawadaga Yawe nda Yəhusuwa, ya laghu hga ni da zərwa ta inda haɗik.