Ɗatsanata Yəhusuwa ta fafaɗ ta la Israʼila ma Gilgal
5
1 Ka snaŋtá inda mghamha la Amuru ta sana ɓla Yardeŋ nda təv dɗakwa fitik, nda inda mghamha la Kanʼana ta wa drəf Dagala kazlay ghwaliŋ ghwala Yawe ta ima Yardeŋ ŋa mutsafta la Israʼila ta tsughwaɗapta kəʼa, tsaya tama, bur ŋuɗufa taŋ, rabadakw vgha taŋ ŋa ŋaŋta da la Israʼila.2 Ma tsa fitik ya, ka Yawe nda Yəhusuwa mantsa: « Magaf maga ta maŋa pala, ka ɗatsanata ka ta fafaɗa la Israʼila, tsa gwal ta kul ɗatsaku ŋa taŋ ya, » kaʼa. 3 Ka magaftá Yəhusuwa ta maŋaha pala, ka ɗatsanatá fafaɗa la Israʼila ma sana vli ta hgə lu ka Givghat Hagharalutª. 4 Wya skwi kəl Yəhusuwa ka ɗatsanatá fafaɗ ta həŋ: Inda tsa mnduha ta sabi ma Masar, ta nzakway ka zgun, inda gwal prək ka vulu ya ná, rwu rwa həŋ ta tvi ma mtak, tahula saba taŋ ma Masar. 5 Tsaw inda mnduha la Israʼila ta sliʼafta ma Masar ná, si ɗatsana ɗatsa lu ta fafaɗ ta həŋ. Ama inda mnduha ya yaga lu ta tvi ma mtak tahula saba taŋ ma Masar ya ná, haɗ ya tsana lu ta fafaɗ ta həŋ wa. 6 Tsaw fwaɗ mbsak vakwa la Israʼila ta mbaɗa ma mtak. Ma kɗavakta tsa vakuha ya, ka rwuta inda zgwana prək ka vulu ta sabi ma Masar. Tsaw hahəŋ ná, kwalaghu kwala həŋ ta snatá gwaɗa Yawe. Ka waɗatá Yawe, kaʼa mantsa: « Haɗ yu dzaʼa zlanata həŋ ŋa nghaŋta taŋ ta tsa haɗik ya waɗa yu ta vlaŋtá dzidzíha taŋ, tsa haɗik ya ta mbəzaku uʼa nda zuɗum mida ya wa, » kaʼa. 7 Ka pghamtá Yawe ta zwana taŋ ma vla taŋ: Tsaha ya ɗatsana Yəhusuwa ta fafaɗa taŋ, kabga si ɗatsana a lu ta həŋ wa.
8 Manda kɗiŋta Yəhusuwa ta ɗatsatá fafaɗa inda mnduha, ka nzatá həŋ ma va tsa ghuɓu ya, ha ka mbambafta taŋ karaku. 9 Ka Yawe nda Yəhusuwa mantsa: « Gita, mbəsaghu mbəsa yu ta hula ya sab kuni nda tsi daga ma Masar, » kaʼa. Tsaya kəl lu ka tsanaftá hgu ta tsa vli ya ka Gilgalª. Nda tsa hgu ya ta hga lu ta tsa vli ya kulam gita.
10 Ka fatá la Israʼila ta ghuɓa taŋ ma Gilgal. Ka skalu həŋ ta skala Pak ga hawu baɗ maghwaŋpəɗ fwaɗa fitik ma tili, ma daɓi ndusa nda Yeriku. 11 Ga mahtsima Pak, ka zə həŋ ta skwiha hva lu nda hva ta tsa haɗik ya ta nzakway ka buradi kul haɗ is mida, nda sulatá nimaya baɗ va tsaya. 12 Daga baɗ tsa ga mahtsima Pak ya, sladatá mutsay la Israʼila ta manna tsa. Ta tsa vaku ya, ka zə həŋ ta skwi hva lu nda hva ta haɗika Kanʼana.
Mali ta ghəŋa sludziha Yawe
13 Ma sana fitik ta nzaku Yəhusuwa ndusa nda Yeriku, gi ka nghaŋtá tsi ta sana mndu ta sladu ta kəma ni, nda ŋatá limay tsəhagap tsi pət ma kupak. Ka gavadaghatá Yəhusuwa ta vata ni, kaʼa nda tsi mantsa: « Mista aŋni kagha re, ari mista ghumaha ŋni a ka na? » kaʼa. 14 Ka tsa mndu ya mantsa: « Haɗ ya mista ni yu wa. Iʼi mali ta ghəŋa gwal vula Yawe, sagha ɗa yeya, » kaʼa. Gi ka zləmbata Yəhusuwa zlumbruh ta haɗik ka vlaŋtá glaku, kaʼa mantsa: « Iʼi ná, kwalva gha yu. Nu ta kum mghama ɗa ta mnay ŋa kwalva ni na? » kaʼa nda tsi. 15 Ka tsa mali ta ghəŋa gwal vula Yawe ya nda tsi mantsa: « Hlap hla ta ɓaɓah ma səla gha, kabga tsa vli slada ka ya ná, nda ghuɓa, » kaʼa. Ka magata Yəhusuwa manda tsaya.