Tsughwaɗay la Israʼila ta zala Yardeŋ
3
1 Ka tsavaftá i Yəhusuwa nda inda la Israʼila ga sərɗək ma Sitim ka laha tawa zala Yardeŋ. Ka han həŋ hada, ka kəzla fitika tsughwaɗay taŋ. 2 Baɗ mahkəna fitik ka sliʼaftá la mali ta ghəŋa mnduha, ka ranaftá ghuɓu. 3 Wya zlahu mnana həŋ ta mnduha: « Ka nda ngha kuni ta gwal ta dra skwi ŋa Lazglafta, la Levi ta kla akwata dzratá wa Yawe, Lazglafta ghuni ya, ka sliʼafta kuni ma vli ya hada kuni, ka dzaʼa mista taŋ. 4 Mantsa ya dzaʼa kəl kuni ka snaŋtá tvi ŋa ksay ghuni, aŋ mndani ta mbaɗaf a kuni ta na tvi na daga ghalya wa. Nziya nza tsi ná, yaha kuni lagha ndusa nda tsa akwati ya, mamu ka mabaŋ mataba ghuni ta maga kilumitər turtuk, » ka həŋ. 5 Ka Yəhusuwa nda mnduha mantsa: « Ghuɓiŋwa ghuɓa ta nzakwa ghuni, kabga dzaʼa maraŋ mara Yawe ta skwiha ka mazəmzəm mataba ghuni mahtsim, » kaʼa. 6 Ka Yəhusuwa ga mahtsima ni nda gwal ta dra skwi ŋa Lazglafta guli mantsa: « Klawa kla ta akwata dzratá wi, ka mbaɗa kuni ta kəma mnduha, » kaʼa. Ka mag həŋ mantsa.7 Ka Yawe nda Yəhusuwa mantsa: « Gita, dzaʼa zlrafta yu ta kapaghafta ta wa ira inda la Israʼila. Mantsa ya, dzaʼa snaŋ sna həŋ kazlay na kawadaga yu nda kagha manda va ya si nza yu nda Musa ya kəʼa. 8 Kagha ya, wya zlahu dzaʼa kagha mnanatá gwal ta dra skwi ŋa Lazglafta ta kla akwata dzratá wi ya: “Na gi lagha ghuni ta wa zala Yardeŋ ya, ka sladaghuta kuni ma Yardeŋ,” » kaʼa. 9 Ka Yəhusuwa nda la Israʼila mantsa: « Gavagaghawa gava da hadna, ka sna kuni ta gwaɗa ta mnə Yawe, Lazglafta ghuni ŋa ghuni, » kaʼa. 10 Ka Yəhusuwa guli mantsa: « Dzaʼa graf gra kuni kazlay na mataba ghuni Lazglafta nda hafu mida kəʼa. Nda ya kazlay dzaʼa ghəzliŋ ghəzla ta kəma ghuni ta la Kanʼana, nda la Het, nda la Hiv, nda la Periz, nda la Girgis, nda la Amuru, nda ya nda la Yəbus kəʼa. 11 Wya skwi ŋa graghunafta: Dzaʼa lab la akwata dzratá wa mghama inda ghəŋa haɗik ta kəma ghuni ma zala Yardeŋ. 12 Ndana tama, hlafwa hla ta mnduha ghwaŋpəɗ his mataba mndəra la Israʼila. Mndu turtuk turtuk ma mndəra mndu. 13 Na gi fadamta tsa gwal ta dra skwi ŋa Lazglafta ta kla akwata dzratá wa Yawe, mghama inda ghəŋa haɗik ya ta səla taŋ da zala Yardeŋ dzaʼazlay ya, dzaʼa tsavap tsa zala. Haɗ tsa imi ta saha nda sa ya dzaʼa mbaɗgəlta mbaɗa wa. Dzaʼa slada slada manda skwi ŋaghu lu, » kaʼa.
14 Ka sliʼaftá mnduha ma tumpula taŋ ŋa dzaʼa tsughwaɗa zala Yardeŋ. Ka klə tsa gwal ta dra skwi ŋa Lazglafta ya ta kəma, tsa gwal ta kla akwata dzratá wi ya. 15 Ta fitika tska skwi ta vwah ta ndəghafta tsa zala Yardeŋ ya pesleʼ pesleʼ. Ama na tsa ɓhadaghata gwal ta dra skwi ŋa Lazglafta ta kla akwata dzratá wi, ka famtá səla taŋ ma imi ya, 16 ka sladaghuta tsa imi ta saha nda sa ya, manda skwi ŋaghu lu. Mbaɗgla a ta mbaɗa wa. Diʼiŋ kəʼa sladaghuta, daga ma luwa Adamu ndusa nda Tsartaŋ. Ka sladaghutá tsa imi ta dzaʼa nda ma drəf ka slughul ya kul mbaɗa. Ka tsughwaɗadapta mnduha ta zala Yardeŋ mbəŋ nda luwa Yeriku. 17 Ka sladaghutá tsa gwal ta dra skwi ŋa Lazglafta, ta kla akwata dzratá wi Yawe ya ma takataka daɓa ghwa nda ghwala ya kul gigiɗavata, ta sliʼadaptá la Israʼila nda səla ta ghwalatá vli, ha ka sliʼadapta inda mndu ta ɓla zala Yardeŋ.