Palaha havu ghwaŋpəɗ his
4
1 Tahula tsughwaɗapta inda mnduha ta zala Yardeŋ, ka Yawe nda Yəhusuwa mantsa: 2 « Zabap zaba mataba mnduha ta mnduha ghwaŋpəɗ his. Mndu turtuk turtuk ma mndəra mndu. 3 Mnana mna ta həŋ ka ŋəɗa ŋəɗa, ka dzaʼa həŋ da Yardeŋ, ɗagaktá palaha ghwaŋpəɗ his ma vla fatá səla gwal ta dra skwi ŋa Lazglafta ya. Ka hlagaghata həŋ ta tsa palaha ghwaŋpəɗ his ya ka pghata ma tsa vli dzaʼa han kuni gita ya, » kaʼa.4 Ka hagaftá Yəhusuwa ta tsa la Israʼila ya zabap tsi ma inda mndəra mndu ya. 5 Ka Yəhusuwa nda həŋ mantsa: « Labwa la nda ta kəma akwata Yawe, Lazglafta ghuni, ka dzaʼa kuni da takataka tsa Yardeŋ ya. Ka ɗagafta kuni ta palaha, ka kladaghata inda ghuni turtuk turtuk ta badzaga ŋa nzakwa ni ta inda mndəra la Israʼila. 6 Dzaʼa nzakway tsa palaha ya ka ŋizla ŋa havaghunaktá skwi ta maguta ma nana vli na. Baɗ da ɗawaŋta zwana ghuni dazlay: “Nu klatá ghəŋa na palaha na da kaghuni na?” kəʼa ya, 7 ka kuni dzaʼazlay nda həŋ na: “Sladaghu slada zala Yardeŋ ta kəma akwata dzratá wa Yawe. Ta tsughwaɗagaptá tsi ta Yardeŋ, ka sladaghutá zala kul mbaɗa,” ka kuni dzaʼazlay. Dzaʼa gɗa gɗa na palaha na ka skwa havanaktá la Israʼila, ta tsəna mazəmzəm na, » kaʼa.
8 Ka magatá la Israʼila manda va tsa mnanaf Yəhusuwa ta həŋ ya. Ka hlaktá həŋ ta palaha ghwaŋpəɗ his ma takataka Yardeŋ, manda va ya mnana Yawe ta Yəhusuwa, pal pal ta mndəra la Israʼila. Ka hlaktá həŋ da vla hana taŋ baɗ tsa, ka pghatá həŋ hada. 9 Ka dzagwatá Yəhusuwa guli ta tsa palaha ghwaŋpəɗ his ya ma takataka zala Yardeŋ, ma tsa vla si fatá səla gwal ta dra skwi ŋa Lazglafta si ta kla akwata dzratá wi ya. Ta tekeʼa tsa palaha ya hada kulam gita.
10 Ka sladatá tsa gwal ta dra skwi ŋa Lazglafta ta kla akwati ya ma takataka Yardeŋ ha ka magata mnduha ta inda tsa skwiha mnanaf Yawe ta Yəhusuwa ya. Mantsa ya tama, ka mag Yəhusuwa manda va ya mnaf Musa. Tahula tsa, ka tsughwaɗadaptá mnduha ta tsa ghwa ya misimmisim. 11 Manda kɗiŋta inda mnduha ta tsughwaɗadaptá ghwa, ka lab gwal ta dra skwi ŋa Lazglafta nda tsa akwata Yawe ya kay ta kəma mnduha.
12 Ka sliʼadaptá mnduha ma mndəra la Rubeŋ, nda la Gat, nda ya nda rita mndəra la Mənase ta kəma la Israʼila nda hbatá vgha ŋa vulu, manda va ya mnana Musa ta həŋ. 13 Ta kəma Yawe ná, ta magay sludziha ta dəmbuʼ fwaɗ mbsak, nda hbatá vgha taŋ ŋa vulu. Ka tsughwaɗaptá həŋ ta Yardeŋ, ka laghu həŋ nda təv daɓa Yeriku. 14 Baɗ tsaya, ka kapanaftá Yawe ta Yəhusuwa ta nghay inda la Israʼila. Ka zləŋatá həŋ manda va ya si ta zləŋ həŋ ta Musa ya, ha kɗavakta hafa ni.
15 Tahula tsa, ka Yawe nda Yəhusuwa mantsa: 16 « Mnanaf mna ta tsa gwal ta dra skwi ŋa Lazglafta ta kla akwata dzratá wi ya, ka saba həŋ ma Yardeŋ, » kaʼa. 17 Ka mnanaftá Yəhusuwa ta gwal dra skwi ŋa Lazglafta kazlay sabwa sa ma Yardeŋ kəʼa. 18 Na gi saba tsa gwal ta dra skwi ŋa Lazglafta ta kla akwata dzratá wa Yawe ya ma takataka Yardeŋ, ka zlraftá zala ta mbaɗa, ka ndəghafta pesleʼ pesleʼ manda va si nzakwa ni taŋtaŋ.
19 Baɗ maghwaŋa fitik ma taŋtaŋa tili tsughwaɗapta la Israʼila ta Yardeŋ. Ka fata həŋ ta ghuɓa taŋ ma Gilgal, nda ta təv safa fitik ma Yeriku. 20 Ka dzagwatá Yəhusuwa ma Gilgal ta tsa palaha ghwaŋpəɗ his hlagaf lu ma Yardeŋ ya. 21 Kaʼa nda la Israʼila mantsa: « Dazlay, ka ɗawaghuna ɗawa zwana ghuni ta klatá ghəŋa na palaha na katsi, 22 dzaʼa mnana mna kuni ta həŋ ya ká la Israʼila tsughwaɗagaptá Yardeŋ ta ghwalatá vli. 23 Ghwaliŋ ghwala Yawe, Lazglafta ghuni ta ima Yardeŋ ta kəma ghuni ha ka laba ghuni, manda va ya ghwaliŋ tsi ta drəfa Zaŋwafiha ta kəma mu kəl mu ka sabi ya. 24 Maga maga mantsa ya, kada grafta inda mnduha ta haɗik ta glakwa mbrakwa Yawe. Nda ya kada gɗata kuni ta zləŋa Yawe, Lazglafta ghuni, » kaʼa.